Փաստ ինֆո

Շվեյցարացի մասնագետ Բեռնար Շալանդը առաջին հարցազրույցն է տվել ֆուտբոլի Հայաստանի ազգային հավաքականի գլխավոր մարզչի կարգավիճակով: 62-ամյա մասնագետը իր երկրի Le Matin պարբերականի թղթակցի հետ զրույցում չի չի բացառել, որ ՀՖՖ-ի հետ պայմանագրի լրանալուց հետո կարող է ավարտել մասնագիտական գործունեությունը:

-Ձեր համար անակնկալ է՞ր այս նշանակումը:

-Առաջինը ես եմ զարմանում (Ծիծաղում է): Ամեն ինչ արվում է, սակայն արդյո՞ք իսկապես պատրաստ եմ: Բայց դա մարտահրավեր է ինձ համար:

-Ինչպե՞ս ստացվեց գործարքը:

-Ինձ հետ կապվեցին կիրակի օրը, երբ Փարիզում էի: Ինձ ներկայացնելու համար չորեքշաբթի օրը մեկնեցի Երևան, սակայն Հայաստանի ֆուտբոլի ֆեդերացիայի ղեկավարներն ակնհայտորեն ամեն ինչ գիտեին իմ մասին: Արթուր Պետրոսյանից լսել էին «Ցյուրիխում» իմ աշխատանքի մասին; Ժամանակ խնդրելով մտորումների համար, վերադարձա Շվեյցարիա: Հինգշաբթի օրը խոսեցի կնոջս հետ, իսկ հաջորդ օրը տեղեկացրեցի, որ համաձայն եմ պայմանագիր կնքել: Երկուշաբթի օրը կնքեցինք պայմանագիրը:

-Ի՞նչ պայմաններով:

-(Ծիծաղում է ): Օ՜, դա վտանգավոր պայմանագիր է, որը ուժի մեջ է մինչև «Եվրո-2016»-ի ընտրարշավի ավարտը: Իմ առջև խնդիր է դրված թիմի հետ Եվրոպայի առաջնության եզրափակիչ փուլի ուղեգիր նվաճել: Հակառակ դեպքում չեմ հարստանալու: Բայց ես չեմ մտածում. սա նոր մարտահրավեր է, թերևս վերջինը իմ մասնագիտական գործունեության ընթացքում: Այնպես որ, պատրաստ եմ ընդունել այդ մարտահրավերը:

-Դժվար չի՞ լինի լուծել խնդիրը, քանի որ ենթախմբում Հայաստանի հավաքականի մրցակիցներն են Պորտուգալիան, Դանիան, Սերբիան և Ալբանիան:

-Գիտեմ այդ փաստը: Հայաստանում ֆուտբոլի խաղամակարդակը ավելի ցածր է, քան Շվեյցարիայում, սակայն այդ երկրի հավաքականը առաջընթաց է ապրել: Ունի մի քանի լավ խաղացողներ, ինչպես օրինակ Մխիթարյանը՝ Դորտմունդի «Բորուսիայից»:

-2013 թվականի գարնանից չեք աշխատել: Կարոտել ե՞ք ֆուտբոլը:

-Անշուշտ: Այդ ընթացքում վայելել եմ կնոջս, երեխաներիս և թոռներիս ընկերակցությունը, բայց, կարծում եմ, պետք է նաև աշխատեմ: Բացի այդ, սա ազգային հավաքական է, այլ ոչ թե ակումբ: Այս նախագիծն ուրախացնում է ինձ: Ընտրություն կատարելիս նաև հաշվի եմ առել, որ Հայաստանում ֆուտբոլի լավ ակադեմիա կա, որտեղ ստեղծված են պարապելու բոլոր պայմանները:

-Ձեր կնոջ հետ ե՞ք տեղափոխվելու Հայաստան:

-Այո, բայց պարբերաբար կվերադառնանք, երբ ընդմիջումներ լինեն միջազգային խաղացանկում: Հայաստանի ազգային հավաքականի գլխավոր մարզչի կարգավիճակում իմ աշխատանքը սկսվելու է մայիսի 31-ին և հունիսի 6-ին կայանալիք Ալժիրի ու Գերմանիայի հավաքականների հետ հանդիպումներից: