Փաստ ինֆո

Արդարադատության նախարար Հրայր Թովմասյանն այսօր կառավարության նիստից հետո, անդրադառնալով ավտոճանապարհներին տեղադրված տեսախցիկների խնդրին, հայտարարեց, որ դրանց օգնությամբ բացահայտված հանցագործությունների թիվը տարեցտարի աճում է:

«Եթե ՀՀ տարածքում 2012թ-ին տեսադիտարկման սարքերի օգնությամբ բացահայտվել է հանցագործության 49 դեպք, որոնցից 2-ն առանձնապես ծանր, ապա 2013թ-ին այդ թիվն աճել է գրեթե կրկնակի` հասնելով 96-ի, որոնցից 4-ը առանձնապես ծանր հանցագործության դեպքեր են»,- ասաց Հրայր Թովմասյանը:

Ինչ վերաբերում է այս տարվա ընթացքում տեսախցիկների օգնությամբ բացահայտված հանցագործությունների դեպքերին, ապա, նախարարի խոսքով միայն անցնող 2 ամսվա ընթացքում արդեն 17 դեպք է բացահայտվել, որոնցից մեկը` մահվան ելքով ՃՏՊ է:

Ի դեպ, քանի որ ավելի շատ թվով տեսախցիկներ, այդ թվում նաև մասնավոր անձանց կողմից, տեղադրվում են Երևանի Կենտրոն համայնքում, ապա, ըստ նախարարի, այս վարչական տարածքում գրանցված հանցագործությունները էապես նվազել են:

«Անցած ամիս դուք մի սպանության դեպքի մասին տեղեկացաք, որը հեռուստատեսությամբ լուսաբանվեց, կարծում եմ պատկերն ակնհայտ է, թե բացահայտմանն ինչպես են օգնել տեսաձայնագրող սարքերը»,- ասաց նախարարը` հավելելով. «սա ասում են նաև ոստիկանության մեր գործընկերները, որ բացահայտման հնարավորությունները ձգտում էր զրոի, եթե չլինեին այս տեսաձայնագրող սարքերը»:

Հրայր Թովմասյանն, ըստ ամենայնի, նկատի ունի քրեական հեղինակություն Թևոսիկի եղբոր՝ Արթուր Սաֆարյանի սպանության գործը: Հիշեցնենք, գործի  նախաքննությունը դեռ չավարտված Ոստիկանությունը հեռուստատեսային ռեպորտաժի շրջանակներում հայտարարեց, որ սպանությունը կատարել է Մովսես Ներսիսյանը` Իսրայել Սարգսյանի պատվերով: Իսկ արդեն սպանությունը կատարելուց հետո պատվիրատուն սպանել է նաև կատարողին` Մովսես Ներսիսյանին: Ընդ որում այս եզրակացությունների համար վկայակոչվում էին  երևանյան տարբեր փողոցներում տեղադրված տեսախցիկների նկարահանումները: Այդուհանդերձ, Մովսես Ներսիսյանի դիակը մինչ օրս չի հայտնաբերվել, գործի նախաքննությունն էլ դեռ ավարտված չէ:

Հեղինակ` Նելլի Դանիելյան