Փաստ ինֆո

Փետրվարի 13-ին ՀՀ վերաքննիչ քաղաքացիական դատարանը՝ դատավոր Իսկուհի Վարդանյանի նախագահությամբ, կհրապարակի ՀՀ  նախկին նախագահ Ռոբերտ Քոչարյանը  և նրա որդի   Սեդրակ Քոչարյանն ընդդեմ   «Առաջին լրատվական»   և  «Սկիզբ Մեդիա Կենտրոն»  ՍՊ ընկերությունների գործով վերաքննիչ բողոքի վերաբերյալ որոշումը:

Այն  այսօր  դատարանում քննվում էր պատասխանող ընկերությունների ներկայացուցիչ Նիկոլայ Բաղդասարյանի բողոքի հիման վրա: Ըստ պատասխանող կողմի ներկայացուցչի, առաջին ատյանի դատարանը թույլ է տվել Քաղաքացիական դատավարության օրենսգրքի նորմերի խախտում՝  հայցվոր կողմը միայն  դատաքննության փուլում է ներկայացրել ապացույց, որ  «Սկիզբ Մեդիա Կենտրոն»  ՍՊ ընկերությունը «Ժամանակ» թերթի հիմնադիրն է, մինչդեռ ապացույցը պետք է ներկայացվեր մինչև դատաքննությունը սկսվելը:  Ապացույցն, ըստ կողմի,  դրվել է վճռի հիմքում՝ այդպիսով հանգեցնելով գործի  սխալ լուծմանը:  Բացի այդ,  պատասխանող կողմը գտնում է, որ հայցադիմումում չի հստակեցվել, թե պատասխանողներից յուրաքանչյուրից որքան գումար է պահանջում՝ որպես տեղեկատվությամբ պատճառված վնասի հատուցում: Իսկ դատարանն էլ, ըստ կողմի, այդ անորոշ հայցադիմումի հիման վրա  վճռով պարտավորեցրել է «Սկիզբ Մեդիա Կենտրոն»  ՍՊ ընկերությունից հօգուտ Ռոբերտ Քոչարյանի և Սեդրակ Քոչարյանի  բռնագանձել   500.000     ՀՀ դրամ գումար` որպես պատվին և արժանապատվությանը զրպարտությամբ պատճառված վնասի փոխհատուցման գումար: Պատասխանող կողմը միջնորդում է վերադաս դատարանին բեկանել և փոփոխել վճիռը և մերժել հայցադիմումը:

Հայցվոր կողմի ներկայացուցիչ Արփինե Մելիքբեկյանը, հակառակը, գտնում է, որ վճիռը պետք է անփոփոխ թողնվի: Ըստ հայցվոր կողմի, պատասխանող կողմի վերաքննիչ բողոքն  ակնհայտ անհիմն է և ենթակա է մերժման:

Հիշեցնենք. որ  Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝   նախագահությամբ դատավոր  Ա. Սուքոյանի, հոկտեմբերի 21-ի վճռով մասնակի էր բավարարել հայցադիմումը՝   տարածված ապատեղեկատվությունը հերքելու, պատվին և արժանապատվությանը պատճառված վնասը փոխհատուցելու պահանջների մասին:

Դատարանը պարտավորեցրել  է «Սկիզբ Մեդիա Կենտրոն»  ՍՊ ընկերությանը՝   հերքելու  «Ժամանակ»  օրաթերթի 2012թ. նոյեմբերի 27-ի  համարում հրապարակված   «Ի՞նչ կապ ունեն Քոչարյանն ու Ծառուկյանը «Նաիրիտի»  հետ»   և 2012թ. նոյեմբերի 30-ի  համարում հրապարակված «Քոչարյանների րոպեավճարը»  խորագրերով հոդվածներում հայցվորներ Սեդրակ Քոչարյանի և Ռոբերտ Քոչարյանի պատիվն, արժանապատվությունն արատավորող /զրպարտող/ տեղեկությունները: Դատարանը պարտավորեցնում է նաև   ներկայացված Հերքման տեքստը տպագրել նույն «Ժամանակ»  օրաթերթում`   վճիռն օրինական ուժի մեջ մտնելուց հետո,   «Հերքում»  խորագրի ներքո:

Հերքման տեքստում, ըստ դատարանի վճռի, պետք է նշվի, որ  «Ժամանակ»  օրաթերթի  27.11.2012թ.  և 30.11.2012թ.-ի  համարներում Ռոբերտ և Սեդրակ Քոչարյանների մասին հրապարակված համապատասխանաբար  «Ի՞նչ կապ ունեն Քոչարյանն ու Ծառուկյանը «Նաիրիտի»  հետ»  և  «Քոչարյանների րոպեավճարը»  խորագրերով հոդվածներում տեղ գտած տեղեկությունները ամբողջությամբ չեն համապատասխանում իրականությանը և արատավորում են Ռոբերտ Քոչարյանի և Սեդրակ Քոչարյանի պատիվն, արժանապատվությունը և բարի համբավը:

Ընդ որում, հերքման տեղակայման, ձևավորման, տառատեսակի չափը ու տեսակը պետք է չզիջի  «Ժամանակ»  օրաթերթի 2012թ. նոյեմբերի 27-ի համարում հրապարակված   «Ի՞նչ կապ ունեն Քոչարյանն ու Ծառուկյանը  «Նաիրիտի»  հետ»  և 2012թ. նոյեմբերի 30-ի համարում  հրապարակված   «Քոչարյանների րոպեավճարը»  խորագրերով հոդվածների տեղեկատվությանը:

Վճռով «Սկիզբ Մեդիա Կենտրոն»  ՍՊ ընկերությունից հօգուտ Ռոբերտ Քոչարյանի և Սեդրակ Քոչարյանի պետք է  բռնագանձվի  500.000     ՀՀ դրամ գումար` որպես պատվին և արժանապատվությանը զրպարտությամբ պատճառված վնասի փոխհատուցման գումար (հայցադիմումով  հայցվոր կողմը պահանջում էր  վնասի հատուցում՝ 5.000.000 ՀՀ դրամի չափով):

Դատարանը մերժել է  Ռոբերտ Քոչարյանի և Սեդրակ Քոչարյանի հայցն ընդդեմ    «Առաջին լրատվական»  ՍՊ ընկերության` տարածված ապատեղեկատվությունը հերքելու, պատվին և արժանապատվությանը պատճառված վնասը փոխհատուցելու պահանջների մասին:

«Սկիզբ Մեդիա Կենտրոն»  ՍՊ ընկերությունից հօգուտ Ռոբերտ Քոչարյանի և Սեդրակ Քոչարյանի վճռով պետք է բռնագանձվի  100.000 ՀՀ դրամ` որպես փաստաբանական ծախսի գումար, նույնքան  գումար  որպես փաստաբանական ծախսի գումար  պետք է բռնագանձվի  Ռոբերտ Քոչարյանից և Սեդրակ Քոչարյանից՝   հօգուտ «Առաջին լրատվական»  ՍՊ ընկերության: