Փաստ ինֆո

Ազգային ժողովի «Ժառանգություն» խմբակցության անդամ, ՀՀ նախկին արտգործնախարար Ալեքսանդր Արզումանյանը դրական է վերաբերվում «Որոտան» ՀԷԿ-երի համալիրը ամերիկյան «Քոնթուր գլոբալ» ընկերությանը վաճառելու փաստին։

«Գոնե պետք է տաս մեկին, ով 100 տոկոսով չի տիրապետում քո ունեցվածքը»,-պարզաբանեց նա՝ հավելելով, որ իր դիրքորոշումը բնավ պայմանավորված չէ նրանով, որ ՀԷԿ-երի համալիրը չի օտարվել հատկապես ռուսներին: «Եթե Հայաստանում ամերիկացիները տիրապետեին ամբողջ մեր ունեցվածքին, ես կպահանջեի, որ ռուսներին տային: Հարցը ռուսը չէ, թող Իրանը գա առնի: Ինձ համար նշանակություն չունի՝ ֆրանսիացին, իրանցին թե ով է: Բիզնեսը հայրենիք չունի: Այստեղ խոսքը մի բանի մասին է, որ մի պետությունը տիրանում է մյուս պետության ստրատեգիական բոլոր կարևորագույն ոլորտներին»,-ասաց Ա.Արզումանյանը՝ հավելելով, որ ինքը «պոտենցիալ ռուսատյաց» չէ:

Ի պատասխան «Փաստինֆո»-ի թղթակցի հարցի՝ ընդդիմադիր պատգամավորը նշեց, որ ինքն իհարկե անթույլատրելի է համարում այն, որ այս գործարքով երկրի էներգետիկ համակարգի բոլոր օբյեկտներն այլևս օտարված են: «Հիմա պետք է պայքարենք, որ հետ բերենք»,-ասաց նա:

Նշենք, որ մեկ այլ ընդդիմադիր պատգամավոր, ՀՀ նախկին վարչապետ Հրանտ Բագրատյանը ֆեյսբուքի իր էջում՝ անդրադառնալով այս վերջին գործարքին, նշել է.  «Տպավորություն ունեմ, որ սա արվել է բացառապես ամերիկացիների «բարկությունը» մեղմելու համար։ Կառավարությունը սրանով Հայաստանին զրկեց սեփական էներգետիկայից։ Կասկադը վաճառվել է ամենաքիչը 4 անգամ ավելի էժան։ «Քոնթուր գլոբալ հիդրոկասկադը» առաջիկա 6 տարիներին 70 մլն կներդնի։ Ներեցեք, բայց առանց այդ ընկերության մենք 6 տարում նորմատիվներով ավելի շատ կներդնեինք ընկերության շահույթից։ Արդյունքում, առանց կասկածի, մի քանի տարի հետո այս համալիրը կվաճառվի մի քանի անգամ ավելի թանկ գնով։ Մեր կառավարությունը ուժեղ երկրների առաջ քծնելու (ավելի վաղ գերշահավետ պայմաններ էին տրամադրվել ռուսներին) բացառիկ հատկություններով է օժտված»։

Լուսանկարը՝ PanArmenian Photo