Փաստ ինֆո

Ազգային ժողովն այսօր շարունակեց կրթության ոլորտին վերաբերող օրենսդրական փոփոխությունների քննարկումը: Ինչպես և նախօրեին, այսօր ևս դա քաղաքական փոքրամասնության որոշ ներկայացուցիչների ու  Կրթության և գիտության նախարար Արմեն Աշոտյանի միջև «փոխհրաձգության» առիթ հանդիսացավ:

«Բարգավաճ Հայաստան» խմբակցության քարտուղար Նաիրա Զոհրաբյանը, մասնավորապես, նշեց, որ երեկ ԱԺ-ում խոսվեց «խիստ կոնկրետ քաղաքական ուժին կցված ուսանողների պահվածքի մասին, և ակնհայտ խուլիգանությունը որակվեց տաքարյունություն»: «Ես, իհարկե, հասկանում եմ, որ տվյալ քաղաքական ուժի համար լկտիությունը տաքարյունության հոմանիշն է, ցինիզմը և դատարկաբանությունը՝ ինտելեկտի հոմանիշը, ակնհայտ տափակախոսությունը՝ կրեատիվ լինելու հոմանիշը: Սակայն մեկ խորհուրդ հատկապես ինտելեկտի մասով՝ ինտելեկտին պարբերաբար հղումներ անելուց առաջ գոնե աշխատեք, որ ձեր և ձեր այլ կարկառուն ներկայացուցիչ օգտատերերի ֆեյսբուքյան ճախրանքներում խայտառակ ուղղագրական սխալներ չլինեն»: Ն.Զոհրաբյանը նաև ընդգծեց.  «Նապոլեոնիզմով տառապելը լուրջ շեղում է: Դատելով որոշ դեպքերի խիստ կլինիկական պրոգրեսից, դրա դեմ պատվաստումն առ այս պահը, ցավոք, դեռևս գտնված չէ: Առողջ եղեք»:

Նախարարը՝ հակադարձելով ԲՀԿ-ական պատգամավորին, նշեց. «Ուզում եմ ասել, որ, բացի քաղաքական նապոլեոնիզմից, կա նաև քաղաքական կլեոպատրիզմ՝ խելացի, գեղեցիկ կին, որը փորձում է տղամարդկանց մանիպուլիացիայի միջոցով ղեկավարել աշխարհը: Ինչպե՞ս ավարտեց Կլեոպատրան: Այնքան էր կոփել իրեն, որ ոչ մի թույն չէր ազդում, ստիպված իրենից ավելի թունավոր բան գտավ, որպեսզի խայթի և մահացնի իրեն»:

«Հայ ազգային կոնգրես» խմբակցության անդամ Նիկոլ Փաշինյանը՝ կրկին անդրադառնալով  Տնտեսագիտական համալսարանում Երևանի քաղաքապետի կողմից գիտական ատենախսության պաշտպանության օրը ուսանողական խորհրդի անդամ երիտհանրապետականների կողմից լրագրողների վրա հարձակումներին, ընդգծեց, որ ԿԳ նախարար Արմեն Աշոտյանը՝ ի պատասխան իր հարցի, փոխանակ պարզաբանի, թե ինչու են պետական բուհերում նման դեպքեր գրանցվում, ԱԺ ամբիոնից սրամտում է: Նա նշեց, որ, հետևելով վերջին շրջանի քննարկումներին, ուզում է նախարարին ասել , որ վերջինս լրջանալու կարիք ունի:  «Սա Клуб веселых и находчивых (Ուրախների և հնարամիտների ակումբ) խաղի պոլուֆինալը չէ, որ էստեղ գաք, մեր հարցերին շուտասելուկներով, հանելուկներով պատասխանեք»,- նախարարին ասաց պատգամավորը: Ընդդիմադիր պատգամավորը նաև զգուշացրեց նախարարին, թե վերջինիս թվում է, որ «կարող է գալ այս ամբիոնից, փայլուն վեղար հագած հրեշտակի կերպարով, ինչպես ինքն էր երեկ ասում այս ամբիոնից, թևածել ԱԺ դահլիճում», սակայն չի ստացվի, քանի որ ամեն անգամ, երբ նախարարը հրեշտակային կերպարով թևածելու փորձ կատարի, ինքը հարցադրումներով նրան կիջեցնի «պարկետի վրա»:

Այս ելույթն ևս անպատասխան չմնաց: Ա.Աշոտյանը նշեց, որ ավելի լավ է КВН խաղալ, քան լինել «02»-ի պոտենցիալ կամ «քաղաքական տնփեսա» սերիալի հերոս:

Նախարարի կուսակից՝ ՀՀԿ խմբակցության քարտուղար Հովհաննես Սահակյանն էլ Նիկոլ Փաշինյանին հակադարձեց, թե, կարծում է, որ «արդեն խնդիր կա՝ որոշներին պարկետի ներքևից պարկետ բարձրացնելու, որովհետև սա Ազգային ժողով է, սա թատերական բեմահարթակ չէ»:

Ն.Զոհրաբյանի ելույթի  կապակցությամբ էլ Հ.Սահակյանն ասաց. «Այլընտրանք ներկայացնող իմ գործընկերը խոսում է լկտիության, ցինիզմի մասին՝ հերթական թատերական դրսևորմամբ: Երբ որ ինքը լրագրող էր աշխատում, կարծում եմ, այդ լկտիության և ցինիզմի վառ դրսևորումն ինքն իր մաշկի վրա լավ զգացել է»:

Արձագանքելով «Հայ ազգային կոնգրես» խմբակցության ղեկավար Լեւոն Զուրաբյանի քննադատական ելույթին էլ Հ.Սահակյանն հայտարարեց. «Դեռևս պատանեկության տարիքում գտնվող այս պատգամավորը, որը որոշ ժամանակահատվածներում փորձում է ցիտել այս կամ այն գործչին, կամ նմանվել, նախ՝ մեր Հանրապետության առաջին նախագահ Լևոն Տեր-Պետրոսյանին, ապա նոր ԱԺ եկած և պատգամավոր դարձած ժամանակահատվածում՝ Նիկոլ Փաշինյանին, հիմա էլ փորձում է ցիտել Նաիրա Զոհրաբյանին կամ իր ոճով ելույթներ ունենալ: Ուստի չեմ անդրադառնում ավելի խորքային և ավելի բովանդակային: Դեռ 3 տարի ունի: Երբ որ մի փոքր ավելի կկայանա, այն ժամանակ մենք դրա առիթը կունենանք»:

Այդուհանդերձ՝ Հ.Սահակյանը ներողություն խնդրեց հանրությունից, որ ուսանողների սոցիալական խնդիրները լուծող կարևորագույն օրենսդրական նախաձեռնության քննարկումը «դարձրին բեմահարթակ, հերթական թատերական ներկայացումը»՝ արձանագրելով, որ «հայ բեմը կորցրել է բավականին վաստաշատ և տաղանդավոր դերասաններ»: