Փաստ ինֆո

ՄԻՊ տարեկան` 2013թ-ի զեկույցի Երևանի քաղաքապետարանի գործունեությանն առնչվող հատվածում պաշտպանն անդրադարձել է անցած տարվա ընթացքում հասարակական հնչողություն ստացած մի շարք հարցերի:

Դրանիցից առաջինը քաղաքային տրանսպորտի սակագինը բարձրացնելու խնդրն է:

Պաշտպանը նշում է, որ այս հարցի շուրջ նախապես չեն կազմակերպվել հանրային քննարկումներ, չէին ներկայացվել սակագնի բարձրացման բավարար հիմքերը և հնարավոր այլընտրանքային լուծումները, ինչն առաջացրել էր հանրության հիմնավոր վրդովմունքը: Քաղաքապետարանի կողմից սակագնի փոփոխման մասին որոշման նախագիծը նույնիսկ Քաղաքապետարանի կայքէջում տեղադրված չի եղել:

Պաշտպանի կարծիքով, լուրջ թերացումներով է ներդրվել նաև Երևանում մեքենաների կայանատեղերի համակարգը: «Անձինք 1 ժամից պակաս կայանելիս՝ ստիպված են եղել վճարել 1 ժամվա կայանման գումար, չեն նախատեսվել անվճար հատուկ կայանատեղեր հաշմանադամություն ունեցող անձանց համար, ինչպես նաև չէին կազմակերպվել հանրային քննարկումներ»,-ասված է պաշտպանի զեկույցում:

Ըստ ՄԻՊ-ի, քաղաքապետարանը բավարար միջոցներ չի ձեռնարկիել նաև Փակ շուկայի ապօրինի շինարարությունը կանխելու համար, թեև դեռևս 2012 թվականից հասարակությունը մտահոգված էր այդտեղ  ինքնակամ շինարարական աշխատանքների իրականացմամբ: ՄԻՊ-ը հիշեցնում է, որ քաղաքապետարանի կողմից հայտնվել էր, որ շինության ծավալատարածական լուծումները պետք է պահպանվեն և պատմամշակութային հուշարձանի արտաքին տեսքը չպետք է խախտվի, սակայն կառուցապատողի կողմից փաստացի իրականացվել է շենքի նոր հարկերի կառուցում` խախտելով հուշարձանի ծավալային չափերը: Ու թեև քաղաքապետարանը բազմիցս հայտնել էր, որ նշված տարածքում իր կողմից իրականացվում է համապատասխան հսկողություն, այնուամենայնիվ, շուկայում ինքնակամ շինարարությունն ամբողջությամբ իրականացվեց:

ՄԻՊ-ն անդրադառնում է նաև Կոմիտաս 5 հասցեում տարիներ առաջ սկսված, իսկ վերջին ամիսներին` նույն հասցեում վերսկսված շինարարությանը: «Քաղաքապետարանը կառուցապատողին շինարարության թույլտվություն տալիս պատշաճ ուսումնասիրության չի ենթարկել կառուցապատողի կողմից ներկայացված նախագծային փաթեթները»,-եզրակացնում է պաշտպանը:

ՄԻՊ-ը քաղաքային իշխանությունների մեղադրում է նաև Նելսոն Ստեփանյանի անվան մանկական զբոսայգում այլասերվածությունը վերացնելու ուղղությամբ միջոցներ չձեռնարկելու համար, մասնավորապես` չլուսավորվելու և այգու շրջակայքը չցանկապատելու, ինչպես նաև այգու մուտքը գիշերային ժամերին չփակելը: Արդյունքում մի շարք անձինք մանկական զբոսայգում պարբերաբար զբաղվում են պոռնկությամբ, սեռական հարաբերություններ ունենում, և երեկոյան ժամերին զբոսայգի այցելելն ուղղակի անհնար է դառնում:

ՄԻՊ-ն անդրադարձել է նաև քաղաքապետարանի ենթակայության ներքո գտնվող մի շարք մանկապարտեզների գերբեռնվածության խնդրին` հիշեցնելով, որ խմբերում երեխաների առավելագույն թիվը չի կարող գերազանցել 30-ը: «Երևանի բյուջեով 2013 թվականին նոր մանկապարտեզներ հիմնելու ծախսեր նախատեսված չեն: Նշվածը վկայում է, որ Քաղաքապետարանը հետաքրքրված չէ հասարակության մեջ լայն տարածում գտած հարցին վերջնական և արդյունավետ լուծում տալուն: Այնինչ, 2013 թվականին շարունակվում էին բողոքները այն մասին, որ 30 երեխայի համար նախատեսված սենյակներում քնում է 40, իսկ երբեմն էլ 40-ից ավել երեխա: Լինում են դեպքեր, երբ երեխաները քնում են հերթափոխով կամ երեխաների մի մասը չի քնում»,-հայտնում է ՄԻՊ-ը` հավելելով, որ  ներկայում ևս 5900 երեխա հերթագրված է մանկապարտեզ գնալու համար: Բայց, չնայած դրան, հենց քաղաքապետարանի պաշտոնական տեղեկատվության համաձայն, 30 մանկապարտեզների շենքերից տարածքներ տրվել են վարձակալության կամ անհատույց օգտագործման, ընդ որում` Երևանի նախկին թաղային համայնքների ավագանիների, թաղապետերի որոշումներով:

«Քաղաքապետարանը քաղաքի ծայրամասերում գտնվող կիսաքանդ փողոցները ասֆալտապատելու փոխարեն կրկնակի ասֆալտապատել է կենտրոնական փողոցները, չնայած դրանց բարեկարգ վիճակին»,-գրում է Մարդու իրավունքների պաշտպանը` միաժամանակ արձանագրելով, որ ձնամաքրման աշխատանքները ևս սահմանափակվել են կենտրոնական փողոցներով:

Իսկ ինքնակամ շինությունների օրինական կամ անօրինական լինելը որոշելու հարցում ՄԻՊ-ը կոռուպցիոն ռիսկեր է նկատում: «Շինությունները ինքակամ որակելու և հետագայում օրինական ճանաչելու համատեքստում, Քաղաքապետարանին տրված է չափազանց լայն հայեցողություն, որն իր հերթին առաջացնում է երկակի ստանդարտների կիրառման իրական ռիսկ: Գտնում ենք, որ նշված գործառույթը պետք է հստակ կանոնակարգված և թափանցիկ լինի»,- ասված է զեկույցում:

ՄԻՊ-ը անդրադառնում է նաև հաշմանդամների խնդրին: Մասնավորապես նշվում է, որ հաշմանդամություն ունեցող անձանց համար անմատչելի են մնում վարչական ու հասարակական նշանակության շենքերը, դեպրոցների հիմնական մասը:

Իսկ կառուցված թեքահարթակներից շատերից օգտվելն ուղղակի ահնար է, քանի որ դրանց թեքության աստիճանը չափազանց մեծ է, կամ կառուցված են սահմանված նորմերի խախտմամբ: