Փաստ ինֆո

Մամուլում հարապարակումներ եղան, որ ՍԴ դատավորի՝ 2 թափուր տեղի համար հավակնում է երեք թեկնածու, նրանց թվում նշելով  «Սահմանադրական իրավունքի կենտրոն» խորհրդի նախագահ, իրավագիտության դոկտոր, պրոֆեսոր, Գեւորգ Դանիելյանի անունը։ Շրջանառվող լուրերը «Փաստինֆո»-ի խնդրանքով մեկնաբանում է Գեւորգ Դանիելյանը։

- Պարոն Դանիելյան մամուլում հավաստվում է, որ Դուք ևս պայքարում եք ՍԴ անդամ դառնալու համար: Մինչ այդ Ձեր անունը երբևէ չի շոշափվել, որքանո՞վ է այդ տեղեկությունը համապատասխանում իրականությանը:  

- Առնվազն հիմնավորված չէ «պայքարելու» մասով, և այս հարցում, թերևս, լրագրողին թյուրիմացության մեջ են գցել. տևական ժամանակ պատասխանատու պաշտոններ եմ զբաղեցրել գլխավոր դատախազությունում ու կառավարությունում, և իմ կենսագրությունը միանշանակ հավաստում է, որ ստանձնել եմ բացառապես իրավաչափ հիմքերով  թափուր դարձած պաշտոններ: Հրապարակմանը չէի անդրադառնա և Ձեզ նույնպես կխնդրեի այդ հարցով ինձ չդիմել, եթե չլինեին նշված անընդունելի շեշտադրումները: Մի խոսքով, ինձ համար սկզբունքորեն խորթ է «զբաղված տեղի վրա աշխատելու» գործելաոճը: Խնդրի հետ առնչվողները շատ լավ գիտեն, որ երբեք չեմ դրսևորել անթույլատրելի նախաձեռնություն, առավել ևս որևէ կերպ չեմ փորձել օգտվել հովանավորչությունից, որպիսի պարագայում առնվազն հարիր չեմ համարում՝ «պայքարում է» արտահայտությունը:  

- Իսկ ակնկալո՞ւմ եք դառնալ ՍԴ անդամ:

- Կոնկրետ ՍԴ անդամի հարցը հանգիստ թողնենք, մոտ ժամանակներս հայտնի կդառնան իրական թեկնածուները: Այս պահին ունեմ որոշակի հոգեհարազատ զբաղվածություն. արդեն մեկ տարի է, ինչ ԵՊՀ իրավագիտության ֆակուլտետի սահմանադրական ամբիոնի վարիչն եմ, ուր դասախոսի կարգավիճակով նախկինում աշխատել եմ շուրջ երեք տասնամյակ և, միաժամանակ ՍԴ խորհրդական եմ: Հուսով եմ, որ իմ առօրյա աշխատանքով աննահանջ նպաստում եմ կրթության ոլորտում կոռուպցիան արմատախիլ անելուն և արհեստավարժությանը նախապատվություն տալուն:

Ինչ վերաբերում է մասնագիտական աշխատանքին, ապա, կարծում եմ, հետագա զարգացումները կբացառեն և կդադարեցնեն անհարկի գուշակությունների անհրաժեշտությունը:

- Ի՞նչ կարծիք ունեք կառավարության նոր կազմի մասին, կկարողանա՞ն այս բարդ իրավիճակում բարելավումներ իրականացնել:

- Արդեն առիթ ունեցել եմ կառավարության նախկին ծրագրերի ցածր որակի ու սահմանադրականության խնդիրներին անդրադառնալիս, կարծիք հայտնել նաև նոր կազմի առնչությամբ. համոզված եմ, որ, հիմնականում, ընտրված են գործունյա, բանիմաց, համագործակցության համար բաց և լուրջ մարդիկ, չպետք է, որ հիասթափվելու առիթ տան: Ինքս աշխատել եմ կառավարության կազմում և գիտեմ, թե որքան ծանր ու պատասխանատու գործ է: Ինձ և բոլորիս մնում է միայն ուժերի ներածին չափով աջակցել և հաջողություն մաղթել:

Լուսանկարը՝ PanARMENIAN photo-ի