Փաստ ինֆո

Առանձնապես խոշոր չափերով գույք հափշտակելու նպատակով ավազակային հարձակում կատարելու, բռնաբարելու մեջ մեղադրվող ՀՀ ոստիկանության շտաբի ոստիկան Էդգար Վարագյանի դեմ  գործով  այսօր ավարտվեց  տուժող կնոջ հարցաքննությունը՝  դռնփակ նիստում:

Դատարանը դռնփակ նիստում հարցաքննեց ևս մեկ  կին վկայի՝   վերջինիս խնդրանքով՝  անձնական կյանքի գաղտնիությունն ապահովելու նպատակով:

Դռնբաց նիստում հարցաքննված երեք վկաներից երկուսը հայր և որդի էին, նրանք հայտնեցին, որ ամբաստանյալն իրենց տուն հեռուստացույց է բերել՝ պատճառաբանելով, որ չի ուզում, որպեսզի  տանտերն այն տեսնի, ապա հաջորդ օրն, երբ հայտնի է դարձել  Է.Վարագյանին մեղսագրվող արարքների մասին,  որդին հեռուստացույցը ներկայացրել  է ոստիկանության բաժին: 

Վկա Գրիգոր Փափազյանը, ով  աշխատում էր  տուժողի տան դիմաց  ընթացող շինարարությունում որպես պահակ, հայտնեց, որ  անցյալ տարվա լույսի 22-ի գիշերը ժամը 03-04-ի սահմաններում  լսել է կոտրվող ապակու ձայն:  Պաշտպանական կողմի հարցերին, թե արդյոք վկան լսել է այլ ձայներ,  օգնության կանչեր, հեռացող մեքենայի ձայն՝  վկան բացասական պատասխան տվեց:

Դատարանը տեղեկացրեց դատավարության մասնակիցներին, որ  գործով  5  վկաներ ծանուցվել են դատարան ներկայանալու մասին,   նրանցից    երկուսն, ըստ ստացված տեղեկանքի, տեղափոխվել են բնակության վայրից,  մեկ վկա գտնվում  է գործուղման մեջ, իսկ երկուսը ստացել են ծանուցագիրը, սակայն չեն ներկայացել դատարան: Մեղադրող կողմը միջնորդեց հրապարակել վկաների ցուցմունքները, իսկ պաշտպանական կողմը միջնորդեց նրանց բերման ենթարկել: Ըստ ամբաստանյալ Էդգար Վարագյանի պաշտպան Աննա Թամազյանի,   վկաներից մեկն  իր բնակության վայրում է գտնվում,  ինքը երկու ամիս առաջ հանդիպել է նրան՝  պարզելու, թե ինչ է տեղի ունեցել իրականում, ինչը  նախագահող դատավոր Մեսրոպ Մակյանի զարմանքն առաջացրեց՝  նա հետաքրքրվեց՝   որ    հոդվածով է  պաշտպանը  «դատավարական լիազորություն իրականացրել»:  Պարզվեց, որ խոսքը Քրեական դատավարության օրենսգրքի  73- րդ  հոդվածի՝ Պաշտպանի իրավունքները և պարտականությունները,   առաջին մասի   6-րդ կետի մասին է, ըստ որի   պաշտպանն իրավունք ունի հարցման ենթարկել մասնավոր անձանց:  Դատարանը նկատեց, որ վկան մասնավոր անձ չէ, նա ունի դատավարական կարգավիճակ և հավելեց՝  «քննությո՞ւն եք անցկացնում»:  Պաշտպանն էլ իր հերթին նշեց, որ  հանդիպել է վկային, երբ դեռևս գործը դատարանի վարույթ ընդունված չի եղել:   

Դատարանը որոշում ընդունեց   վկաներից երկուսին նորից ծանուցելու, իսկ երեքին բերման ենթարկելու մասին:

Հիշեցնենք, որ  Էդգար Վարագյանին մեղադրանք է առաջադրվել  ՀՀ քրեական օրենսգրքի 5 հոդվածներով՝ 175-րդ հոդվածի 3-րդ մասի 1-ին կետով՝ ավազակություն՝ առանձնապես խոշոր չափերով գույք հափշտակելու նպատակով, 183-րդ հոդվածի 3-րդ մասի 3-րդ կետով՝ առանց հափշտակելու նպատակի ավտոմեքենային կամ տրանսպորտային այլ միջոցին ապօրինաբար տիրանալը, որը կատարվել է կյանքի կամ առողջության համար վտանգավոր բռնություն գործադրելով, կամ դա գործադրելու սպառնալիքով, 131-րդ հոդվածի 2-րդ մասի 2-րդ, 3-րդ, 4-րդ և 6-րդ կետերով՝ մարդուն առևանգելը, որը կատարվել է երկու կամ ավելի անձանց նկատմամբ, որոնցից մեկը՝ անչափահաս՝  կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով, զենքի կամ որպես զենք օգտագործվող առարկաների գործադրմամբ, 139-րդ հոդվածի 1-ին մասով՝ սեքսուալ բնույթի բռնի գործողություններ, և 138-րդ հոդվածի 1-ին մասով՝ բռնաբարություն: