Փաստ ինֆո

Ֆրանսիական Դիմադրության շարժման մասնակից Միսաք Մանուշյանի և նրա խմբի անդամների` նացիստների կողմից գնդակահարման 70-րդ տարելիցին նվիրված փետրվարի 20-ի  միջոցառման ընթացքում ներկաները հոտնկայս, մեկ րոպե լռությամբ հարգել են  10 տարի առաջ կույր ատելության զոհ դարձած հայ սպա  Գուրգեն Մարգարյանի հիշատակը:

Հայաստանի Հանրապետության արտաքին գործերի նախարարության Մամուլի, տեղեկատվության և հասարակայնության հետ կապի վարչության փոխանցմամբ,   Փարիզի Ռազմական Ակադեմիայում  փետրվարի 20-ին տեղի ունեցած  միջոցառմանը  ներկա են եղել  Ֆրանսիայի նախկին ռազմիկների հարցերով լիազոր նախարար Կադեր Արիֆը, Ֆրանսիայում Հայաստանի դեսպան Վիգեն Չիտեչյանը, Փարիզի քաղաքային իշխանությունների ներկայացուցիչներ, Ֆրանսահայ կազմակերպությունների համակարգող խորհրդի ղեկավար կազմը, Ֆրանսիայի հայկական և հրեական կազմակերպությունների հարյուրավոր ներկայացուցիչներ:

Բացման խոսքում նախարար Արիֆը ներկայացրել է  Միսաք Մանուշյանի կենսագրությունը և նշել, որ Մանուշյանի խմբի մեծարման միջոցով Ֆրանսիան իր երախտիքն է հայտնում Ֆրանսիայի ազատության համար մարտնչած բոլոր կանանց և տղամարդկանց, որոնք ծնված լինելով օտար երկրներում դարձել են այսպիսի մեծն ֆրանսիացիներ:
Իր հերթին դեսպան Չիտեչյանը, Մանուշյանի խմբի անդամներին բնութագրել է  որպես «23 մահկանացու, որոնց սերն առ հայրենիք դարձրեց անմահ»: Խոսելով դիմադրության հերոսների մասին և վերհիշելով Մանուշյանի վերջին նամակի տողերն առ այն, որ նա չունի ատելություն գերմանացի ժողովրդի հանդեպ` Հայաստանի դեսպանը ընդգծել է, որ պայքարն արդար և արժանապատիվ է, երբ դրա գերագույն նպատակը կյանքեր փրկելն է, ոչ թե ատելությամբ կյանքեր խլելը:

Ռազմական Ակադեմիայում տեղի ունեցած միջոցառմանը հաջորդել է երեկոյան երթը դեպի Փարիզի Հաղթանակի Կամար, որտեղ Ֆրանսիայի օրհներգերի ներքո տեղի  է ունեցել  հավերժական կրակի բորբոքման արարողություն` ի նշան Մանուշյանի խմբի գնդակահարված անդամների հիշատակի: Հնչել  են  հայերեն, եբրայերեն և ֆրանսերեն աղոթքներ: