Փաստ ինֆո

«ՀՀ դատական դեպարտամենտ» պետական կառավարչական հիմնարկի նախկին ղեկավար Միսակ Մարտիրոսյանի պաշտպան Սեդա Սաֆարյանը բողոք կներկայացնի «ընդդեմ քննիչի ու դատախազի անօրինական որոշումների»:

Այս մասին  «Փաստինֆո»-ի թղթակցի հետ զրույցում նշեց Սեդա Սաֆարյանը՝ պարզաբանելով, որ նախաքննական մարմինն՝ ի դեմս քննիչի, որոշում է կայացրել Միսակ Մարտիրոսյանի հեռախոսային խոսակցություններն ու տեսակցությունները սահմանափակելու մասին, իսկ սահմանափումները վերացնելու պահանջի վերաբերյալ պաշտպանական կողմի բողոքին ի պատասխան  դատախազը  նշել է, որ սահմանափակումը բխում է գործի շահերից և որ դեռ չեն վերացել սահմանափակում կիրառելու հիմքերը:

Պաշտպանական կողմը գտնում է, որ նման որոշում կայացնելու անհրաժեշտություն չկար՝  որոշում  ընդունելու պահին  ձեռք բերվելիք ապացույցների 80 տոկոսն արդեն  ձեռք բերված էր:  Այդ սահմանափակումը պետք է բացառիկ բնույթ կրի, իսկ բացառիկության հիմքեր, ըստ Սեդա Սաֆարյանի, չկան, դա ինքնանպատակ գործողություն է: Պաշտպանի կարծիքով, սահմանափակումը չվերացնելը, իսկ նույն  գործով այլ մեղադրյալների հանդեպ նման սահմանափակում չսահմանելը նպատակ ունի հոգեբանական ճնշում գործադրել  Մ.Մարտիրսյանի նկատմամբ  և ընդգծել  այլ մեղադրյալների նկատմամբ  նախաքննական մարմնի  ավելի բարյացակամ վերաբերմունքը:

Հիշեցնենք, որ Մ.Մարտիրոսյանը կալանքի տակ է գտնվում 2013 թվականի նոյեմբեր ամսից և մեղադրվում է  ՀՀ քրեական օրենսգրքի 2 հոդվածներով` 178-րդ հոդվածի 3-րդ մասի 1-ին կետով  և 311-րդ  հոդվածի 1-ին մասով, 3-րդ մասի 2-րդ և 3-րդ կետերով՝ դատական կարգադրիչների համակարգում աշխատավարձերի յուրացման  աղմկահարույց դեպքերի և Միսակ Մարտիրոսյանի կողմից աշխատանքի ընդունելու համար խոշոր չափերի կաշառք ստանալու գործերի շրջանակում: Գործերն ավելի ուշ միավորվել են մեկ վարույթում: