Փաստ ինֆո

«Ես ճանապարհային երթեւեկության կանոնները չեմ խախտել, վթարին նախորդող պահին հեռախոսով չեմ խոսել եւ արագություն չեմ գերազանցել»,- այսօր դատարանում հայտարարեց Վարդան Պետրոսյանը՝ հավելելով. «Ինձ առաջադրված մեղադրանքի մեջ ես ինձ մեղավոր չեմ ճանաչում»:

Ի պատասխան տուժող կողմի շահերի պաշտպան Ռուբեն Բալոյանը հիշեցրեց լրատվամիջոցներով Վարդան Պետրոսյանի  արած այն հայտարարությունը, թե ինքը պատրաստ է պատիժը կրել անգամ ցմահ, և հարց ուղղեց ամբաստանյալին. «Այդ դեպքում դուք հիմա ինչո՞ւ Ձեզ մեղավոր չեք ճանաչում»:

«Ես հենց առաջին օրն ասացի, որ այս գործը 2 կողմ ունի` բարոյական և իրավական։ Զարմանալին այն է, որ մինչ օրս հենց մենք քայլ ենք անում օրենքի բնագավառում, անմիջապես հարց են բարձրացնում բարոյական կողմի մասին, իսկ, երբ քայլ ենք փորձում անել բարոյական հարթությունում, անմիջապես իմ առաջ հառնում է օրենքը: Հիմա մենք օրենքի կողմից ենք մոտենում, քաղաքացի Բալոյանը ինձ տալիս է բարոյական հարց»,- ասաց Վարդան Պետրոսյանը՝ հավելելով, որ պատրաստ է տուժող կողմի ներկայացուցչի հետ խոսել և հանգամանալից ներկայացնել իր վերաբերմունքը դեպքի, երեխաների ծնողների նկատմամբ` բարոյական ասպեկտով:

Հիշեցնենք, Վարդան Պետրոսյանին մեղադրանք է առաջադրվել այն բանի համար, որ նա 2013թ. հոկտեմբերի 20-ին՝ ժամը 22:10–ի սահմաններում իր անձնական օգտագործման «ԲՄՎ-320» մակնիշի մեքենան վարել է Կոտայքի մարզի Սարալանջ գյուղի կողմից դեպի Երեւան քաղաքի ուղղությամբ։ Հասնելով Եղվարդ-Երեւան ավտոճանապարհի 2-րդ կմ հատվածին՝ իրականացրել է ոչ պատշաճ եւ վտանգավոր երթեւեկություն` ավտոմեքենան վարել է բնակավայրում սահմանված թույլատրելի առավելագույնը գերազանցող առնվազն ` 71 կմ/ժ արագությամբ եւ երթեւեկության ընթացքում, միաժամանակ օգտվելով հեռախոսակապից, ինքն իրեն զրկել է ավտոմեքենայի լիարժեք կառավարումն իրականացնելու տեխնիկական հնարավորությունից, թույլ է տվել ՃԵԿ-ի 65 եւ 66 կետերի, ինչպես նաեւ «ճանապարհային երթեւեկության անվտանգության ապահովման մասին» ՀՀ օրենքի 23 հոդվածի 3-րդ կետի, 24 հոդվածի 7-րդ կետի «Զ» ենթակետի պահանջներին հակասող գործողություններ, ստեղծել է վթարային իրադրութուն, որի արդյունքում ավտոմեքենան դուրս է բերել երթեւեկելի մասից դեպի աջ եւ առջեւի մասով ընդհարվել է հողածածկ կողնակում կանգնած վիճակում գտնվող «Վազ 21214» մակնիշի մեքենայի հետեւի մասին: Վթարի հետեւանքով «Վազ -21214» մակնիշի մեքենայի ուղեւորներ էդվարդ Արթուրի Հակոբյանին եւ էդգար Հայկի Հակոբյանին անզգուշությամբ պատճառել է մահ, Տաթեւիկ Արթուրի Հակոբյանի առողջությանը, ծանր վնաս` որպես կյանքին վտագ սպառնացող, Հայկ Մարտիրոսի Հակոբյանի, էմմա Հայկի Հակոբյանի ինչպես նաեւ ավտովարորդ Արթուր Մարտիրոսի Հակոբյանի առողջությանը, միջին ծանրության վնաս` առողջության տեւական քայքայումով: