Փաստ ինֆո

Ազգային ժողովի պետական-իրավական հարցերի մշտական հանձնաժողովի նախաձեռնությամբ մարտի 31-ին կանցկացվեն ՀՀ քաղաքացիական օրենսգրքում լրացումներ կատարելու մասին օրենքի նախագծի վերաբերյալ խորհրդարանական լսումներ:

Ինչպես «Փաստինֆո»-ն ավելի վաղ տեղեկացրել էր, Ազգային ժողովի 6 խմբակցությունների ներկայացուցիչներ և անկախ պատգամավոր Էդմոն Մարուքյանը մարտի 4-ին խորհրդարանում շրջանառության մեջ են դրել ՀՀ քաղաքացիական օրենսգրքում լրացումներ կատարելու մասին օրինագիծը, որի նպատակը, մասնավորապես, կեղծ օգտատերերի` «ֆեյքերի», միջոցով վիրավորանք կամ զրպարտություն պարունակող տեղեկատվության տարածման դեմ պայքարն է:

Այս օրենսդրական նախաձեռնությունը, սակայն, ոչ միանշանակ է ընդունվել ԶԼՄ-երի և մեդիադաշտի փորձագետների կողմից և վերջին օրերին դարձել լայն քննարկման առարկա տարբեր հարթակներում:

Ըստ նախագծի համահեղինակ՝ ՀՀԿ խմբակցության անդամ Արփինե Հովհաննիսյանի, նախագծի վերաբերյալ առաջին իսկ պահից ստեղծվել է սխալ պատկերացում: «Այն ստացավ «ֆեյքերի դեմ» ոչ պաշտոնական անվանումը, որը, սակայն, ոչ մի աղերս չունի իրականության հետ: Խնդրում ենք, ուշադրությամբ կարդալ նախագծի դրույթները և կտեսնեք, որ ԶԼՄ-ի համար պատասխանատվություն սահմանող որևէ դրույթ այդ առումով չկա: Այդ պատասխանատվությունը նախատեսված է այսօր գործող օրենքում: Ուստի, այստեղից բխող բոլոր հարցադրումները չեն վերաբերում նախագծին»,- ֆեյսբուքյան իր էջում գրել է պատգամավորը՝ նշելով, որ հեղինակների մտադրությունների մասին ևս ստեղծվել է սխալ պատկերացում:

«Որևէ անձնական շահագրգռվածություն նախագծի համահեղինակներից և ոչ մեկը չունի: Պարզապես առկա էին որոշ մտահոգություններ, որոնք բազմաթիվ անգամներ հնչեցվել են, այդ թվում՝ նաև լրատվամիջոցների կողմից, և այժմ փորձ է արվում որոշ հստակեցումներ մտցնել: Վստահ եմ՝ որևէ մեկը չի առարկում, որ այս դաշտում առկա են որոշակի խնդիրներ, որոնք մտահոգում են շատերին: Այս օրինագիծը շատ լավ առիթ է խոսելու, մտահոգությունները բարձրաձայնելու և համատեղ լուծումներ որոնելու համար»,-նշել է Ա.Հովհաննիսյանը:

Ըստ նրա, նախագծի որևէ դրույթ չի հավակնում դոգմատիկ ճշմարտություն դառնալ, այլ պետք է դառնա քննարկման առարկա և կարող է լրամշակվել ԶԼՄ-ների հետ քննարկումների արդյունքում: Այդ իսկ պատճառով Արփինե Հովհաննիսյանը խորհուրդ է տալիս բոլոր շահագրգիռ անձանց մասնակցել լսումներին և ներկայացնել իրենց առաջարկությունները՝ տեղեկացնելով, որ լսումներին հրավիրվելու են նաև միջազգային կազմակերպությունների ներկայացուցիչներ:

«Այս պահին արդեն ստացվել են բազմաթիվ առաջարկություններ, որոնք նախագծի հեղինակների կողմից դարձել են և կդառնան քննարկման առարկա»,-ընդգծել է նախագծի համահեղինակը: