Փաստ ինֆո

Մեղադրող կողմին ոչինչ չի մնում, քան օրինական ճանապարհով հրաժարվել ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի պետի և նույն բաժանմունքի առաջատար մասնագետի դեմ գործով կաշառքի անհիմն մեղադրանքից: Այս մասին «Փաստինֆո»-ի թղթակցի հետ զրույցում նշեցին համապատասխանաբար` բաժանմունքի պետ Սահակ Հարությունյանի ու  առաջատար մասնագետ Ալեքսանդր Խաչատրյանի պաշտպաններ Ինեսսա Պետրոսյանն ու Գիվի Հովհաննիսյանը:

Ի.Պետրոսյանը հույս  հայտնեց, որ մեղադրողն  օբյեկտիվ  կարծիք կհայտնի և  մի դեպքում կհրաժարվի   Սահակ Հարությունյանին առաջադրված  անհիմն մեղադրանքից,  իսկ մյուս դեպքում՝   կհրաժարվի Ալեքսանդր Խաչատրյանին առաջադրված մեղադրանքից  և  կփոփոխի  կաշառքի մեղադրանքը՝  խարդախության:

Վարույթն իրականացնող նախաքննական մարմինը  որպես հիմք էր ընդունել  նախկին դատապարտյալ Բաբկեն Բուդաղյանի ցուցմունքը և առերես հարցաքննության արձանագրությունը, սակայն  արդեն հունվարի 30-ին  մեղադրյալների հետ առերես հարցաքննության ժամանակ   Բաբկեն Բուդաղյանը տվել էր  ճշմարիտ ցուցմունքներ, այսինքն՝ հայտնել էր, որ  Սահակ Հարությունյանն իրենից գումար չի պահանջել և նրա հետ որևէ գումարային խոսակցություն չի եղել:  «Նախաքննական մարմինը պետք է կատարեր հետևություններ` Սահակ Հարությունյանի մասով ընդհանրապես   քրեական հետապնդումը դադարեցներ և քրեական գործի վարույթը կարճեր, իսկ Խաչատրյանի մասով  արդեն խոսք պետք է գնար արարքի վերաորակման մասին»,- ասաց Ի.Պետրոսյանը:

Մինչդեռ նախաքննական մարմինն «այդ օրինական գործողությունները կատարելու փոխարեն գնաց անօրինական քայլերի», և հիշյալ առերես հարցաքննության հաջորդ օրն իսկ, այսինքն՝   2014թ. հունվարի  31-ին, պաշտպանական կողմի համոզմամբ, ցուցում տվեց ոստիկանության Կազմակերպված հանցավորության դեմ պայքարի վարչությանը, որպեսզի նրանք պարզեն ինչու է  Բուդաղյանը տվել նման ցուցմունք և միանգամից Բուդաղյանից դիմում  վերցրեց նրա նկատմամբ պաշտպանության միջոց կիրառելու վերաբերյալ: «Դա նշանակում է, որ Բուդաղյանն ընկավ իրենց տրամադրության տակ՝ նրան շրջապատում են ոստիկանության երեք աշխատակիցներ, որոնք միշտ գտնվում էին նրա կողքին»:  Բուդաղյանի աչքի տակ մեծ կապտուկ կար,  ըստ պաշտպանական կողմի, նա  ակնհայտ ծեծի էր ենթարկվել ու նրանից   կորզվել էին «այլ բովանդակության ցուցմունքներ՝ կրկին ի վնաս մեր պաշտպանյալների»:

Պաշտպանական կողմը նշեց, որ նախաքննական մարմնին ու դատավարական հսկողություն իրականացնող դատախազին  իրենց  կողմից ներկայացված միջնորդությունները պարզապես  անտեսվել են,  և գործն ուղարկվել է  դատարան:

Իր երեք պահապանների ուղեկցությամբ դատարան ներկայացած  Բուդաղյանը, ով  արդեն  անկաշկանդ ու  դատարանում ավելի ապահով էր իրեն զգում, նորից տվել էր ճշմարտացի ցուցմունքներ` պնդելով իր 30.01.2014թ.  առերես հարցաքննության ժամանակ տված ցուցմունքները: Ավելին,  նա ընդգծել էր, որ  միայն այդ օրն է ինքը տվել ճիշտ ցուցմունքներ, այն է` Սահակ Հարությունյանն իրենից ընդհանրապես գումար չի պահանջել, որևէ գումարային խոսակցություն բաժանմունքի պետի հետ ընդհանրապես չի եղել: Բուդաղյանը այս ցուցմունքը պնդել է  նաև  մոտ 15 օր անց՝ երկրորդ անգամ հարցաքննվելով դատարանում:

Բուդաղյանը նշել է նաև, որ ինքը  ցանկություն չի ունեցել, որ իր նկատմամբ պաշտպանության միջոց կիրառվի, քննիչն է ասել` դիմումը գրի:

Գիվի Հովհաննիսյանն իր հերթին  համոզմունք հայտնեց, որ իր պաշտպանյալի մասով ոչ միայն այս,  մի շարք այլ գործեր ևս ակնհայտ խարդախություն են,  պարզապես անհրաժեշտություն կա միջազգային կառույցներին ներկայացնել, որ պայքար է մղվում կոռուպցիայի դեմ, կաշառքի հոդվածով մեղադրանքներ են ներկայացնում:

Ըստ Գ.Հովհաննիսյանի, քննիչի կողմից խախտումներ են թույլ տրվել, սակայն դրանք մնացել են անհետևանք, քանի  որ ՀՔԾ քննիչն անձեռնմխելի է, հնարավոր չէ նրան պատասխանատվության ենթարկել: Խախտումներից ակնառուն այն է, որ աչքի տակի կապտուկով  Բուդաղյանին տեսաձայնագրությամբ հարցաքննում են, հարցերն ու պատասխանները չեն համապատասխանում իրար:  «Ակնհայտ երևում է, որ տեղի է ունեցել ցուցմունք տալու իմիտացիա»,- ասաց պաշտպանը՝ համոզմունք հայտնելով, որ Բուդաղյանն  «անգիրը լավ չէր սովորել,  որոշակիորեն այլ պատասխաններ էր տալիս»: