Փաստ ինֆո

Ավանդաբար շատ են հայ ըմբիշները հունա-հռոմեական ոճի ըմբշամարտի համաշխարհային դասակարգման սանդղակում, որի հերթական տարբերակում ընդգրկված են միանգամից 10 հայորդիներ: Իսկ առավել բարձր են դասվում գյումրեցիներ Արթուր Ալեքսանյանը և Արսեն Ջուլֆալակյանը:

Ալեքսանյանը 2-րդն է մինչև 98 կգ քաշային կարգում՝ զիջելով միայն իր սկզբունքային մրցակից ռուսաստանցի Նիկիտա Մելնիկովին: Իսկ Ջուլֆալակյանը 75 կգ քաշայինների 3-րդ հորիզոնականին է: Ավելի բարձր են դասվում աշխարհի չեմպիոն Կիմ Հյուն Վուն (Հարավային Կորեա) և Ռոման Վլասովը (Ռուսաստան): Այս քաշային կարգում 12-րդն է մեկ այլ գյումրեցի Կարապետ Չալյանը:

Առհասարակ, ձմռանը տեղի ունեցած մրցաշարերը լուրջ փոփոխություններ են առաջացրել սանդղակում: Մինչև 59 կգ քաշային կարգում Ռոման Ամոյանը դասվում է 10-րդ, Լեհաստանը ներկայացնող Էդվարդ Բարսեղյանը՝ 12-րդ, իսկ Կարեն Ասլանյանը՝ 16-րդ տեղում: Ընդ որում, Բարսեղյանը որոշակի ընդմիջումից հետո է հայտնվել 20 լավագույնների շարքում: Նույնը վերաբերում է 66 կգ քաշայինների աղյուսակում 11-րդ տեղում ընթացող Արամ Ջուլֆալակյանին:

Սոֆիայի մրցաշարում հաջող ելույթների շնորհիվ սանդղակում վերստին ընդգրկվել է նաև շուրջ երկու տասնամյակ Ուկրաինայի դրոշի ներքո հանդես եկող Արմեն Վարդանյանը (71 կգ), որն ունի 13-րդ վարկանիշը: Մինչև 80 կգ քաշայինների սանդղակում 17-րդն է Իրանի հավաքականում հանդես եկող Հովսեփ Ղադերյանը: Իսկ 85 կգ քաշայինների 14-րդ հորիզոնականին նշված է Մաքսիմ Մանուկյանի անուն-ազգանունը: