Փաստ ինֆո

«ՄԻՊ 2013 թվականի զեկույցում որպես «թերություններ» մատնանշվել են խնդիրներ, որոնց մի մասում, օրենքը  յուրովի մեկնաբանելու արդյունքում, հանգել են եզրակացության, ըստ որի քաղաքապետարանի գործունեությունը որակվել է որպես թերացում: Որոշ դեպքերում էլ ակնհայտորեն անտեսվել է կատարած աշխատանքը, այդպիսով թերևս փորձելով առավել «հնչեղ» դարձնել ներկայացված զեկույցը»,- Երևանի քաղաքապետարանն այսպես է արձագանքել ՄԻՊ գրասենյակի հրապարակած զեկույցին։ Հիշեցնենք, որ զեկույցում մատնանշվել էին քաղաքային իշխանության 2013թ-ի գործունեության ընթացքում հայտնաբերված մի շարք թերություններ` քաղաքային տրանսպորտի սակագինը բարձրացնելը, մեքենաների վճարովի կայանատեղերի ներդնելը, Փակ շուկայի և Կոմիտաս 5 հասցեում բողոքներով ուղեկցվող շինարարությունները, Նելսոն Ստեփանյանի անվան մանկական զբոսայգում տիրող այլասերվածությունը, մանկապարտեզների գերբեռնվածությունը, կենտրոնական փողոցների պարբերաբար ասֆալտապատելու և ծայրամասերի ավերված փողոցների համադրությունը, ինքնակամ շինությունների ու հաշմանդամների համար կառուցվող թեքահարթակների հարցերը:

Ինչ վերաբերում է տրանսպորտի սակագնին, ապա քաղաքապետարանը նշում է, որ որոշման վերաբերյալ հանրային քննարկումներ չկազմակերպելու պատճառն օրենսդրական նման պահանջի բացակայությունն է եղել:

«Միաժամանակ, հնարավոր չէ չնկատել, որ խնդրի առնչությամբ Երևանի քաղաքապետարանի հետագա բոլոր գործողությունները ուղղված են եղել խնդրի հնարավորին հրապարակային ներկայացմանը, թափանցիկության ապահովմանը և բնակչության իրազեկվածության աստիճանի բարձրացմանը»,- ասված է քաղաքապետարանի պատասխանում: Իսկ ավտոմեքենաների կայանատեղերի համակարգի ներդրման հետ կապված ՄԻՊ եզրահանգումները քաղաքապետարանը որակում է օրենքի յուրովի մեկնաբանության արդյունք: Գալով մանկական զբոսայգում տիրող վիճակին, քաղաքապետարանը տարակուսանք է հայտնում, թե «հասարակությանը հուզող գլոբալ խնդիրը չգիտես ինչու կապվում է տեղական ինքնակառավարման մարմնի գործունեության հետ»։

Իսկ մանկապարտեզների գերբեռնվածությունն ու սահմանված թվից շատ երեխաների առկայությունը խմբերում, քաղաքապետարանի կարծիքով, չի կարող ազդել երեխաների խնամքի վրա: Ինչ վերաբերում է նախկին թաղային համանքների ավագանիների համապատասխան որոշումներով մանկապարտեզների տարածքների վարձակալության տրամադրման խնդրին, ապա այս հարցն, ըստ քաղաքապետարանի, իր օրենսդրական և իրավական լուծումը կարող է ստանալ միայն վարձակալության պայմանագրի ժամկետի ավարտից հետո։

Գալով կենտրոնական փողոցների կրկնակի ասֆալտապատման հարցին, քաղաքապետարանը գրում է. «որևէ փողոց կրկնակի չի ասֆալտապատվել, իսկ մայրաքաղաքի փողոցները՝ անկախ դրանց տեղաբաշխման վայրից,  յուրաքանչյուր տարի ասֆալտապատման ծրագրերում ընգրկվում են՝ ելնելով դրանց բարեկարգման աստիճանից և ծանրաբեռնվածությունից, մասնագիտական խմբի համապատասխան դիտարկումների արդյունքում։ Այս առումով ՄԻՊ գրասենյակի եզրակացությունները մասնագիտական որևէ խորքային վերլուծություն չեն պարունակում»։ Թեքահարթակների խնդիրն էլ քաղաքապետարանի մեկնաբանմամբ, այսօր չի առաջացել, բայց քաղաքապետարանը դրա հնարավորին արագ կարգավորումը համարում է իր գերակա ուղղություններից մեկը:

Հատկանշական է, որ ՄԻՊ զեկույցում արծարծված Փակ շուկայի, Կոմիտաս 5 հասցեում ապօրինի շինարարությունների հարցը քաղաքապետարանի արձագանքում ընդհանրական ձևակերպումով է ներկայացված:

«Մայրաքաղաքում ապօրինի շինարարությունը կանխելու համար քաղաքապետարանը բոլոր օբյեկտների նկատմամբ ձեռնարկել և ձեռնարկում է օրենսդրությամբ իրեն վերապահված միջոցները՝ առանց որևէ բացառության։ Ինչ վերաբերում է շինթույլտվության տրամադրման ընթացակարգի վերաբերյալ ՄԻՊ-ի որակավորմանը, ապա հայտարարում ենք, որ դրանք տրամադրվել և տրամադրվում են օրենսդրությանը համապատասխան՝ քաղաքաշինական նորմերի պահպանմամբ»,-ասված է քաղաքապետարանի տարածած հաղորդագրության մեջ: