Փաստ ինֆո

Պահեստազորի գնդապետ, խարդախության ու խարդախության փորձի մեջ մեղադրվող Վոլոդյա Ավետիսյանի գործով այսօր  հարցաքննվեց  վկա Ալբերտ Մաթոսյանը՝  նա, ըստ մեղադրանքի,  այն անձնավորությունն է, ում որդուն ԼՂՀ պաշտպանության բանակի թիվ N զորամասում համակարգչային օպերատոր նշանակելու հարցը կարգավորելու համար Վոլոդյա Ավետիսյանը  պահանջել է 500 ԱՄՆ դոլար:

Վկան հայտնեց, որ 2013թ. հունիսին իր որդին զորակոչվել է բանակ,  իրենք գոհ չեն  եղել ծառայության պայմաններից, բացի այդ,  զորամասը շատ հեռու է գտնվել, ուստի որոշել են,  որ որդին այլ զորամասում ծառայի: Վկայի կնոջ ընկերուհին՝ տեղեկանալով այդ մասին,  նրանց հայտնել է, որ իր մորաքրոջ որդին՝ Վոլոդյա Ավետիսյանը, կարող է նրանց օգնել և նրանց տվել է  Ավետիսյանի հեռախոսի համարը:

Վկան զանգահարել է և խոսել Վոլոդյա Ավետիսյանի հետ, պայմանավորվել են հանդիպել, սակայն այլ զորամաս տեղափոխելու վերաբերյալ ամբաստանյալը վկային ասել է, որ այդ հարցը միայն Պաշտպանության նախարարը կարող է լուծել և որ ինքը չի կարող օգնել և առաջարկել է նույն զորամասում վկայի որդուն համակարգչային օպերատոր նշանակել:

Վկան նշեց, որ  կնոջ ընկերուհին իրենց փոխանցել է, որ այդ գործի համար 500 դոլար է պահանջվում:

Դատարանի այն հարցին, թե Օպերայի շրջակա տարածքում վկայի և ամբաստանյալի հանդիպման ժամանակ գումարի մասին խոսակցություն եղե՞լ է, վկան պատասխանեց, որ «կարելի է ասել՝    չի եղել»:

Նախագահող դատավոր Լևոն Ավետիսյանը կատակեց «Ձեր ասած, մի քիչ հղիի տարբերակն է՝ կամ խոսք եղե՛լ է, կամ ո՛չ»: Դրան ի պատասխան վկան հայտարարեց, որ գումարի մասին խոսք չի եղել:

Նախաքննական ու դատաքննական ցուցմունքների միջև էական հակասությունների պատճառով հրապարակվեց վկայի նախաքննական  ցուցմունքը, համաձայն որի, երբ վկան և Վոլոդյա Ավետիսյանը հանդիպել են, վերջինս ասել է, որ նա խոսել է վերադաս հրամանատարության հետ, որ նրանք կարող են վկայի որդուն նույն զորամասում համակարգչային օպերատոր նշանակել,  ինչի  դիմաց վկայից պահանջել է 500 ԱՄՆ դոլար: Բացի այդ, ըստ նախաքննական ցուցմունքի, Վոլոդյա Ավետիսյանը վկային ասել է, որ «այդպիսի գործը 500 ԱՄՆ դոլարով չեն անում և որ դա ավելի թանկ արժի, սակայն իր խաթեր համար համաձայնվել են»:

Վկան նախաքննական ցուցմունքում նշել  էր նաև, որ ինքը Վոլոդյա Ավետիսյանի պահվածքից հասկացել է, որ նա իրենից գումար է ակնկալում և, չցանկանալով նրան նեղացնել,  ասել է,  որ կմտածի:

Վկան նախաքննական և դատաքննական ցուցմունքների միջև հակասությունը բացատրեց նրանով, որ դատարանում ուղղակի հակիրճ է ներկայացրել:

Վոլոդյայի և վկայի հանդիպման հաջորդ օրը վկայի որդին զանգահարել է և ծնողներին տեղեկացրել, որ նրան տեղափոխել են այլ զորամաս և  ինքը շատ գոհ է: Ըստ վկայի՝ որդուն այլ զորամաս տեղափոխելու պատճառները իրեն հայտնի չեն: Նա կարծում է, որ հավանաբար հաշվի են առել նրա ստացած  բարձրագույն կրթությունը:

Վկան նշեց, որ ինքը 3 անգամ գտնվել է Ռազմական ոստիկանությունում, ընդ որում, առաջին անգամ այնտեղ գտնվել է 3 ժամից ավել, սակայն իրենից գրավոր ցուցմունք չեն վերցրել: Վկան հայտարարեց, որ ցուցմունք տալու ժամանակ ներկա է գտնվել նաև մեղադրող դատախազը:

Վկայի կինը՝ Անժելա Պողոսյանը նշեց, որ որդու բանակ զորակոչվելն  իրենց համար անսպասելի էր, քանի որ իր որդին լավ է սովորել և արժանի չէր այդ զորամասում ծառայելու: Բացի այդ վկան նշեց, որ ինքն է ստիպել ամուսնուն, որպեսզի ինչ-որ բան անի, որ տղային այլ զորամաս տեղափոխեն:

Վկան հայտարարեց, որ Ռազմական ոստիկանության աշխատակիցները իրենց տուն են գնացել մոտավորապես ժամը 19.00 –ի սահմաններում և իրենց տարել Ռազմական ոստիկանություն, որտեղ մնացել են մինչև ժամը 1.50: Այս վկան ևս հայտնեց, որ մեղադրող դատախազն իր ցուցմունքի ավարտին ներկա է գտնվել:

Ինչպես և նախորդ վկայի դեպքում, այս  դեպքում էլ  դատարա՛նը հայտարարեց նախաքննական ցուցմունքների հետ  էական հակասությունների առկայության մասին, ինչը պաշտպանական կողմի մոտ տպավորություն ստեղծեց, որ «այս գործով կա պաշտպանական կողմ և 2 մեղադրական կողմ»:

Վկայի նախաքննական մարմնին տված ցուցմունքը հրապարակելիս պարզ դարձավ, որ վկային հարցաքննությունը սկսել է ժամը 19.10 և ավարտվել ժամը 21. 20-ին:

Վկա Անահիտ Մաթոսյանն էլ նշեց, որ իր ծնողներից է տեղեկացել Վոլոդյա Ավետիսյանի և այլ մանրամասների մասին:

Դատարանը որոշեց պատշաճ ծանուցված, սակայն դատարան չներկայացած ևս 6 վկաների բերման ենթարկել:

Դատարանի սահմանած ապացույցների հետազոտման կարգի համաձայն,  վկաների հարցաքննությունից հետո կհետազոտվեն գործում առկա գրավոր ապացույցները,  վերջում կհարցաքննվի ամբաստանյալը: