Փաստ ինֆո

«ՀՀ դատական դեպարտամենտ» պետական կառավարչական հիմնարկի նախկին ղեկավար Միսակ Մարտիրոսյանի կալանավորման ժամկետը ևս երկու ամսով երկարացվել է: Ինչպես «Փաստինֆո»-ի թղթակցին հայտնեց Միսակ Մարտիրոսյանի պաշտպան Վարդան Զուռնաչյանը,  ինքն անպայման բողոքարկելու է Երևանի Կենտրոն և Նորք Մարաշ դատարանի մարտի 7-ի հիշյալ որոշումը:

 Մ.Մարտիրոսյանը կալանքի տակ է գտնվում 2013 թվականի նոյեմբեր ամսից։

Վարդան Զուռնաչյանը փոխանցեց Մ. Մարտիրոսյանի հայտարարությունն առ այն, որ գործով երկու մեղադրյալներ՝ Մ. Մարտիրոսյանի նախկին տեղակալ Արմեն Մովսիսյանի, դեպարտամենտի կադրերի վարչության նախկին պետ Անգին Ղուկասյանի (Իսախանյանի) և քննիչի միջև գործարք է եղել, որպեսզի նրանք իր դեմ ցուցմունք տան, ինչի մասին բացահայտումներ կանի դատարանում։

Հիշեցնենք, որ Մ.Մարտիրոսյանին մեղադրանք է առաջադրվել ՀՀ քրեական օրենսգրքի 2 հոդվածներով` 178-րդ հոդվածի 3րդ մասի 1-ին կետով  և 311-րդ  հոդվածի 1-ին մասով, 3-րդ մասի 2-րդ և 3-րդ կետերով՝ Միսակ Մարտիրոսյանի կողմից աշխատանքի ընդունելու համար խոշոր չափերի կաշառք ստանալու և դատական կարգադրիչների համակարգում աշխատավարձերի յուրացման դեպքերի առնչությամբ:

Ինչպես ավելի վաղ «Փաստինֆո»-ն տեղեկացրել էր, Մ.Մարտիրոսյանին խոշոր չափերի կաշառք ստանալու մեղադրանք առաջադրվել էր դեռեւս սեպտեմբերին։ Կաշառքի միջնորդի դերում, ըստ մեղադրանքի, հանդես է եկել Դատական դեպարտամենտի կադրերի վարչության նախկին պետ  Անգին Ղուկասյանը, ով աշխատանքից ազատվել է 2013 թվականի հուլիսին։
 
Երկրորդ դրվագը վերաբերում է արդեն դատական կարգադրիչների համակարգում աշխատավարձերի յուրացման բացահայտված դեպքերին, որի շրջանակներում մեղադրանքներ են առաջադրվել նաեւ Դատական կարգադրիչների ծառայության պետ, դատական դեպարտամենտի ղեկավարի տեղակալ Արմեն Մովսիսյանին, վերջինիս տեղակալ Գագիկ Խաչատրյանին:
 
Նշենք, որ Գ.Խաչատրյանի նկատմամբ ևս նախկինում որպես խափանման միջոց էր կիրառվել կալանքը, սակայն Ա.Մովսիսյանին ձերբակալելու օրը փոխվեց Գ.Խաչատրյանի խափանման միջոցը և նա անձնական երաշխավորությամբ ազատ արձակվեց։
 
Դատական կարգադրիչների համակարգում աշխատավարձերի յուրացման դեպքեր են բացահայտվել, որն իր ընդգրկմամբ հավակնում է դառնալ սոցիալական չարաշահումների աղմկահարույց գործերից հետո երկրորդը:
 
Քննությամբ բացահայտվել են մի քանի տասնյակ անձինք, ովքեր գրանցված են եղել, սակայն չեն ներկայացել աշխատանքի, իսկ նրանց աշխատավարձերը ստացել ու յուրացրել են նրանց պետերը: Ընդ որում, չարաշահումներն ընդգրկել են տարբեր ընդհանուր իրավասության դատարանների դատական կարգադրիչների կառույցներ, իսկ «կծիկը»  հասնում է մինչև դատական կարգադրիչների ծառայության կենտրոնական համակարգ:
 
 Վարույթն իրականացնող մարմինը սեպտեմբերի 26-ին որոշում էր կայացրել Մ. Մարտիրոսյանի պաշտոնավարումը ժամանակավոր դադարեցնելու մասին եւ Հայաստանի Հանրապետության դատարանների նախագահների խորհուրդը սեպտեմբերի 27-ի նիստում որոշել է վերջինիս ազատել զբաղեցրած պաշտոնից: