Փաստ ինֆո

 

Դատարանը ճանաչել և հռչակել է ձեռնարկատեր Ռադիկ Սարգսյանի անմեղությունը` ՀՀ քրեական օրենսգրքի 193-րդ հոդվածով՝ կանխամտածված սնանկության համար առաջադրված մեղադրանքում:

 

Ռադիկ Սարգսյանի նկատմամբ ընտրված խափանման միջոցը` չհեռանալու մասին ստորագրությունը, վերացվել է։ 

 

ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը՝ դատավոր Մեսրոպ Մակյանի նախագահությամբ, փետրվարի 18-ին կայացված դատավճռով Ռադիկ Սարգսյանին պարզաբանվել է ՀՀ քրեական դատավարության օրենսգրքի 66-րդ հոդվածով սահմանված արդարացվածի և նրան պատճառված /հիմնավոր/ վնասի հատուցման` նրա իրավունքներն ու հատուցման կարգը։ 

 

Դատավճռով՝ կալանքից ազատվել է ՀԱ ԿԱ ՊԵԿ քննչական վարչության քննիչ Ռ.Պետրոսյանի՝ 28.08.2013թ. որոշմամբ՝ Ռադիկ Սարգսյանին համատեղ սեփականության իրավունքով պատկանող երևանյան բնակարանի` վերջինիս բաժնեմասը։ 

 

Ռադիկ Սարգսյանը 2006թ. դեկտեմբերի 6-ից հանդիսացել է «Հովսար» ՍՊ ընկերության տնօրեն, մինչև 2009թ. դեկտեմբերի 1-ն ընկած ժամանակահատվածում Երևանի Ե.Կողբացու 1 հասցեում զբաղվել է հանրային սննդի կազմակերպմամբ։

 

Ըստ նախաքննական մարմնի՝  2009թ. դեկտեմբերի 1-ից մինչև 2012թ. մայիսի 2-ն ընկած ժամանակահատվածում նա նույն գործունեությունը շարունակել է Երևանի Հանրապետության փողոցի 62/156 հասցեում, որի ընթացքում ունենալով իր աշխատակիցների կողմից կատարման համար պարտադիր ցուցումներ տալու և ընկերության ակտիվները տնօրինելու հնարավորություն՝ 2009թ. հոկտեմբերի 1-ից մինչև 2012թ. մայիսի 2-ն ընկած ժամանակահատվածում ընկերության տնտեսական գործունեությունից առաջացած, ապա նաև 2012թ. մայիսի 2-ին այն դադարեցնելուց մինչև 2012թ. դեկտեմբերի 31-ը կուտակած և հարկման համար հիմք հանդիսացող փաստաթղթերում ցույց տրված 1.084.429 ՀՀ դրամի հարկերը և հաշվարկված 689.968 ՀՀ դրամի տույժ ու տուգանքները չվճարելու համար, ընկերության ձեռնարկատիրական գործունեության արդյունքում կուտակած 2.357.351 ՀՀ դրամի ազատ դրամական միջոցները ոչ թե ուղղել է իր հարկային պարտավորությունների կատարմանը, այլ տնօրինել է իր հայեցողությամբ՝ դրանք ուղղելով այլ կարիքներին:  

 

Այդ եղանակով, ըստ նախաքննական մարմնի, «Հովսար» ՍՊ ընկերությունում կանխամտածված ստեղծելով անվճարունակաթյան հատկանիշներ՝ պետությանը պատճառվել է 1.774.397 ՀՀ դրամի խոշոր վնաս։

 

Քրեական գործի դատական քննության փուլում 18.02.2014թ. կայացած դատական նիստի ժամանակ մեղադրող Ս.Պապյանը, ղեկավարվելով ՀՀ քրեական դատավարության օրենսգրքի 35-րդ հոդվածի 4-րդ մասով, նույն հոդվածի 54-րդ հոդվածի 1-ին մասի 9-րդ կետով և 306-րդ հոդվածի 4-րդ մասով, իրականացնելով իր պարտականությունները, հայտարարել է Ռադիկ  Սարգսյանի նկատմամբ ՀՀ քրեական օրենսգրքի 193-րդ հոդվածով առաջադրված մեղադրանքից հրաժարվելու մասին՝  վերջինիս արարքում հանցակազմի բացակայության հիմքով։

 

Ամբաստանյալին առաջադրված մեղադրանքից հարաժարվելու պարագայում մեղադրողը միջնորդել է Ռադիկ Սարգսյանի նկատմամբ հարուցված քրեական հետապնդումը դադարեցնել և քրեական գործի վարույթը կարճել։

 

Ամբաստանյալ Ռադիկ Սարգսյանի շահերի պաշտպան Գարիկ Մալխասյանը, մասնակի համամիտ լինելով մեղադրողի միջնորդությանը, դատարանին խնդրել է ոչ թե կարճել քրեական գործը և դադարեցնել իր պաշտպանյալի նկատմամբ հարուցված քրեական հետապնդումը, այլ նույն, այն է՝ մեղադրողի կողմից մեղադրանքից հրաժարվելու հիմքով,  կայացնել արդարացման դատավճիռ։ 

 

Դատարանը փաստել է, որ արդարացման դատավճռով ոչ միայն ճանաչվում և հռչակվում է անձի անմեղությունը նրան մեղսագրված հանրորեն վտանգավոր արարքի կատարման մեջ, այլ՝ հասարակության, անկախ դիտորդի, ինչպես նաև հենց իր՝ մեղադրվողի մոտ ստեղծում է արդարացման ու արդարացիության ընկալում, մինչդեռ քրեական հետապնդումը դադարեցնելու և քրեական գործը կարճելու մասին որոշումը չի կարող առաջացնել՝ նախ այնպիսի լայն իրավասությություններ, ինչպես արդարացման դատավճիռը, ապա նաև՝ ստեղծել այնպիսի տպավորություն, որ իրականում տեղի է ունեցել արդարադատություն: Մինչդեռ դատարանն արձանագրում է, որ արդարադատությունը ոչ միայն պետք է իրականացվի, այլ այն պետք է իրականացվի ու լինի տեսանելի և ընկալելի։ 

 

Այսպիսով, դատարանը, հիմք ընդունելով ՀՀ Սահմանադրության, «Մարդու իրավունքների համընդհանուր հռչակագրի»  և «Մարդու իրավունքների և հիմնարար ազատությունների պաշտպանության մասին» 1950թ. Եվրոպական համաձայնագրի նորմերը, ղեկավարվելով ՀՀ քրեական դատավարության օրենսգրքի 366-րդ հոդվածով, գտել է, որ ՀՀ քրեական օրենսգրքի 193-րդ հոդվածի հատկանիշներով մեղադրվող ամբաստանյալ Ռադիկ Սարգսյանի նկատմամբ պետք է կայացվի արդարացման դատավճիռ` մեղադրողի կողմից ամբաստանյալին առաջադրված մեղադրանքից հանցակազմի բացակայության հիմքով հրաժարվելու պատճառաբանությամբ։