Փաստ ինֆո

Պահեստազորի գնդապետ Վոլոդյա Ավետիսյանի գործով այսօրվա դատական նիստն անցավ լարված մթնոլորտում։ Դատարան ներկայացած վկա Հենրիկ Հարոյանը հայտարարեց, թե ոչինչ չի հիշում ու ու ոչինչ չգիտի։ Վկան չէր հիշում նաեւ, թե քննիչի մոտ նախաքննություն ընթացքում ցուցմունք տվել է, թե ոչ։ Մեղադրանքը պաշտպանող դատախազ Վարդան Պապիկյանը դատարանին միջնորդեց հրապարակել վկայի՝ նախաքննական ցուցմունքը, ինչին առարկեց պաշտպանական կողմը՝ հայտարարելով, թե ցուցմունքները կարող են հրապարակվել միայն դատաքննական եւ նախաքննական ցուցմունքներում էական հասակություններ լինելու դեպքում  եւ երբ դատակոչված վկայի ներկայությունը հնարավոր չէ ապահովել դատական նիստին։

Խորհրդակցական սենյակից վերադառնալով՝ նիստը նախագահող դատավորը որոշեց հրապարակել նախաքննական ցուցմունքները, ինչն առաջացրեց ամբաստանյալի պաշտպանի, դահլիճում ներկա գտնվող նրա զինակից-ընկերների վրդովմունքը։ Վ.Ավետիսյանի պաշտպան Արա Զաքարյանը հայտարարեց, որ դատարանի այս որոշումը հիմք է դատարանին ինքնաբացարկ հայտնելու համար։ Դատարանն, այնուամենայնիվ, պնդեց, որ նախաքննական ցուցմունքը պետք է հրապարակվի, ինչից հետո դատարանի դահլիճում ներկա գտնվող ամբաստանյալի ընկերներն սկսեցին աղմկել։ Պաշտպան Արա Զաքարյանը հայտարարեց, որ նման պայմաններում չի կարող նիստին ներկա գտնվել եւ հեռացավ նիստերի դահլիճից։ Ապա՝ դատական նիստերի դահլիճից  հեռացավ նաեւ դատավորը։ Նիստերի դահլիճում տիրող աղմուկի պատճառով  չլսվեց, թե նախքան հեռանալն ինչ հայտարարեց դատավորը։

Հիշեցնենք, որ Վ.Ավետիսյանը մեղադրվում է խարդախության մեջ։ Ըստ մեղադրական եզրակացության՝ Վոլոդյա Ավետիսյանը, հանդիսանալով պահեստազորի գնդապետ, չարաշահել է  իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի վստահությունը և վստահեցրել, թե զինվորական բարձրաստիճան պաշտոնատար անձանց միջոցով կարող է կարգավորել  նրա՝ զինծառայության մեջ գտնվող որդուն  նույն զորամասում համակարգչային օպերատոր նշանակելու հարցը։
 
Ըստ քննության՝ չունենալով նման պայմանավորվածություն, 2013թ.հուլիսի 29-ին՝ ժամը 14:00-ի սահմաններում,  Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար, սակայն Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից, որի պատճառով վերջինս իր կամքից անկախ հանգամանքներով հանցագործությունն ավարտին չի կարողացել հասցնել: Մեղադրանքի մեկ այլ  դրվագի համաձայն, Ավետիսյանը «խաբեության և վստահությունը չարաշահելու եղանակով քաղաքացի Հ.Զաքարյանի թոռանը պարտադիր ժամկետային զինվորական ծառայությունից ազատելու հարցում աջակցություն ցույց տալու պատրվակով՝ Հ.Զաքարյանից հափշտակել է 2000 ԱՄՆ դոլար գումար»: 

Վ.Ավետիսյանը չի ընդունում առաջադրված մեղադրանքը։