Փաստ ինֆո

Պահեստազորի գնդապետ Վոլոդյա Ավետիսյանի գործով այսօրվա դատական նիստում դատարանը մերժեց գործով նախագահող դատավոր Լեւոն Ավետիսյանին ինքնաբացարկ հայտնելու  Վոլոդյա Ավետիսյանի պաշտպան Արա Զաքարյանի  միջնորդությունը:

Դատարանը մերժեց նաեւ Վ.Ավետիսյանի նկատմամբ որպես  խափանման միջոց ընտրված կալանքը  գրավով փոխարինելու մասին միջնորդությունը:

Մերժումներից հետո ամբաստանյալ գնդապետը հրաժարվեց պատասխանել իր կենսագրական տվյալների վերաբերյալ դատարանի հարցերին: Իսկ նրա պաշտպան Արա Զաքարյանը հայտարարեց, որ ցանկանում է բացարկ հայտնել մեղադրող դատախազին, իսկ միջնորդությունը գրավոր ներկայացնելու համար իրեն հարկավոր են նիստի արձանագրության կրիչները և 1-2 օր ժամանակ:

Պաշտպանի այս միջնորդությունը դատարանը բավարարեց եւ դատական նիստը հետաձգեց  մինչև ապրիլի 2-ը:

Սակայն մինչ այդ, Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում ամբաստանյալ Վոլոդյա Ավետիսյանը  հանդես եկավ հայտարարությամբ եւ իր նկատմամբ հարուցված քրեական գործը գնահատեց որպես  քաղաքական հետապնդում:

Ի հիմնավորումն իր հայտարարության` նա նշեց, որ  երբ 2013թ. մայիսից բարձրացրել է ազատամարտիկների սոցիալական խնդիրները  եւ նստացույց  կազմակերպել, այդ ժամանակ իրեն են մոտեցել իշխանական թևը ներկայացնող  իր ծանոթները և առաջարկել նստացույցը դադարեցնել` խոստանալով «կլորիկ» գումար,  աշխատանք, բիզնես:
Ամբաստանյալի խոսքով, առաջարկված բոլոր տարբերակներից ինքը հրաժարվել է, սակայն դրանց հաջորդել են զգուշացումները «գործ չունես, խնդիր կունենաս», ինչից  հետո իրեն ձերբակալել են, իր հեռախոսը գաղտնալսել, իսկ ընտանեկան խոսակցությունները վերագրել են այս գործին:

Ըստ նրա, կալանավայրում քննիչն իրեն առաջարկել է հրաժարվել հետագա պայքարից` ասելով, որ ինքը միջնորդություն կներկայացնի և ազատամարտիկին բաց կթողնեն, որին ի պատասխան ամբաստանյալը հայտարարել է,  «ինքը իր հոգին չի ծախում, հայրենիքը չի ծախում»:

Այս խոսքերից հետո դահլիճում գտնվող ազատամարտիկի համախոհները սկսեցին բուռն ծափահարել, իսկ նախագահող դատավորը ներկաներին զգուշացրեց, որ կրկնվելու դեպքում բոլորը դուրս կհրավիրվեն և որ միայն նիստին կմասնակցեն լրագրողները: