Փաստ ինֆո

Զոքանչին ծեծելու մեջ մեղադրվող ամբաստանյալին դատարանն այսօր որոշեց բերման ենթարկել։

Կնոջ մորը ծեծելու մեջ մեղադրվում է 44-ամյա Զավենը, ով այսօր չէր ներկայացել իր իսկ գործով դատական նիստին։ Նշենք, որ գործը քննվում է  Ավան և Նոր- Նորք վարչական շրջանների ընդհանուր իրավասության դատարանում։

Մեղադրանքը պաշտպանող դատախազ Մկրտիչ Ենգիբարյանը միջնորդեց ամբաստանյալի նկատմամբ բերման ենթարկելու որոշում կայացնել, որին չառարկեց նաեւ  զոքանչը:

«Փաստինֆո»-ն ավելի վաղ տեղեկացրել է, որ ըստ մեղադրանքի՝ 44-ամյա Զավենը 2013թ. դեկտեմբերի 26-ին՝ ժամը 22:00-ի սահմաններում, իրենց տանը կենցաղային հարցերի շուրջ տեղի ունեցած վիճաբանության ընթացքում, ձեռքերով և ոտքերով հարվածներ է հասցրել կնոջ մոր դեմքին և մարմնի տարբեր մասերին։
 
Փորձագետների եզրակացությամբ՝ կնոջը պատճառվել է թեթև վնաս՝ առողջության կարճատև քայքայումով:
 
Փեսային մեղադրանք է առաջադրվել ՀՀ քրեական օրենսգրքի 117-րդ  հոդվածով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:
 
 Ի դեպ, նշենք, որ 44-ամյա տղամարդը նախկինում արդեն մեկ անգամ խնդիր ունեցել է օրենքի հետ եւ դատվել է, սակայն այդ դատվածությունը մարվել է։