Փաստ ինֆո

Սյունիքի նախկին մարզպետ Սուրիկ Խաչատրյանի առանձնատան մոտ տեղի ունեցած զինված միջադեպի գործով նախաքննությունը չի ավարտվել, բայց դա չի նշանակում,  որ այն շարունակվում է՝  իրավիճակը քննիչի կողմից  որպես պատրվակ է օգտագործվում  գործի նյութերը դատարան չներկայացնելու համար:  Այս մասին «Հայելի» մամուլի ակումբում  լրագրողների  հետ այսօրվա հանդիպմանը հայտարարեց  գործով մեղադրյալ Արտակ Բուդաղյանի պաշտպան Հայկ Ալումյանը:  Նա ընդգծեց, որ  մինչև այժմ գործի նախաքննության ընթացքում տեղի ունեցածը թույլ չի տալիս հուսալու, որ քննիչին թույլ կտան  օբյեկտիվ իրավական գնահատական տալ դեպքին: 

Հայկ Ալումյանը հայտնեց, որ իրենք, Սուրիկ Խաչատրյանի  որդու և  թիկնապահի նկատմամբ քրեական հետապնդումը դադարեցնելու քննիչի որոշումների  դեմ  անցյալ տարվա հոկտեմբերին դիմելով դատարան,  հույս ունեին, որ դատարանը  կիրականացնի արդարադատություն,  թեև «պատկերացնում էինք, թե ինչ ճնշումներ կարող են լինել»: Մոտ 4 ամիսների ընթացքում Ա. Բուդաղյանի  պաշտպանը համոզվել է, որ դժվար է  ակնակալել արդարադատություն  այն անձանց նկատմամբ,  ովքեր որոշակի հովանավորությունից են օգտվում:  Դատարանը  կասեցրեց Հայկ Ալումյանի դիմումի քննությունը՝   քննիչի կողմից  գործի նյութերը դատարան չներկայացնելը  գնահատելով որպես  անհաղթահարելի ուժ, և այդպիսով ձախողելով  գործի քննությունը: Ըստ պաշտպանի,   գործի քննությունը կասեցնելու դատարանի որոշումը  իրավաբանական տեսանկյունից շատ լուրջ թերություններ ունի՝    դատարանը քննիչից  պետք է պահանջեր գործի նյութերը, այլ ոչ թե սպասեր մինչև քննիչը   ինքը ցանկություն հայտնի ներկայացնել դրանք:

Հայկ Ալումյանը դիմել է Վերաքննիչ  դատարան՝  բողոքարկելով առաջին ատյանի դատարանի որոշումը,  բողոքը մերժվելու դեպքում կողմը   կդիմի  նաև Վճռաբեկ  և Մարդու իրավունքների եվրոպական դատարաններ:  Թեև հույսերը գնալով պակասում են, որ  խնդիրը արդար լուծում կստանա, սակայն կողմը հուսահատված չէ՝   վաղ թե ուշ իրականությունը կբացահայտվի,  և մեղավորները կպատժվեն:  Ըստ Հայկ Ալումյանի,   քրեական  պատասխանատվության  ենթարկվելու ենթակա են  3 հոգի և ևս մի շարք անձինք, ովքեր փորձել են  պարտակել կամ պարտակել են մեղավորներին:

Լուսանկարը՝ PanARMENIAN Photo-ի