Փաստ ինֆո

 

 

Այս մասին Ազգային ժողովի այսօրվա նիստում՝ մարտիմեկյան դեպքերն  ուսումնասիրող ՀՀ Ազգային ժողովի ժամանակավոր հանձնաժողով ստեղծելու որոշման նախագծի քննարկման ժամանակ, հայտարարեց ՀՀԿ խմբակցության անդամ Սամվել Ֆարմանյանը՝ հավելելով, որ անկեղծությունը պահանջում է արձանագրել, որ ժամանակավոր հանձնաժողովի ստեղմամբ այսօր հազիվ թե հնարավոր է հասնել դրված խնդիրների լուծմանը:

 

Քաղաքական մեծամասնության ներկայացուցիչը համոզմունք հայտնեց, որ այդ ողբերգության բոլոր հանգամանքները հնարավոր կլինի օբյեկտիվորեն բացահայտել և շահել հանրության վստահությունը միայն այն ժամանակ, երբ «այդ և հարակից իրադարձությունները կդադարեն լինել երկրի ներքաղաքական օրակարգի ձևավորման կարևոր աղբյուր, երբ մարտիմեկյան թեման կդադարի կրել քաղաքականացվածության դրոշմը, երբ ժամանակն ու դերակատարները որևէ շահագրգռվածություն չեն ունենա՝ հիմնավորելու կամ հերքելու այդ իրադարձությունների շուրջ առկա այս կամ այն տեսակետը»:

 

«Այս նախաձեռնությունը երևի լավագույն առիթն է իմաստավորելու մարտիմեկյան դասերը, խոսելու, խորհելու, թե արդյոք մենք, որպես հավաքականություն, ժողովուրդ, հասարակական-քաղաքական հանրույթ, բավարար հետևություններ արել ենք ողբերգական այդ իրադարձություններից: Իմ կարծիքով, ցավոք, ոչ ամբողջովին, իսկ պատմությունը առանձնակի դաժանությամբ է պատժում իր դասերը չսերտած ժողովուրդներին»,-ընդգծեց Ս.Ֆարմանյանը: 

 

Պատգամավորի համոզմամբ, քաղաքական ներկապնակի դերակատարները, ցավոք, ոչ ամբողջությամբ են սերտել մարտի մեկի դասերը: 

 

«Պետք է անկեղծ լինել մինչև վերջ և արձանագրել, որ այդ դասերը երբեք էլ չեն սերտվի, քանի դեռ օրվա իշխանությունն իր ներսից արմատախիլ չի անի մտայնությունը, որ ընտրություններում հնարավոր չի պարտվել կամ որ քաղաքական կնճիռները կարելի է լուծել ոչ քաղաքական մեթոդներով, քանի դեռ արմատախիլ չի արվի այն կեղծ մտայնությունը, որ ընդդիմությունը մեր հայրենիքն ավելի քիչ է սիրում, քան՝ մենք, քանի դեռ չի գիտակցի, որ դժգոհ քաղաքացու ձայնը պետք է լսվի և անպայման հաշվի առնվի: 

 

Այդ դասերը երբեք էլ չեն սերտվի, քանի դեռ օրվա ընդդիմությունն իր ներսից արմատախիլ չի անի մտայնությունը, որ ընտրություններում հաղթում է բացառապես ինքը՝ ընդդիմությունը և որ քաղաքական իշխանության ճանապարհին ոչինչ այնքան արժեքավոր չէ, որքան հրապարակում թափված արյունը, քանի դեռ չի մերժվել կործանարար մտածողությունը, որ բոլոր իշխանավորները ազգի դավաճաններ են կամ թալանչիներ, քանի դեռ հանուն սեփական վարկանիշի, հանուն քաղաքական հատվածական շահերի ինքներս մեզ կբարիկադավորենք մենքի ու նրանքի ճամբարներում՝ հրճվելով անգամ, երբ մեր քաղաքական մրցակցի տանը տխուր դեպք պատահի կամ ամենասուր հայհոյոնքով վիրավորենք մեր քաղաքական ընդդիմախոսներին»,-հայտարարեց Ս.Ֆարմանյանը՝ հավելելով, որ «հենց այս պարզ դասերը մենք կարող ենք և պարտավոր ենք այսօր սերտել, հենց այս դասերի սերտումը կլինի մեր լավագույն հարգանքը մարտիմեկյան իրադարձությունների զոհերի հիշատակին, իսկ օդում մնացած որևէ հարց ժամանակի մեջ անպատասխան չի մնա»: