Փաստ ինֆո

Մադրիդի «Ռեալի» հետ Չեմպիոնների լիգայի քառորդ եզրափակիչ փուլի առաջին հանդիպումից առաջ Հենրիկ Մխիթարյանը պատասխանել է իսպանական AS հանդեսի թղթակցի հարցերին:

-Հետևել ե՞ք «Ռեալի» խաղին:

-Այո, թիմի լավագույն տարիներին, երբ խաղում էին Ռաուլը, Զիդանը, որը մեծագույն կիսապաշտպան է:

-Ճիշտ է՞, որ Զիդանը ձեր մանկության կուռքն է:

-Միանգամայն ճիշտ է: Սիրում էի նրա խաղը ու ոգևորվում դրանից:

-Այսինքն, փորձում եք ընդօրինակե՞լ նրան:

-Երբեք չեք փորձել դա անել, քանզի ուրախ եմ սեփական խաղաոճն ունենալու համար:

-Հեշտությա՞մբ համակերպվեցիք «Բորուսիայի» խաղին:

-Ժամանակ պահանջվեց «Բորուսիային» և բունդեսլիգային ընտելանալու համար: Անցկացրեցի մի քանի շատ լավ խաղ, իսկ հետո ոչ այնքան լավը: Բայց գիտեմ, որ կարող եմ ավելի լավ հանդես գալ:

-Դժվար է՞ր հասնել նրան, որ ձեզ դադարեն համեմատել դորտմունդցիների երբեմնի առաջատար Գյոտցեի հետ:

-Մարիոն ֆանտաստիկ խաղացող է, բայց, այնուհանդերձ, մենք շատ տարբեր ենք: Տեսնում եմ, որ մարդիկ հաճախ են համեմատության եզրեր անցկացնում: Իսկ ահա հանդիսատեսը հասկանում է ֆուտբոլից: Նրանք համբերատար են և ինձ օգնեցին ընտելանալ նոր իրավիճակին: Հուսով եմ, ժամանակի ընթացքում կկարողանամ լիարժեք փոխհատուցել այդ համբերատարության համար: «Բորուսիան» աներևակայելի ակումբ է, իսկապես երազանք է ինձ համար: Զուգադիպություններին չեմ հավատում, բայց Հայաստանում, 11 տարեկանում, կրել եմ «Բորուսիայի» մարզաշապիկը, թեկուզև չինական արտադրության:  

-Երբևէ խաղացել ե՞ք «Բեռնաբեու» մարզադաշտում:

-Առաջին անգամ է, և անհամբերությամբ սպասում եմ այդ մթնոլորտում ընկղմվելուն: Մենք ընտելացել ենք «Սիգնալ Իդունա պարկ» մարզադաշտի անհավանական մթնոլորտին: Շատ ուրախ ենք Մադրիդի այս լեգենդար մարզադաշտում լինելու համար: Ամեն օր նման հնարավորություն չի ընձեռվում:

-Ի՞նչ լավ խորհուրդ է տվել ձեզ Յուրգեն Կլոպը:

-(Ծիծաղում է): Նա գժվում է ֆուտբոլի համար՝ ոտքից գլուխ խաղի մեջ է: Դա նրան լավագույնս է բնորոշում, որպես մարզիչ: Ամեն օր մի նոր բան եմ իմանում նրանից, բայց, եթե մանրամասնեմ, ապա ձեր հոդվածը չի բավականացնի դա ներկայացնելու համար: