Փաստ ինֆո

ՀՀ  նախագահի  կարգադրությամբ  մշակված    Դատաիրավական  բարեփոխումների ռազմավարական   ծրագրով  կարևորվեց  իրաբանական  կրթության   որակը  բարձրացնելու խնդիրը, նախատեսվել են համապատասխան  միջոցառումներ   խնդիրը լուծելու համար:  Այս մասին «Տեսակետ»    մամուլի    ակումբում լրագրողների հետ այսօրվա հանդիպմանը  հայտնեց  իրավագիտության դոկտոր, փաստաբանական գրասենյակի կազմում գործող «Քրեական արդարադատություն» գիտավերլուծական խորհրդի նախագահ Արթուր Ղամբարյանը:

Նրա կարծիքով, խնդրի պետական մակարդակով կարևորումն արդեն իսկ մեծ հաղթանակ ու հաջողություն է՝  հույս հայտնելով,  որ  չափորոշիչների մշակման ու միջոցառումների անցկացման արդյունքում խնդիրը կլուծվի:

Ա.Ղամբարյանը նշեց, որ իրավակիրառ պակտիկայում  մերթ ընդ մերթ դժգոհություններ են հնչում դատախազների, քննիչների, դատավորների և  փաստաբանների  որակից, դեպքեր են եղել, երբ, օրինակ,  քննիչը  էլեմենտար իրավաբանական այբուբենին կամ էլ, որ նույնպես կարևոր  է՝  իրավաբանական էլեմենտար տրամաբանությանը չի տիրապետել: Վերջինս քննության ընթացքում հանգեցնում է ոչ թե անօրինական, այլ անտրամաբանական որոշումների կամ գործողությունների:

Իրավաբանական կրթության թերությունների շարքում  Ա.Ղամբարյանը նշեց համակարգային խնդիր՝    շարունակում է  իր գոյությունը  խորհրդային համակարգի  ձևին ու բովանդակությանը բնորոշ կրթություն՝ այն խիստ տեսականացված է, ինչի արդյունքում իրավաբական բուհերը պատրաստում են  ոչ թե իրավաբաններ, այլ  օրենսդրագետներ: «Մենք դեռևս շարունակում ենք պահանջել ուսանողներից, որպեսզի նրանք անգիր սովորեն  օրենքներն  ու վերարտադրեն դրանք»,- նշեց   նա: Մինչդեռ  իրավական   մտածողության անկյունքարն է քննադատությունը՝ ընդհուպ  մինչև օրենքների նկատմամբ:

Իրավաբանական կրթության թերությունների շարքում  Ա.Ղամբարյանը  նշեց, որ կրթական համակարգում առկա է անջրպետ տեսության և պրակտիկայի  միջև՝   ինչը հետևանքն է այն իրողության, որ   մանկավարժական անձնակազմը ունի ակադեմիական տեսական գիտելիքներ, իսկ պրակտիկ փորձ չունի, ուստի անհրաժեշտ է, որպեսզի գործընթացում ընդգրկվեն   պրակտիկ հմտություններ ունեցող անձինք:

Արթուր Ղամբարյանը անդրադարձավ իր գլխավորած Գիտավերլուծական խորհրդի գործունեությանը՝ կազմակերպվում են  փաստաբանների ու ուսանողների համատեղ քննարկումներ, որոնք նպատակ ունեն  վերացնելու  պրակտիկայի  բացն ու  պրակտիկայի ու տեսության  միջև անջրպետը: Խորհուրդը նաև գիտական եզրակացություններ է տալիս հանրային նշանակություն ունեցող իրավական հարցերի վերաբերյալ: