Փաստ ինֆո

«Կոշ» ՔԿՀ-ի դատապարտյալը՝ 28-ամյա  Պեպանյանը, փորձել է իր ծանոթ աղջկանից գումար կորզել՝ սպառնալով հրապարակել նրան վարկաբեկող տեղեկություններ, այդ թվում իրենց ինտիմ բնույթի հեռախոսազրույցների ձայնագրությունները։

Քրեական գործի նախաքննությամբ պարզվել է, որ դատապարտյալը ինտիմ բնույթի հեռախոսազրույցներ է ունեցել Նունեի հետ, ապա  «Օdnoklassnik.ru» -ում «NUNE JAN» անվամբ էջ է ստեղծել, որտեղ տեղադրել է աղջկա հեռախոսահամարը, լուսանկարները,  պոռնկագրական բնույթի այլ լուսանկարներ, վիրավորական մեկնաբանություններ։ Դատապարտյալը պարբերաբար զանգահարել է նրան և միմյանց միջև ունեցած ինտիմ բնույթի հեռախոսազրույցների ձայնագրությունները հրապարակելու սպառնալիքով 2013թ. սեպտեմբերին պահանջել է խոշոր չափի՝ 3000 ԱՄՆ դոլար։ Աղջիկն ունեցել է այնքան զգոնություն, որ դիմակայել է բարոյական ճնշմանը եւ 3 հազար դոլարի փոխարեն դատապարտյալի ծանոթուհու՝  Դիանայի  անվամբ փոխանցել շուրջ 1 դոլարին համարժեք 400 ՀՀ դրամ։

 Դատապարտյալ Պեպանյանին մեղադրանք է առաջադրվել ՀՀ քրեական օրենսգրքի 182-րդ հոդվածի 2-րդ մասի 3.1 կետերով: Հասկանալի պատճառներով նրա նկատմամբ խափանման միջոց չի ընտրվել, բայց,  թե որտեղ են եղել ՔԿՀ-ի վարչակազմը, որ դատապարտյալը, այդպես ազատ հաղորդակցվել և նման գործողություններ ծավալել բջջային հեռախոսով, այն դեպքում, երբ  քրեակատարողական հիմնարկներում բջջային հեռախոսն արգելված է, քննությանը թերեւս այնքան էլ չի հետաքրքրել: Համենայն դեպս, գործով նա միակ մեղադրյալն է։