Փաստ ինֆո

Վերաքննիչ քրեական դատարանն  այսօր  մերժեց  Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանության պատվերի գործով պաշտպանական ու մեղադրանքի կողմերի բողոքները:

Վերադաս դատարանն անփոփոխ թողեց Երևանի Մալաթիա-Սեբաստիա վարչական շրջանի դատարանի  09.12.2013թ. դատավճիռը, որով   Ստեփան Հակոբյանը մեղավոր է ճանաչվել ՀՀ քրեական օրենսգրքի 38-104-րդ  հոդվածի 2-րդ մասի 8-րդ կետով՝ շահադիտական դրդումներով, պատվերով սպանության կազմակերպում, և դատապարտվել 15 տարվա ազատազրկման: Նշենք, որ Ս.Հակոբյանը ԱԺ նախկին պատգամավոր Հակոբ Հակոբյանի, ով առավել հայտնի է «Լեդի Հակոբ» մականունով, եղբորորդին է։
 
Ըստ տուժողի իրավահաջորդի ներկայացուցչի՝ նշանակված պատժաչափը չի համապատասխանում հանցագործության հանրային վտանգավորության աստիճանին և հանցագործության ծանր հետևանքներին. տուժող կողմը զրկվել է ոչ միայն հարազատից, այլև՝ ընտանիքի միակ կերակրողից: Ըստ տուժող կողմի ներկայացուցչի՝ ամբաստանյալի նկատմամբ պետք է նշանակվեր հոդվածով նախատեսված առավելագույն խիստ պատիժ՝ ցմահ ազատազրկում:
 
Իսկ ամբաստանյալ Ստեփան Հակոբյանի պաշտպան Երեմ Սարգսյանը միջնորդում էր   իր պաշտպանյալին ճանաչել անպարտ և արդարացված կամ բեկանել նույն դատարանի՝ 06.03.2013թ.` ինքնաբացարկի միջնորդությունը մերժելու մասին որոշումը, բավարարել այն և գործն ուղարկել համապատասխան ստորադաս դատարան` նոր քննության: Մերժելու դեպքում պաշտպանը միջնորդում է մասնակիորեն բեկանել և փոփոխել դատավճիռը և Ստեփան Հակոբյանի նկատմամբ նշանակել առավել մեղմ պատիժ:
 
Ըստ պաշտպանի՝ մեղադրանքը հիմնավորված ու ապացուցված չէ, նախաքննական մարմինը կամայականորեն է գործել և արդյունքում նախաքննությամբ ու դատաքննությամբ թույլ են տրվել Մարդու իրավունքների եվրոպական կոնվենցիայի, ՀՀ սահմանադրության ու քրեական դատավարության օրենսգրքի խախտումներ, որոնք ազդել են գործի ելքի վրա և խաթարել բուն արդարադատության էությունը:
 
Մասնավորապես, ըստ պաշտպանի, 2007թ. սեպտեմբերի 1-ից հետո նախաքննության մարմնի կայացրած որոշումները, ձեռք բերած ապացույցներն ու ինքնին մեղադրական եզրակացությունն ապօրինի են, քանի որ հիշյալ ժամանակահատվածից սկսած՝ չեն երկարացվել նախաքննության ժամկետները: Որպես ապացույց են դիտվել հեռախոսային համարների ելքային ու մուտքային զանգերի վերծանումները, որոնք ձեռք են բերվել օրենքի խախտմամբ՝ առանց դատարանի համապատասխան որոշման: Դատարանը խախտել է արդար դատաքննության և անմեղության կանխավարկածի սկզբունքները՝ բուն սպանության գործով դեռևս 2007թ. դատավճռով հաստատված համարելով Ստեփան Հակոբյանի մեղադրանքը:    
 
Երեմ Սարգսյանը «Փաստինֆո»-ի թղթակցին հայտնեց, որ  Վերաքննիչ դատարանի որոշումը բողոքարկելու է Վճռաբեկ դատարան:  
 
Հիշեցնենք, որ Սեդրակ Զատիկյանն սպանվել է 2006թ. հունիսի 22-ին` Սեբաստիա փողոցում: Արձակված կրակահերթից մահացել էր նաև պատահական մի անցորդ՝ երեք անչափահաս երեխաների մայր Կարինե Սարգսյանը: