Փաստ ինֆո

Ուկրաինայի նախագահ Վիկտոր Յանուկովիչը անհրաժեշտ է համարում հրավիրել խորհրդարանի՝ Գերագույն Ռադայի արտահերթ նիստ՝ քննարկելու երկրում ստեղծված իրավիճակը։ Այս մասին Ուկրաինայի նախագահն ասել է  Գերագույն Ռադայի նախագահ Վլադիմիր Ռիբակի հետ հանդիպման ժամանակ։

«Գիտեք, որ զանգվածային անկարգությունները, որոնք տեղի են ունենում վերջերս, ուղեկցվում են բռնություններով, հրկիզումներով, արյունահեղությամբ։ Այսինքն, իրավիճակը պարտադրում է անհապաղ լուծում»,- ասել է երկրի նախագահը։ «Ես կխնդրեի Ձեզ՝ կոչ անել պատգամավորներին հավաքվել եւ քննարկել իրավիճակը»,- ընդգծել է նա։

Ուկրաինայի նախագահի համոզմամբ,  խորհրդարանը պետք է դառնա քաղաքական ճգնաժամի հաղթահարմանն ուղղված միջոցառումների հարթակը։

«Այն բանակցությունները, որոնք ընթանում են իմ եւ ընդդիմության միջեւ,  քաղաքական ճգնաժամի հաղթահարման մի մասն է։ Իսկ երկորդ մասում՝  բանավեճը պետք է տեղափոխվի խորհրդարան։ Իմ բանակցությունների ընթացքում, ինչպես նաեւ նստաշրջանի նախապատրաստման ժամանակ ժողովրդական պատգամավորների հետ մշակված առաջարկությունները պետք է քննարկվեն խորհրդարանում»,- նշել է  Վիկտոր Յանուկովիչը։ Նա ընդգծել է  խորհրդարանի աշխատանքը շարունակելու անհրաժեշտությունը՝ չնայած պատգամավորների արձակուրդին։

Ի պատասխան ԳՌ-ի նախագահ Վլադիմիր Ռիբակը նշել է, որ երկրում ձեւավորված իրավիճակի պատճառով «արձակուրդը կլինի ավելի ուշ»։