Փաստ ինֆո

Հայաստանում միլիոնավոր դոլարներ կորցրած ամերիկահայ գործարար Էդմոնդ Խուդյանին պատկանող «Արին կապիտալ» ընկերությունը կանխամտածված սնանկացնելու մասին քրեական գործի նախաքննությունը դեռ շարունակվում է: Այս մասին «Փաստինֆո»-ին հայտնեցին Ոստիկանության լրատվության և հասարակայնության հետ կապերի վարչությունից` չցանկանալով նախաքննության ընթացքի վերաբերյալ այլ մանրամասներ հրապարակել:

Հիշեցնենք, այս գործի շրջանակներում միակ մեղադրյալ Վլադիսլավ Մանգասարյանի կալանքի 1  տարին, որ թույլատրելի առավելագույն ժամկետն է, լրանում է մարտ ամսին, ուստի նախաքննական մարմինը կամ պետք է ազատ արձակի նրան, կամ հայտարարի նախաքննության ավարտի մասին: Դատելով, ոստիկանությունից մեզ տրամադրած տեղեկությունից՝ նախաքննությունն առաջիկա օրերին հազիվ թե ավարտվի: Նույն կարծիքը մեզ հետ զրույցում հայտնեց նաև «Արին կապիտալ» ընկերության սեփականատեր, ամերիկահայ գործարար Էդմոն Խուդյանի փաստաբան Լեռնիկ Հովհաննիսյանը:

«Մեկ տարին լրանալուց հետո Մանգասարյանին, ժողովրդական լեզվով ասած, բաց կթողնեն, իսկ իրավաբանական լեզվով ասած` խափանման միջոց կալանքը կփոխարինվի, ասենք չհեռանալու մասին ստորագրությամբ»,- «Փաստինֆո»-ի հետ զրույցում նման կանխատեսում արեց փաստաբանը:

Ինչ վերաբերում է ընթացող նախաքննությանը, ապա Լեռնիկ Հովհաննիսյանը նշեց, որ դրա վերաբերյալ որևէ տեղեկություն նախաքննական մարմինն իրենց չի տրամադրում, ինչը և փաստաբանի մոտ անվստահության զգացում է առաջացնում:

«Այն ժամանակ վստահում էինք, հավատում էինք, որովհետև ինչ-որ հրապարակային քայլեր էին կատարվում` մեղադրանք առաջադրել, արգելանք դնել, բայց հիմա որևէ մի քայլ չկա, որ հավատ ներշնչի, այն, որ 6 ամիս էլ կշարունակվի, 8 ամիս էլ նախաքննությունը, որևէ երաշխիք չկա, որ գործը կբացահայտվի»,- ասաց Լեռնիկ Հովհաննիսյանը` հավելելով, սակայն, որ միակ դրական տեղաշարժն այն է, որ, եթե նախկինում արգելանք էր դրված շենքի միայն որոշ բնակարանների վրա, ապա այժմ արգելանք է դրվել ամբողջ շենքի վրա:
 
Հիշեցնենք, ՀՀ Պետական եկամուտների կոմիտեի քննչական վարչությունում «Արին կապիտալ» ընկերությունը կանխամտածված սնանկացնելու փաստով հարուցված քրեական գործով շուրջ 2.5 տարի քննության ի վերջո անցած տարվա մարտին Վլադիսլավ Մանգասարյանը կալանավորվեց եւ նրան մելադրանքներ առաջադրվեցին ոչ միայն կանխամտածված սնանկության համար, այլ ՀՀ քրեական օրենսգրքի երեք հոդվածներով, այդ թվում փողերի լվացման համար: Իսկ  անցյալ տարեվերջին քրեական գործն ուղարկվեց ՀՀ ոստիկանության քննչական գլխավոր վարչության Հատուկ կարևորության գործերով վարչություն:

Ներդրումային ընկերության սեփականատեր Էդմոն Խուդյանը բազմիցս հայտարարել է, որ Վլադիսլավ Մանգասարյանը կեղծ փոխառություններով և կատարողական ակտերով ընկերությունը ծանրաբեռնել է պարտավորություններով, այնուհետև ընկերությանը պատկանող մնացած գույքը գրավադրել է այդ պարտավորությունների դիմաց և կազմակերպել «Արին կապիտալ» ներդրումային ՍՊԸ-ի կանխամտածված սնանկությունը:
 
Սնանկության վարույթի շրջանակներում, ըստ Էդմոն Խուդյանի, Վլադիսլավ Մանգասարյանը, համագործակցելով սնանկության գործով կառավարիչ Հրանտ Ղամբարյանի հետ, դատարանում հաստատված կեղծ պահանջների դիմաց «Արին կապիտալ» ներդրումային ՍՊԸ-ի շուրջ 2 000 000 դոլար արժողությամբ վերջին տարածքները նույնպես յուրացրել է:
 
Այս ամենի արդյունքում, գործարարի հաշվարկով, տասնյակ սփյուռքահայ ու հայաստանցի ներդրողներ զրկվել են շուրջ 2 000 000 դոլար ընդհանուր արժողությամբ իրենց բնակարաններից, ինքը` Է.Խուդյանը` իր  ներդրումներից ու դրանից ակնկալվող եկամտից, իսկ պետությունը` շուրջ 1 500 000 դոլար հարկերից:
 
Այդուհանդերձ, գործի քննության մեջ այդպես էլ որևէ կարգավիճակով չեն ներգրավվել «Արին կապիտալ»-ի սնանկության գործով կառավարիչ Հրանտ Ղամբարյանը և ընկերության տնօրեն Էդուարդ Եսայանը, չնայած որ Խուդյանն իր փաստաբանների միջոցով պատկան մարմիններին է ներկայացրել նրանցից յուրաքանչյուրի` ընկերությանը պատճառած վնասի չափերի ու հանգամանքների մասին փաստեր: Իրեն տուժող ճանաչելու վերաբերյալ Խուդյանի դիմումները ևս անպատասխան են մնացել:

Հեղինակ` Նելլի Դանիելյան