Փաստ ինֆո

ՕԵԿ քաղխորհրդի նիստի ավարտին այդ կուսակցության ղեկավար կազմի 3 անդամներ` ՕԵԿ խմբակցության ղեկավար Հեղինե Բիշարյանը, ԱԺ պատգամավոր, ՕԵԿ փոխնախագահ Հովհաննես Մարգարյանը և ՕԵԿ պատգամավոր Մհեր Շահգելդյանը հրապարակեցին իշխանական կոալիցիայից դուրս գալու իրենց որոշման որոշ մանրամասներ ու դրդապատճառներ:

Ինչպես նշված է կուսակցության ընդունած հայտարարության մեջ, «Օրինաց երկիր»-ն այլևս խնդրահարույց և աննպատակահարմար է համարում կոալիցիայում համագործակցությունը և դուրս է գալիս կոալիցիայից: Կուսակցությունը նաև փաստում է, որ կոալիցիոն ձևաչափը իրականության մեջ գործել է ոչ արդյունավետ: Արդյունքում «իշխող քաղաքական կոալիցիա» հասկացության փոխարեն լայն շրջանառության մեջ է դրվել գերակա դարձած «իշխող քաղաքական ուժ» հասկացությունը:

««Օրինաց երկիր» կուսակցության քաղաքական խորհրդի գնահատմամբ ՀՀ Նախագահի՝ սահմանադրական բարեփոխումների հանձնաժողովի նիստում արված հայտարարությունը, կենսաթոշակային պարտադիր բաղադրիչի հակասահմանադրականության վերաբերյալ սահմանադրական դատարանի հայտնի որոշումը, կառավարության հրաժարականը, նոր վարչապետի նշանակումը Հայաստանում ստեղծել է նոր քաղաքական իրավիճակ: Երկրի առջև ծառացած ներքին և արտաքին մարտահրավերները պահանջում են ունենալ ժողովրդի հեղինակությունը վայելող կիրթ, կենսունակ, ամուր, նորարարական, բարեփոխումները վճռական քայլերով առաջ մղող կառավարություն: Երկրի դժվարին սոցիալ տնտեսական իրավիճակը, ժողովրդին հուզող բազմաթիվ հիմնախնդիրները թելադրում են արդյունքին միտված, ժամանակակից միջազգային փորձով ամրապնդված մրցունակ կառավարության ծրագրի կենսագործում, որը հնարավորություն կտա կարճ ժամկետներում երաշխավորել տեսանելի արդյունքներ: Կուսակցությունը գնահատելով երկրի Նախագահի և ՀՀԿ-ի հետ կոալիցիայի շրջանակներում իրականացրած գործունեությունը, արձանագրում է, որ անցած 6 տարիների ընթացքում համատեղ ուժերով կյանքի են կոչվել բազմաթիվ ծրագրեր: Այդուհանդերձ ՕԵԿ-ը փաստում է, որ մեզ չի հաջողվում իրականացնել մեր բազմաթիվ նախընտրական ծրագրերը, որի վկայությունը, օրինակ, ավելի քան 2 տասնյակ օրինագծերն են, որոնք տարիներ շարունակ, գտնվելով Ազգային ժողովում, օրենքներ չեն դառնում, չնայած մեր բազմաթիվ քննարկումներին»,-ասված է ՕԵԿ քաղաքական խորհրդի նիստում ընդունված հայտարարության մեջ:

Պատասխանելով լրագրողների հարցերին, թե ինչպես կընկալվի այսուհետ ՕԵԿ-ը որպես ընդդիմադիր ուժ` Հեղինե Բիշարյանը հայտարարեց, թե քաղաքական դաշտի բոլոր ընդդիմադիր ուժերն էլ եղել են նախկին իշխանություններ:

Հարցին, թե միայն ընդդիմության շարքերն անցնելուց հետո է կուսակցությունն ինչ-որ առումով անդրադառնում կուտակային կենսաթոշակային համակարգին և մասնավորապես ՍԴ ընդունած որոշմանը, իսկ մինչ այդ որևէ կերպ չի աջակցել դրա դեմ պայքարողներին, Հեղինե Բիշարյանն արձագանքեց. «կաջակցենք մի անհանգստացեք», ապա ինքն էլ հիշեցրեց, որ ԱԺ-ում ՕԵԿ-ը կողմ է քվեարկել վիճահարույց օրենքին: «Նաև ուզել ենք, որ մեր թոշակառուներն ապագայում ունենան արժանապատիվ կենսաթոշակ ստանալու հնարավորություն, բայց եղել են կուսակցության կողմից առաջարկներ և էլի են լինելու, թե մենք ինչպես ենք տեսնում կուտակայինի ապագա գործընթացները, առավել ևս այն դեպքում, երբ ՍԴ-ը ճանաչեց ոչ սահմանադրական»,- ասաց Հ.Բիշարյանը:

Իսկ լրագրողի հիշեցմանը, թե ՕԵԿ-ը ՀՀԿ-ի հետ տապալեց կուտակայինի հարցով ԱԺ արտահերթ նիստ հրավիրելու առաջարկը, խմբակցության ղեկավարն ասաց. «Մենք որևէ բան չենք տապալել մեր երկրում, մոտեցումների խնդիր է, թե ինչպես ենք մենք մտածել»:

ՕԵԿ քաղխորհրդի որոշումը ապրիլի 25-ին իր ասուլիսում առավել մանրամասն ու հանգամանալից կներկայացնի ՕԵԿ նախագահ Ա.Բաղդասարյանը: Իսկ մինչ այդ այն դեռ պետք է ներկայացվի կուսակցության մարզային ու տարածքային կառույցներին: