Փաստ ինֆո

Վաղը, Լիսաբոնում տեղի կունենա ֆուտբոլի Եվրոպայի գլխավոր ակումբային մրցաշարի հերթական խաղարկության եզրափակիչ արարը: Պատմության մեջ առաջին անգամ պատվավոր մրցանակը կվիճարկեն մեկ քաղաքի թիմեր և Պորտուգալիայի կենտրոնը կներկվի Մադրիդի երանգներով: «Էշտադիու դու Լուշ» մարզադաշտում նախատեսված այդ աննախադեպ իրադարձության մեկնարկը Երևանի ժամանակով 22:45-ին ազդարարելու է հոլանդացի մրցավար Բյորն Կայպերսը:

1955 թվականին «L’Équipe» հանդեսի խմբագիր Գաբրիել Անոյի մտահղացմամբ ծնված գավաթը այս անգամ վիճարկելու են «Ռեալն» ու «Ատլետիկոն»: Իսպանիայի նորընծա չեմպիոնը փորձելու է երկրի ամենատիտղոսավոր ակումբի հետ պայքարում հաստատել կարգավիճակի օրինաչափ լինելը: Հետաքրքիր է, որ «Ռեալը» 9-ը անգամ նվաճել է Չեմպիոնների գավաթը, իսկ «Ատլետիկոյին» նման բախտ երբեք չի վիճակվել: Հասկանալի է, որ արքայական ակումբը ձգտելու է կլորացնել այս մրցաշարում հաղթանակների քանակը, որը վերջին անգամ համալրվել է 12 տարի առաջ, իսկ «շերտավորները» (համազգեստի համար այդպես են կոչում «Ատլետիկոյին») ամեն ինչ անելու են գավաթին առաջին անգամ տիրանալու համար: Ի դեպ, «Ատլետիկոն» նման հնարավորություն ունեցել է 1974 թվականին, բայց Բրյուսելում կայացած եզրափակիչի առաջին խաղում Մյունխենի «Բավարիայի» հետ 1-ական գոլ փոխանակելուց հետո՝ վերախաղարկման ժամանակ պարտվել է 0:4 հաշվով (այն ժամանակ հետխաղյա 11-մետրանոցների հարվածաշար չէր կիրառվում): «Ռեալի» պատվիրակությունը մրցավայր է ժամանել այսօր՝ հանգրվանելով Պորտուգալիայի մայրաքաղաքի Ազատության պողոտայում գտնվող «Տիվոլի» շքեղ հյուրանոցում: Ակումբի գլխավոր մարզիչ Կարլո Անչելոտին իրեն շրջապատած լրագրողներին հայտնել է, որ թիմի բոլոր ֆուտբոլիստները ձգտում են ժամ առաջ մարտի նետվել: «Սակայն, կասկածի տակ է Քարիմ Բենզեմայի մասնակցությունը, քանզի նա չի հասցրել լիարժեք վերականգնվել վնասվածքից: Եվ իհարկե, կզգացվի Խաբի Ալոնսոյի բացակայությունը, որը խաղադաշտ դուրս չի գա մինչ այդ կուտակած դեղին քարտերի պատճառով»,- ասել է Անչելոտին:

Իսկ ահա «Ատլետիկոն» մեծ քաղաքի թոհուբոհին նախընտրել է Մադրիդից ոչ հեռու գտնվող սեփական մարզահանգրվանում պատրաստվելը: Ի դեպ, ընդհանուր խմբում մարզվում են Դիեգո Կոստան և Արդա Թուրանը, որոնց մասնակցությունը եզրափակչին բացառվում էր վնասվածքի պատճառով: Բայց դա էլ, ինչպես երևում է, գլխավոր մարզիչ Դիեգո Սիմեոնեի փոքրիկ խորամանկությունն է: Վերջինս, նրանց մասնակցության հարցում խոստացել է հստակություն մտցնել միայն վաղը:

Հատկանշական է, որ Կոստան չի զլացել և հասցրել է այցելել Սերբիայի մայրաքաղաք Բելգրադ, որտեղ աշխատում է եվրոպական հռչակ ունեցող բուժակ Մարինա Կովաչևիչը: Ասում են, նա հատուկ աղոթքների և դեղաբույսերի միջոցով արագորեն ոտքի է կանգնեցնում կապանների կտրվածք ունեցող մարդկանց: Սա, ինչպես ասում են, ի գիտություն ցանկացողների համար:
«Ատլետիկոն» Լիսաբոն ժամանեց մի քանի ժամ առաջ և հանգրվանեց մի հյուրանոցում, որը գտնվում է ուղիղ ֆան գոտու դիմաց: Այնպես որ, ֆուտբոլիստները ոգևորության պաշարները լրացնելու խնդիր չեն ունենա: Պետք է ասել, որ Պորտուգալիա են ժամանել 70 հազար իսպանացի երկրպագուներ, որոնցից միայն 34 հազարն է խաղի տոմսի երջանիկ տեր դարձել: Մյուսները հուսով են մի կերպ սողոսկել մարզադաշտ կամ էլ անմոռանալի պահեր ապրել փողոցային երկրպագության միջոցով:

Մարդկանց ուղևորությունը կազմակերպելու համար ավիաընկերությունները եռապատկել են չվերթները երկու մայրաքաղաքների միջև, իսկ իսպանական երկաթուղային ընկերությունը 10 լրացուցիչ գնացք է հատկացրել: Անգամ այդ պարագայում հիմնական փոխադրամիջոցը ավտոբուսներն ու անձնական մեքենաներն են: Միջպետական մայրուղիում կուտակվել է 500 ավտոբուս և շուրջ 15 հազար ավտոմեքենա, որոնց երթևեկությունը կարգավորում են ճանապարհային ոստիկանության ընդամենը 300 աշխատակիցներ:

Իսկ բուն Լիսաբոնում անվտանգության ապահովմանը և կարգուկանոնի պահպանմանը հետևում են 700 իրավապահներ:

Երկու ակումբների երկրպագուների հնարավոր բախումները բացառելու համար փողոցում խաղը դիտելու նպատակով նրանց հատկացված գոտիները գտնվում են 1,2 կմ հեռավորության վրա:

Այսպիսին է նախերգանքը ֆուտբոլային տոնի, որի հանգուցալուծումը կլինի վաղը կեսգիշերն անց:

Հեղինակ` Հրայր Նազարյան