Փաստ ինֆո

ՀՀ վարչական դատարանը՝ դատավոր Ռաֆիկ Խանդանյանի նախագահությամբ, փետրվարի 10-ին կհրապարակի  «Արմենիա Թըդեյ» լրատվական կայքի համակարգող, վերլուծաբան Արգիշտի Կիվիրյանի՝  այսօր դատարանին  ներկայացված ինքնաբացարկի միջնորդության վերաբերյալ որոշումը:  Միջնորդությունը  ներկայացվել է ՀՀ ոստիկանության Երևան քաղաքի վարչության Արաբկիրի բաժինն ընդդեմ Արգիշտի Կիվիրյանի՝ վարչական պատասխանատվության ենթարկելու  մասին հայցադիմումի գործի շրջանակում:

Ա.Կիվիրյանը  «Փաստինֆո»-ի լրագրողի հետ զրույցում նշեց, որ իրենք լուրջ կասկածներ ունեն  առ այն, որ դատավորն անաչառ չէ,  սույն  գործով ցուցաբերում է կանխակալ մոտեցում: Ըստ Ա.Կիվիրյանի, դրա մասին է վկայում, մասնավորապես, այն  փաստը,  որ անցած դատական նիստին անհիմն կերպով դատարանը արգելել է լրագրողներին  տեսաձայնագրություն կատարել, դա այն դեպքում, որ նման   հրապարակային գործերի պարագայում  լրագրողների կողմից տեսաձայնագրության իրականացումը կապահովի ոչ միայն լրագրողների  մասնագիտական պարտականությունների կատարումը,  այլև  հասարակության տեղեկացվածությունը  գործի վերաբերյալ:  
Ոստիկանությունն առարկել էր տեսաձայնագրություն կատարելու միջնորդության դեմ՝ հայտարարելով, որ  իրենք կկաշկանդվեն տեսաձայնագրությունից:  Ա.Կիվիրյանը առարկել էր  ոստիկանության  հայտարարության դեմ՝  ոստիկանության գործողությունները համեմատելով  մանկապարտեզի հետ և «արժանացել» դատական սանկցիայի՝ նկատողության:

«Այդ ամբողջը մեզ հիմք է տալիս եզրակացնելու, որ  դատարանը անաչառ չէ ու ցուցաբերում է կանխակալ մոտեցում»,- նշեց Արգիշտի Կիվիրյանը:

«Վարչական  իրավախախտման»  էությունը հետևյալն է՝  սեպտեմբերի 4-ին Բաղրամյան 26-ի դիմաց տեղի է ունեցել բողոքի ակցիա Մաքսային միությանը անդամակցելու   հայտարարության կապակցությամբ,  այդտեղից ոստիկանություն  բերման են ենթարկվել մի շարք անձինք:  Արգիշտի Կիվիրյանը՝  որպես «Արմենիա Թըդեյ»  լրատվական կայքի համակարգող,  գնացել է ոստիկանության  Արաբկիրի  բաժին՝  տեղեկանալու բերման ենթարկված անձանց ճակատագրի մասին: Ավելի քան երեք ժամ ոստիկանության բաժնի դիմաց սպասելուց հետո, ըստ Ա.Կիվիրյանի, ավելի քան 10 ոստիկաններ  ոստիկանության բաժնի դիմացից իրեն բռնի կերպով  ներս են մտցրել բաժին, անհիմն կերպով վարչական վարույթ սկսել՝  ոստիկանության աշխատակցի պահանջը չկատարելու  համար:  «Ինձ որևէ օրինական պահանջ չի ներկայացվել այդ կապակցությամբ,  եթե ներկայացվել է, ինչո՞ւ ես Բաղրամյան 26-ից չեմ բերման ենթարկվել, այլ  Արաբկիրի ոստիկանության բաժնի շենքի դիմացից, ինչի մասին վկայում են բազմաթիվ տեսաձայնագրություններ»,- ասաց Ա.Կիվիրյանը՝ հայտարարելով, որ ինչպես իր  դեմ մյուս  վարչական գործերի, այնպես էլ քրեական գործի հարուցմամբ  Հայաստանի իշխանությունները՝ ոստիկանության ձեռքերով, ընդամենն իր  նկատմամբ իրականացնում են քաղաքական հետապնդում՝ իր հասարակական ու լրագրողական գործունեության հետ կապված: