Փաստ ինֆո

Երկրորդ թեթևագույն քաշային կարգում պրոֆեսիոնալ բռնցքամարտի աշխարհի նախկին բացարձակ չեմպիոն Վիկ Դարչինյանը նորամուտը կնշի խառը մենամարտերում:

Allboxing.ru-ն նշում է, որ հանրահայտ Ռոնդա Ռոուզի մարզիչ Էդմոնդ Թարավերդյանի հավաստմամբ, Վախթանգն արդեն պայմանագիր է կնքել տարածաշրջանային ակումբներից մեկի հետ և արդեն այս գարնանը առաջին մենամարտը կանցկացնի Ավստրալիայում: «Դա մեծ փողեր է բերում, նա երջանիկ է և ցանկանում է դա անել»,- հայտարարել է Թարավերդյանը:

Մեր հայրենակիցը նշել է, որ Դարչինյանի առաջին մրցակցի անունը, ինչպես նաև մենամարտի անցկացման ստույգ վայրը և ժամկետը կհայտարարվեն ավելի ուշ, սակայն նախնական տվյալներով հանդիպումը կանցկացվի թեթևագույն քաշային կարգի շրջանակներում և տեղի կունենա մոտավորապես ապրիլի վերջին: «Նա ասաց, որ իրեն կարճ տարածություն է պետք, որպեսզի անգամ պառկած դիրքից կոտրի մրցակցի ծնոտը: Իսկ ես նրան տեղեկացրի, որ ММА-ում ամեն ինչ շատ ավելի բարդ է, և այնտեղ մեկ հարվածով մրցակցին չես տապալի: Բայց նա պնդում է, որ իրեն փոքր տարածություն է հարկավոր մրցակցին կործանիչ հարված հասցնելու համար»,- ասել է Թարավերդյանը:

Հիշեցնենք, որ պրոֆեսիոնալ բռնցքամարտում անցկացրած 13 տարիների ընթացքում Դարչինյանը տարել է 39 հաղթանակ (28-ը նոկաուտով), կրել է 6 պարտություն, իսկ մեկ մենամարտ ավարտել է ոչ-ոքի: Վերջին հանդիպումը Վախթանգն անցկացրել է անցյալ տարվա դեկտեմբերին՝ 9-րդ ռաունդում տեխնիկական նոկաուտով պարտվելով ֆիլիպինցի Նոնիտո Դոներին: