Փաստ ինֆո

Իսկ Իսրայել Սարգսյանը գործել է  Արմեն Տեր-Սահակյանի բանդայի կազմում՝ մասնակցել Հովհաննես Սուքիասյանի սպանության նախապատրաստմանը, անմիջական մասնակցություն ունեցել Դատախազության քննչական վարչության պետ Վլադիմիր Գրիգորյանի դեմ մահափորձին։  

 

Հենց Իսրայել Սարգսյանն  է 1992թ սեպտեմբերի 14-ին հափշտակել այն ավտոմեքենան, որը հետագայում որպես հանցագործության գործիք օգտագործվել է  Աշտարակի շրջխորհրդի գործկոմի նախագահ Հովհաննես Սուքիասյանի՝ 1992 թվականի սեպտեմբերի 18-ին իրականացված սպանության ժամանակ։ 

 

Նա ուղղակի մասնակցություն է ունեցել դատախազության նախկին քննչական վարչության պետ, ներկայումս դատավոր Վլադիմիր Գրիգորյանի նկատմամբ 1994 թվականի  հունիսի 2-ին իրականացրած մահափորձին։ Մասնավորապես, բանդայի անդամներ Արշակ Շուխյանը, Իսրայել Սարգսյանը և Սուրեն Հարությունյանը 2 ինքնաձիգներով զինված, վերջինիս վարած ՎԱԶ 21-06 ավտոմեքենայով դարանակալել ու Բաղրամյան պողոտայի 1-ին փակուղու սկզբնամասում սպասել են մինչև նախկին դատախազ, այժմ Էրեբունի-Նուբարաշեն վարչական շրջանների ընդհանուր իրավասության դատարանի դատավոր  Վլադիմիր Գրիգորյանը տնից դուրս կգա, քանի որ շատ լավ գիտեին, որ նա ավտոմեքենայով աշխատանքի մեկնելիս կարող է անցնել միայն այդ ճանապարհով: Իսկ նրանց մյուս հանցակիցը` Կամո Նարիբեկյանը ինքնաձիգով զինված մեկ այլ ավտոմեքենայով սպասել է ՀՀՇ վարչության շենքի դիմաց` անհրաժեշտության դեպքում հանցակիցներին օժանդակելու համար: 

 

Երբ Վլադիմիր Գրիգորյանը՝ ժամը 08:10-ին, իր անձնական օգտագործման ՎԱԶ 21-07 մակնիշի ավտոմեքենայով վարորդ Արթուր Հակոբյանի հետ միասին աշխատանքի գնալու նպատակով բնակելի շենքի բակից փակուղիով ընթացել է Բաղրամյան պողոտայի ուղղությամբ, բանդայի անդամները իրենց ավտոմեքենայով կտրուկ հետընթաց կատարելով փակել են նրանց ճանապարհը, և շուրջ 5 մետր հեռավորությունից 2 ինքնաձիգով կրակ են բացել` գնդակոծելով նրանց ավտոմքենան:

 

Այս հարձակման հետևանքով վարորդը ստացել է կյանքի համար վտանգավոր ծանր մարմնական վնասվածք, իսկ Վլ.Գրիգորյանը, կռահելով վտանգը, վայրկենապես կողմնորոշվել է ու հասցրել է դուրս պրծնել ավտոմեքենայից` դրանով իսկ խուսափելով կրակահերթերից  և միաժամանակ հնարավորություն ընձեռելով վարորդին թաքնվելու ավտոմեքենայի սրահի ազատված հատվածում:

 

Երբ կրակահերթը դադարել է, Վլադիմիր Գրիգորյանն ու Արթուր Հակոբյանը շարունակել են անշարժ ու լուռ մնալ` ձևացնելով, թե մահացած են: Իսկ Վլ.Գրիգորյանը տեսանելի չի եղել կրակողների համար, քանի որ մնացել է ավտոմեքենայի և իր առանձնատան պատի արանքում: Մտածելով որ երկուսն էլ սպանված են, քանի որ ավտոմքենայի վրա արձակվել էր 60-ից ավելի գնդակ, հանցավոր խումբը դիմել է փախուստի և հանցագործության հետքերը վերացնելու նպատակով Հրազդանի կիրճում հրկիզել ավտոմեքենան: 

 

Ի դեպ, նշենք, որ այդ օրերին դատախազ Վլադիմիր Գրիգորյանը հենց Արմեն Տեր-Սահակյանի բանդայի ավազակային հարձակումների գործի քննությամբ էր զբաղված, ավելին` նա ընդհուպ մոտեցել էր բանդայի անդամներին ու պարագլուխներին, ու, թերևս հենց այս պատճառով էլ նրան փորձել էին սպանել: