Փաստ ինֆո

ԱԺ պետաիրավական հարցերի մշտական հանձնաժողովում այսօր հրավիրված քննարկմանը Արդարադատության նախարարության ղեկավարությունը ներկայացել էր գրեթե ողջ կազմով` նորանշանակ նախարար Հովհաննես Մանուկյանի գլխավորությամբ:

Նախարարը նշեց, որ կարևորելով հանդերձ ներկայացված օրինագծերը՝ ինքն այսօր կբավարարվի քննարկմանը ներկա լինելով, իսկ որպես զեկուցողներ` կառավարության օրենսդրական  նախաձեռնությունների ներկայացնամ ժամանակ հանդես կգան իր ենթակաները:

Առաջին օրենսդրական փոփոխության նախագիծը, որ ներկայացվեց և ընդգրկվեց ԱԺ մեծ օրակարգում, Քաղաքացիական օրենսգրքում առաջարկվող փոփոխությունն էր:

Մասնավորապես՝ առաջարկվում է վարձակալության պայմանագրերի հստակեցում: Այս հարցին խիստ արձագանքեց հատկապես ՀԱԿ խմբակցության պատգամավոր Գագիկ Ջհանգիրյանը: «Խստացնում եք էլի: Անտունները քիչ են, մարդկանց հանում գցում եք փողոց»,- ասաց պատգամավորը՝ հավելելով. «Կարգավորեք, բայց մի խստացրեք»:

Նշենք, որ ըստ գործող օրենքի՝ եթե վարձակալն ավելի քան 2 անգամ չի վճարում վարձավճարը, սեփականատերն իրավունք ունի դիմել դատարան:

ԱԺ պատգամավոր Էդմոն Մարուքյանն առաջարկում է հստակեցնել ձևակերպումը` «անընդմեջ երկու անգամից ավելի» արտահայտությամբ, ինչը, Գագիկ Ջհանգիրյանի դիտարկմամբ, խստացում է ենթադրում: Ի դեպ, կառավարության առաջարկած տարբերակում եղել է «պարբերաբար չվճարելու դեպքում» ձևակերպումը:

Քննարկման ընթացքում ԱԺ ՀՀԿ խմբակցության անդամ Արփինե Հովհաննիսյանն էլ մեկ այլ տարբերակ առաջարկեց` «մեկ տարվա ընթացքում կամ վեց ամսվա ընթացքում երկու անգամից ավել»՝ էլ ավելի հստակություն սահմանելու նպատակով:

Ի վերջո, որոշվեց երկար ժամանակ չվատնել քննարկումների վրա, հարցն ընդգրկել ԱԺ մեծ օրակարգ եւ հետագա հստակեցումներն անել հընթացս:

Կառավարության ներկայացուցիչները` ի դեմս Արդարադատության նախարարի, այս տարբերակի դեմ չառարկեցին: