Փաստ ինֆո

Այսօր Երևանի Կենտրոն և Նորք-Մարաշ վարչական շրջանների դատարանում սկսվեց ՀՀ Ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի 1-ին բաժանմունքի ավագ քննիչ, ոստիկանության կապիտան Էդգար Պետրոսյանի դեմ գործով դատաքննությունը:

Ըստ մեղադրանքի՝ 36-ամյա քննիչն իր վարույթում քննվող քրեական գործով մեղադրյալ Արթուր Հովհաննիսյանի օգտին ՀՀ քրեական դատավարության օրենսդրությամբ սահմանված իր լիազորությունների շրջանակում գործողություն կատարելու, այն է` նրա նկատմամբ ՀՀ քրեական օրենսգրքի 178-րդ հոդվածի 1-ին մասով՝ Խարդախությունը, հարուցված քրեական հետապնդումը դադարեցնելու և գործով վարույթը կարճելու համար «շորթմամբ, սպառնալով՝   ոտնահարել է  նրա` օրենքով պաշտպանվող շահերը և իրավունքները, պահանջել և 2013 թվականի նոյեմբերի 28-ին` ժամը 10.00-ի սահմաններում, ՀՀ Ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի իր աշխատասենյակում Արթուր Հովհաննիսյանից ստացել է խոշոր չափերի`403  910 ՀՀ դրամին համարժեք 1000 ԱՄՆ դոլար կաշառք»:

Ամբաստանյալն իրեն մեղավոր չճանաչեց  առաջադրված մեղադրանքում:  Ավելին՝ նա ու նրա  պաշտպան Սամվել Հովհաննիսյանը նշեցին, թե հստակ  չէ  մեղադրանքում առկա  ձևակերպումն առ այն, որ  «շորթմամբ, սպառնալով, ոտնահարել է օրենքով պաշտպանված իրավունքներն ու շահերը»: Կողմին, մասնավորապես, պարզ չէ, թե ո՞ր օրենքով պաշտպանվող  ո՞ր շահերն  և ո՞ր իրավունքներն են ոտնահարվել:

Երևանի Կենտրոն և Նորք-Մարաշ վարչական շրջանների դատարանի՝ դատավոր Մնացական Մարտիրոսյանի նախագահությամբ, սահմանված ապացույցների հետազոտման կարգի համաձայն, այսօր նախ հարցաքննվեց տուժող Արթուր Հովհաննիսյանի հայրը՝ Սուրիկ Հովհաննիսյանը:  Վկան հայտնեց, որ   Սեդային  իր նկարները վերադարձնելուց հետո վերջինս ստորագրեց, որ  Արթուր Հովհաննիսյանից պարտք ու պահանջ չունի:  «Ասել ե՞ք, որ  վերջ,  գործը փակվեց» հարցին  վկան պատասխանեց՝  «միգուցե հարցրած լինեմ հիմա ի՞նչ պետք է անեմ»:  Վկան որդուն խորհուրդ է տվել հաջորդ անգամ քննիչի մոտ ներկայանալ փաստաբանի հետ, ըստ վկայի, որդին  հետագայում չէր ասում, թե  ի՞նչ ընթացքում է գործը:

Վկան ի պատասխան դատարանի հարցի,  հայտնեց, որ որդին մեկնել է Հայաստանից՝  «Դո՞ւք եք ճանապարհել» հարցին՝  պատասխանեց՝ «մոտավորապես»:

Քանի որ տուժողը պատշաճ ծանուցված է եղել նիստի օրվա մասին, սակայն չի ներկայացել  ու չի ներկայացրել դատարան ներկայանալուն խոչընդոտող հանգամանքները, դատարանը  որոշեց  բերման ենթարկել տուժողին:

Դատարանը  տուժողի  բացակայության մասին պաշտոնական տեղեկություն ստանալու համար  նաև հարցումով կդիմի   ոստիկանության  քրեական հետախուզության գլխավոր վարչությանը:

Մինչև ապացույցների հետազոտման ավարտը  դատարանը հետաձգեց  գործից բացակայող նյութեր պահանջելու, ինչպես նաև երկու անձի որպես վկա դատակոչելու մասին պաշտպանական կողմի մի շարք միջնորդությունների քննարկումը: