Փաստ ինֆո

ՀՀ վարչապետ Հովիկ Աբրահամյանն այսօր կառավարության նիստի ընթացքում անդրադարձավ երեկ 100 խոշոր հարկատուների հետ ունեցած իր դռնփակ հանդիպմանը: Նա նշեց, որ հանդիպումը տեղի է ունեցել առանց մամուլի ներկայացուցիչների, որպեսզի գործարարները հասկանան, որ կառավարության կողմից խնդիրը շատ հստակ է դրված, և կարողանան ազատ պայմաններում քննարկել իրենց հուզող խնդիրները:

Անդրադառնալով բուն հանդիպմանը քննարկված հարցերին՝ Հովիկ Աբրահամյանը տեղեկացրեց, որ խոշոր գործարարներին մինչև ս.թ. հուլիսի 1-ը ժամանակ է տրվել՝ օրինական և հավասար դաշտում աշխատելու համար: Վարչապետը նաև ասաց, որ ՀՀ խոշոր գործարարներին երեկ իրազեկել է խաղի նոր կանոնների մասին, ըստ որի՝ բոլորը հավասար դաշտում պետք է գործեն և անեն ամեն ինչ` ստվերից դուրս գալու համար:

«Դա լինելու է մեր պայմանը, մինչև հուլիսի մեկը ժամանակ ենք տալիս, որ իրենք  աշխատեն հավասար դաշտում: Ես ունեմ համոզմունք, որ դա պահպանելու են, եթե չպահպանեն, մենք փորձելու ենք մեր լծակներն օգտագործենք, որ խնդիրներին լուծում տանք»,- ասաց Հովիկ Աբրահամյանը:

Ի դեպ, երեկ 100 խոշոր հարկատուների հետ վարչապետի ունեցած հանդիպման ժամանակ հայտարարվել է նաև, որ նոր կառավարությունը հրաժարվում է նախորդ կառավարության սահմանած խոշոր ընկերությունների ֆինանսական հաշվետվություններում պարտադիր աուդիտից:

Սա, ըստ Հովիկ Աբրահամյանի, հավելյալ ֆինանսական բեռ է, որից բիզնեսը պետք է ազատ լինի: