Փաստ ինֆո

Այսօր ԱԺ պետական-իրավական հարցերի մշտական հանձնաժողովը խորհրդարանական լսումներ էր կազմակերպել` «Վիրավորանքը և զրպարտությունը համացանցում առկա հիմնախնդիրները և առաջարկվող օրենսդրական լուծումները» թեմայով:

Լսումների կազմակերպման նպատակն է հրապարակային քննարկման արդյունքում վեր հանել ոլորտում առկա հիմնախնդիրները, դրանց պատճառները և քննարկել հնարավոր օրենսդրական նախաձեռնությունը, քանի որ, այսպես կոչված, «Ֆեյքերի մասին» պայմանական անվանումն ստացած օրինագիծն արդեն իսկ բուռն քննարկումների առիթ է դարձել:

Պետաիրավական հարցերի հանձնաժողովի նախագահ Դավիթ Հարությունյանն այսօր նշեց, որ նախագծի շրջանառության մեջ դնելը դեռ չի նշանակում, թե ամեն ինչ ավարտված է, այլ, հակառակը՝ սրանով դեռ նոր են սկսվում քննարկումները շահագրգիռ կողմերի հետ:

«Ինտերնետային լրատվամիջոցների եւ սոցցանցերի սրընթաց զարգացումն ստիպել է քննարկել դրանցում առկա վիրավորանքներն ու զրպարտությունները»,- ասաց նա՝ հավելելով, որ նախագծի հեղինակները ոչ թե խնդիր են դրել սահմանափակել ԶԼՄ-ների գործունեությունը, այլ՝ «առկա խնդիրները մտցնել ողջամիտ, բալանսավորված դաշտ»:

Մինչդեռ, լրագրողական կազմակերպությունները պնդում են, որ օրինագիծը պետք է ընդհանրապես հանվի շրջանառությունից։

Խոսքի ազատության պաշտպանության կոմիտեի ղեկավար Աշոտ Մելիքյանն այսօր լսումների ընթացքում կարծիք հայտնեց, թե նախագիծը վտանգավոր է լրատվամիջոցների համար:

«Շատ գործիչներ զրպարտանք են համարում այնպիսի տեղեկություններ, որոնք բոլորովին էլ վիրավորանք ու զրպարտություն չեն։ Այսինքն՝ ստացվում է, որ մարդիկ, որոնք քննադատությունը սվիններով են ընդունում, միանգամից զանգելու են ու պահանջեն հեռացնել մեկնաբանությունները, ապա դիմելու են դատարան։ Լրատվամիջոցը ստիպված է լինելու առավոտից երեկո մեկնաբանություններին հետեւել ու հասկանալ, թե որքանով են մեկնաբանությունները զրպարտություն պարունակում, որքանով՝ ոչ»,- նշեց բանախոսը:

Մյուս կողմից, ըստ Աշոտ Մելիքյանի, օրենքի նախագծի առաջարկած կարգավորումներն իրականում անիմաստ են, քանի որ նման կարգավորման հնարավորություն ներկա օրենսդրական դաշտն արդեն իսկ տալիս է:

«Այդ բոլոր խնդիրները գործող օրենսդրությամբ կարելի է լուծել։  Մասնավորապես՝ դիմել խմբագրությանը, պահանջել, որ զրպարտչական մեկնաբանությունը հեռացվի, հակառակ դեպքում դիմել դատարան»,-ասաց նա՝ հավելելով, թե այս օրենքի ընդունման դեպքում Հայաստանում մեծանալու է գրաքննությունը։

Սակայն Դավիթ Հարությունյանն այս տեսակետը չընդունեց: Նրա կարծիքով՝ նման տեսակետները նախագծի ոչ ճիշտ մեկնաբանության հետևանք են:

«Ակնհայտ է, որ ոչ բոլորն են հասկացել մեր առջեւ դրված հիմնական խնդիրները: Քննարկումներն այլ ուղով են գնացել, քննարկվել են նախագծում տեղ չգտած նորմեր ու թյուրընկալումների տեղիք տվել»,- հայտարարեց ԱԺ պետական-իրավական հարցերի մշտական հանձնաժողովի նախագահը, ով, հիշեցնենք, նաև այս օրենքի համահեղինակն է:

Դավիթ Հարությունյանից բացի խնդրահարույց օրինագիծը հեղինակել են ԱԺ պատգամավորներ Արփինե Հովհաննիսյանը, Թեւան Պողոսյանը, Էլինար Վարդանյանը, Նաիրա Զոհրաբյանը, Հեղինե Բիշարյանը, Էդմոն Մարուքյանը, Ստեփան Դեմիրճյանը, Արմեն Ռուստամյանը և Գագիկ Ջհանգիրյանը: