Փաստ ինֆո

Կդառնա՞ ՕԵԿ-ն ընդդիմություն,  կամ կհամալրի՞ ոչ իշխանական ուժերի շարքերը թե կշարունակի մնալ իշխանություն՝ հարցի պատասխանը կուսակցության ղեկավարությունը խոստացել է հրապարակել այսօր երեկոյան` ՕԵԿ քաղխորհրդի նիստի ավարտին:

Իսկ մինչ այդ ՕԵԿ առաջնորդ Արթուր Բաղդասարյանի` ԱԱԽ քարտուղարի պաշտոնից և ՕԵԿ նախարարների` կուսակցական մանդատներից հրաժարվելու մասին մամուլում լուրերը գնալով ավելի համառ են դառնում:

Կուսակցությունում այս հարցերի շուրջ շարունակում են լռություն պահպանել. Կուսակցության առաջնորդների հեռախոսները լռում են, իսկ նախարարների մամուլի քարտուղարներն անհասանելի են դարձել լրագրողների համար:

Հիշեցնենք, ըստ շրջանառող լուրերի, իրավիճակը կուսակցությունում բավական լարված է։ Ըստ այդմ, կուսակցության առաջնորդ Արթուր Բաղդասարյանը, ով, նաև ՕԵԿ փոխնախագահ Հեղինե Բիշարյանի հայտարարությունից դատելով, վարչապետի աթոռը ստանալու հավակնություն ուներ, Հովիկ Աբրահամյանի նշանակումից հետո որոշել է դուրս գալ իշխանական կոալիցիայից: Իսկ ՕԵԿ-ական նախարարներն իրենց պաշտոնները պահպանելու նպատակով, ըստ դեռևս ճշտված լուրերի, որոշել են դուրս գալ կուսակցությունից և արդեն իսկ դիմումներ են գրել:

Ի դեպ, հիշեցնենք, որ ՕԵԿ-ի քվոտայով գործադիրում երեք նախարար է նշանակվել՝  Քաղաքաշինության և գյուղատնտեսության նախարարները, ԱԻ նախարար Արմեն Երիցյանը:

Ինչ վերաբերում է ԱԱԽ քարտուղարի պաշտոնում Արթուր Բաղդասարյանի մնալ-չմնալուն, ապա նշենք, որ այդ պաշտոնը կառավարության կազմում ընդգրկված չէ, և նույնիսկ իրեն ոչ իշխանական հռչակված ԲՀԿ-ի առաջնորդ Գագիկ Ծառուկյանը ժամանակին չհրաժարվեց ԱԱԽ անդամի իր պաշտոնից: Ուստի չի բացառվում, որ նույնիսկ ՕԵԿ-ի կոալիցիա չկազմելու պարագայում Արթուր Բաղդասարյանը ևս հետևի իր գործըկերոջ օրինակին և պահպանի պաշտոնը:

ՕԵԿ-ում բոլոր հեռախոսները լռում են, իսկ հրաժարականների մասին խոսակցությունները ձնագնդի նման մեծանում։