Փաստ ինֆո

 

Ազգային ժողովն այսօր ավարտեց կառավարության կողմից առաջին ընթերցմամբ ներկայացված օրենսդրական փաթեթի քննարկումը, որով, մասնավորապես, առաջարկվում է թեթեւացնել բիզնեսի՝ պարտադիր աուդիտի իրականացման հետ կապված, ֆինանսական բեռը: Այն պատգամավորների կողմից ընդունվեց ոչ միանշանակ: Նախագիծը կքվեարկվի վաղը:

 

Ի պատասխան հարցի, թե  «Հաշվապահական հաշվառման մասին» օրենքում այս  փոփոխությունը որքանով է նպաստավոր պայմաններ ստեղծում բիզնես միջավայրի համար և դրական արդյունք նախատեսում, Ազգային ժողովի փոխնախագահ Հերմինե Նաղդալյանը նախ նկատեց, որ երբ «Հաշվապահական հաշվառման մասին» օրենքով ընդունվում էր որոշ կազմակերպությունների համար աուդիտորական պարտադիր եզրակացություն ներկայացնելու պահանջը, բազմաթիվ պատգամավորներ խորհրդարանական դահլիճում, իսկ հետո նաև գործարար շրջանակների ներկայացուցիչներ, դժգոհություն էին հայտնում այդ պահանջի պարտադիր լինելու առնչությամբ: Նրանք դա պատճառաբանում էին նրանով, որ աուդիտորական ծառայությունների շուկայում ապահովվում է պարտադիր կայուն ծառայությունների ծավալ, որը չի նպաստում աուդիտորական ծառայությունների որակի բարձրացմանը ու միաժամանակ լրացուցիչ բեռ է հանդիսանում ձեռնարկությունների համար: 

 

«Կառավարությունը ականջալուր է գտնվել այս դժգոհություններին և որոշում ընդունել, որ ձեռնարկություններն իրենք կարող են որոշել այս ուսումնասիրության անհրաժեշտությունը ունեն թե ոչ, հատկապես ելնելով դրա՝ իրենց համար օգտակարությունից: Իհարկե, բազմաթիվ են դեպքերը, երբ գործարարը աուդիտորական ուսումնասիրության արդյունքում իր գործի համար կազմակերպչական, հաշվապահական հաշվառման և այլ բնույթի օգտակար շատ խորհուրդներ է ստացել: Բայց, միանշանակ է, որ ծառայության պարտադիր լինելը չի նպաստում այն հանգամանքին, որ այն իրականում բարձրորակ լինի, որ աուդիտորական ձեռնարկությունները ձգտեն իրենց ծառայության որակը բարելավելու ճանապարհով մեծացնել իրենց կլիենտուրայի քանակը և շրջանառության ծավալները և ոչ թե ապահով ստանան իրենց պատվերի ծավալը՝ առանց մտածելու ծառայությունների որակը բարձրացնելու մասին»,-նշեց Հ.Նաղդալյանը: 

 

Ըստ նրա՝ այժմ էլ, երբ դժգոհությունը հաշվի է առնվում և լուծում է առաջարկվում, դահլիճի նույն աջ թևից, այն է՝ ընդդիմության շարքերից,  հնչում են հակառակ բնույթի պնդումներ, թե կփակվեն մի քանի տասնյակ ձեռնարկություններ, մասնագետները կմնան առանց աշխատանքի, կարտագաղթեն և այլն:  

 

ԱԺ փոխնախագահի մատուցմամբ, օրինագիծը, սակայն, չի վերացնում աուդիտորական ծառայությունների պահանջն ընդհանրապես. «Մեր բազմաթիվ օրենքների տրամաբանության և պահանջների մեջ դա պահպանվում է. բաժնետիրական ընկերությունների մասին օրենքում՝ սեփականատերերի շահերի պաշտպանության համար, «Գնումների մասին» օրենքում՝ պետական պատվերը ձևավորելու և տեղաբաշխելու համար,  ինչպես նաեւ բարձր շրջանառություն, միջազգային շուկաներում գործելու ցանկություն ունեցողների, բանկերի համար և այլն»: 

 

Հ.Նաղդալյանի պարզաբանմամբ՝ այս օրինագիծը միայն շտկում է արհեստական իրավիճակը շուկայում, որը ստեղծվել էր հօգուտ աուդիտորական կազմակերպությունների: «Եվ մենք չենք կարծում, որ սա այն դաշտն է, որն ավելի արդարացի և ազատական դարձնելու դեպքում մենք արտագաղթ ենք ունենալու, կամ կիրականանան առավելապես անհասկանալի այն կանխատեսումները, որ հնչեցին, թե հաշվառման անարխիա է լինելու կամ այլ նեգատիվ երևույթներ: Կարծում եմ, ունենալու ենք այս մշակույթը համալիր և ծավալուն ներդնելու, ծառայությունների որակը բարձրացնելու նախապայման»,-ընգծեց նա:  

 

ԱԺ փոխնախագահի համոզմամբ՝ մի շարք այլ նախապայմաններ ևս կան, որոնք անհրաժեշտ են և կնպաստեն այս ոլորտի կայացմանը ու մշակույթի ներդրմանը, այդ թվում՝ աուդիտորական եզրակացության արժևորումը որպես փաստաթուղթ հարկային մարմնի հետ հարաբերություններում: «Կարծում եմ, որ դրանք հաջորդ քայլերն են, որոնք պետք է կատարվեն համալիր կերպով այդ ոլորտում հետագա բարեփոխումների ընթացքում: Բայց այսօր մենք ունենք իրավիճակի եւս մեկ օրինակ, երբ մեր ընդդիմադիրներն  ինչ-որ դրույթ դնելիս դժգոհում են, հանելիս՝ էլի դժգոհում են: Ռուսերեն ասում են՝ «Вам не угодишь»: Ինչո՞ւմ եք շահագրգռված՝ կնճռոտ հարցերի լուծմա՞մբ , թե՞ քննադատելու հնարավորությամբ»,-նշեց ԱԺ փոխնախագահ Հերմինե Նաղդալյանը: