Փաստ ինֆո

Նորածնային բաժանմունքի բուժքույրն այսօր մեղավոր ճանաչվեց մասնագիտական պարտականությունները ոչ պատշաճ կատարելու համար, ինչի հետեւանքով հիվանդին պատճառվել է միջին ծանրության վնաս եւ դատապարվեց տուգանքի՝ 100 000 ՀՀ դրամի  չափով:

Երևան քաղաքի բժշկական կենտրոններից մեկի նորածնային բաժանմունքի բուժքույր Մարինեն  (անունը փոխված է)  ԲԿ ընդունված  Արարատի մարզի Հովտաշեն գյուղի բնակչուհի Տաթևիկի նկատմամբ ոչ պատշաճ կերպով է իրականացրել մասնագիտական պարտականությունները, դրանց նկատմամբ դրսևորել է անփույթ, անբարեխիղճ վերաբերմունք, ինչի հետևանքով նրա առողջությանը պատճառվել է միջին ծանրության վնաս՝ առողջության տևական քայքայումով:

Մասնավորապես՝  Տաթևիկը 2013 թվականի սեպտեմբերի 3-ին բժշկական կենտրոն է ընդունվել ծննդաբերելու նպատակով և  նույն օրը՝ ժամը 21.25-ին, ծննդաբերել է տղա երեխա: Հետծննդաբերական շրջանը ևս նա անցկացրել է նույն հիվանդանոցում՝ գտնվելով հսկողության ներքո։ Սեպտեմբերի 5-ին նրա մոտ նկատվել  է ջերմության բարձրացում, ինչի կապակցությամբ կատարվել է ուլտրաձայնային հետազոտություն, իսկ բուժսպասարկում իրականացնող մասնագետների կողմից իրականացվել  հակաբորբոքային բուժում և արգանդի կրճատմանն ուղղված գործողություններ: Արգանդի կրճատման համար բուժող բժշկի կողմից նշանակվել են ներարկումներ, որոնք իրականացրել է նորածնային բաժանմունքի բուժքույր Մարինեն, ով նշված օրը ներարկումը կատարել է ոչ ճիշտ, ինչի հետևանքով Տաթեւիկի մոտ առաջացել են բարդություններ՝ թարախակույտի և նստանյարդի ախտահարում: Բուժքույրը հետույքային շրջանում ճիշտ չի ընտրել ներարկման տեղակայումը ինչ հետևանքով Տաթևիկ Սիմոնյանի մոտ առաջացել է նյարդի վնասում: Կատարած արարքի համար  բուժքրոջը մեղադրանք է առաջադրվել ՀՀ քրեական օրենսգրքի 130 –րդ հոդվածի 1-ին մասով:

Ամբաստանվող բուժքույրն այսօր դատարանում հայտարարեց, որ ընդունում է առաջադրված մեղադրանքը, զղջում՝  միջնորդելով կիրառել արագացված դատական քննության կարգ: 34- ամյա բուժքույրը դատարանին հայտնեց, որ ունի միջնակարգ մասնագիտական կրթություն,  ամուսնացած է,  ունի 2 անչափահաս երեխա:

Իսկ տուժողը դատարանին գրավոր տեղեկացրել էր, որ իր երեխան շուրջ  20 օր է գտնվում է հիվանդանոցում և չի կարող ներկայանալ դատական նիստին: Տուժողը նաև  դատարանին խնդրել էր  հիմք ընդունել իր նախաքննական  ցուցմունքը՝ որեւէ պահանջ չներկայացնելով ամբաստանյալի նկատմամբ:

Դատարանը բավարարեց ամբաստանյալի միջնորդությունը, կիրառեց  արագացված դատաքննության կարգ եւ, արձանագրելով, որ ամբաստանյալի պատասխանատվությունը և պատիժը ծանրացնող հանգամանքներ չկան, նրան մեղավոր ճանաչեց՝ դատապարտելով տուգանքի 100 հազար  դրամի չափով: