Փաստ ինֆո

Սահմանադրական բարեփոխումների հայեցակարգի վերջնական նախագիծը հաստատման կներկայացվի հունիսի 30-ին, իսկ մինչ այդ նախատեսված են հանրային քննարկումներ: Այս մասին լրագրողների հետ հանդիպմանը  այսօր հայտնեց  Սահմանադրական բարեփոխումների հանձնաժողովի անդամ Գևորգ Դանիելյանը:

Մասնագետը  ոչ հիմնավորված ու ոչ ճիշտ է համարում սահմանադրական նոր բարեփոխումները քաղաքական ճգնաժամի  կամ դրա իրական վտանգի հետ փոխկապակցելը: Հակառակը, իրավիճակային փոփոխությունները, ըստ նրա, անկայուն են լինում և  հաջողության չեն  հանգեցնում:

Սահմանադրական ներկա բարեփոխումների արդյունքում կլինեն  բարելավումներ, մասնավորապես, պետք է ապահովվի արդյունավետ ու կանխատեսելի իրավակիրառ պրակտիկա: Գ.Դանիելյանը միաժամանակ ընդգծեց, որ   երբեք սահմանադրական  բարեփոխումները չեն կարող լուծել հասարակության առջև ծառացած բոլոր խնդիրները, որովհետև բոլոր խնդիրները չեն, որ առնչվում  են սահմադրական կարգավորումներին: Նա նկատեց, որ  կան քաղաքական ու իրավական մշակույթի թերություններ, այդ մշակույթները պետք է բարեփոխվեն, այսինքն՝ պետք է համակարգված  մոտեցում լինի խնդիրների լուծմանը:

Գ.Դանիելյանն ընդգծեց, որ սահմանադրական բարեփոխումներ անցկացնելու հարցում հապճեպության խնդիր չկա, ճիշտ ժամանակ է ընտրված դրանց համար. արդեն 9 տարի է անցել վերջին բարեփոխումներից, միջազգային փորձն էլ ցույց է տալիս, որ  ճիշտ այդ ժամկետում է բարեփոխումների անհրաժեշտություն առաջանում: Նա նկատեց, որ Հայաստանում մի քանի անգամ ավելի շատ են իրավական նորմերը  ճանաչվում հակասահմանադրական՝  համեմատած   հարևան երկրների հետ  միասին  վերցրած:

Գ.Դանիելյանը նշեց, որ ՀՀ սահմանադրությունում անհարկի շատ են վրիպակները: Մասնավորապես, շտկման կարիք ունի  18-րդ հոդվածը, որով  ամրագրվում է յուրաքանչյուր քաղաքացու դատական, պետական մարմինների առջև, իրավական պաշտպանության արդյունավետ միջոցների իրավունքը՝ այս շարքում անհրաժեշտ է ավելացնել նաև տեղական ինքնակառավարման մարմինները:  Իսկ սահմանադրության 19-րդ հոդվածում նշվում է դատական քննության ընթացքում լրատվամիջոցների մասնակցության մասին, թեև իրականում այստեղ խոսքը պետք է գնա նրանց ներկայության մասին: Սահմանադրությունում նշվում է նաև, որ ՀՀ նախագահը հետևում է Սահմանադրության պահպանմանը, սակայն  չի  նախատեսում, թե  ինչ կառուցակարգերով պետք է դա արվի:

Գևորգ Դանիելյանը նշեց, որ Հայեցակարգում պայմանականորեն է առաջարկվում Հայաստանում կառավարման խորհրդարանական ձևին անցում կատարելու մասին՝ այս հարցի շուրջ տարաձայնություններ կան և  սա չի նշանակում, որ  առաջարկվում է հրաժարվել կառավարման կիսանախագահական ձևից: Սակայն կիսանախագահական կառավարման ձևին նախապատվություն տալու դեպքում էլ այն ոչ այն տեսքով կլինի,  ինչպիսին  գոյություն ունի այսօր, այլ «էական վերանայումենրի  պայմանով»: Սահմանադրական բարեփոխումների հանձնաժողովն այն կարծիքին է, որ որևէ պաշտոնյա չի կարող ունենալ լայն լիազորություններ՝ առանց հավասարարժեք պատասխանատվության:

Գ.Դանիելյանը գտնում է, որ ընտրական համակարգը նախ պետք է ամրագրվի Սահմանադրույթյամբ, այս փուլում տեսակետն այնպիսին է, որ պետք է  նախապատվություն տալ համամասնական ընտրական համակարգին:
Գ.Դանիելյանն ընդգծեց, որ քաղաքական բնույթի հարցերի մասին քաղաքական ուժերի կարծիքը կարևոր է, բայց ոչ վճռորոշ:

Էական բարեփոխումներ են նախատեսվում նաև հանրաքվեի հետ կապված: «Փորձելու ենք  հանրաքվեի այնպիսի ինստիտուտ ունենալ, որը հնարավորություն  կտա ինքնիշխանության սահմանափակման  բոլոր  խնդիրները  վերապահել  հանրաքվեին»,- ասաց Գ.Դանիելյանը:

Լուսանկարը՝ PanARMENIAN Photo