Փաստ ինֆո

«Կուտակային կենսաթոշակների մասին» օրենքի 5-րդ, 7-րդ, 8-րդ, 37-րդ, 38-րդ, 45-րդ, 49-րդ և 86-րդ հոդվածների՝ 2014թ.-ի հունվարի 1-ից գործողության մեջ դրվելիք պարտադիր կուտակային բաղադրիչի հետ կապված դրույթների սահմանադրականությունը վիճարկող Ազգային ժողովի ոչ իշխանական չորս՝ ՀՅԴ, «Բարգավաճ Հայաստան», «Հայ ազգային կոնգրես» և «Ժառանգություն» խմբակցությունների ներկայացուցիչների դիմումի հիման վրա գործը Սահմանադրական դատարանը քննության կառնի 2014թ.-ի մարտի 28-ին: Ինչպես «Փաստինֆո»-ն ավելի վաղ հայտնել էր, այս մասին ՍԴ-ն որոշում է ընդունել դեկտեմբերի 26-ի աշխատակարգային նիստում:

Հաշվի առնելով դիմող կողմի միջնորդությունը և նկատի ունենալով, որ գործը ձեռք է բերել հասարակական մեծ հնչեղություն ու դրա բանավոր դատաքննությունը կնպաստի գործի հանգամանքների առավել արագ ու համակողմանի բացահայտմանը՝ ՍԴ-ն որոշել է գործի դատաքննությունն կազմակերպել բանավոր ընթացակարգով:

Ինչ վերաբերում է դիմող կողմի միջնորդությանը՝ մինչև գործի դատաքննության ավարտը կասեցնել «Կուտակային   կենսաթոշակների մասին» օրենքի պարտադիր կուտակային վճարներ կատարելու պարտավորությանը վերաբերող և դրանց հետ համակարգային կապի մեջ գտնվող դրույթները, ապա այն ՍԴ-ն որոշել է քննության առնել մինչև հունվարի 25-ը՝ անդրադառնալով նաև օրենքի 38-րդ՝ կենսաթոշակային ֆոնդի ընտրությունը, և 39-րդ՝  պարտադիր կենսաթոշակային ֆոնդի ընտրություն չկատարելը, հոդվածների գործողության իրավաչափությանը:

Ըստ դիմող կողմի, միջնորդությունը պայմանավորված է նրանով, որ վերոհիշյալ դրույթների «2014 թվականի հունվարի 1-ից ուժի մեջ մտնելու դեպքում մինչև գործի դատաքննության ավարտը 1974 թվականի հունվարի 1-ին և դրանից հետո ծնված աշխատող անձանց համար, ում անվանական աշխատավարձերի բարձրացումը չի փոխհատուցում պարտադիր կուտակային վճարը, կհանգեցնի փաստացի տնօրինվող աշխատավարձի և կենսամակարդակի նվազմանը, քաղաքացիների կողմից կենսաթոշակային ֆոնդի և ֆոնդի կառավարիչի չընտրելու դեպքում՝ օրենքով նախատեսված պահանջի խախտմանը, ինչպես նաև պետության կողմից ստանձնելիք երաշխիքների անհամաչափ բեռնվածությանը»:

ՍԴ-ն, նկատի ունենալով, որ «Կուտակային կենսաթոշակների մասին» օրենքն ընդունվել է 2010թ.-ի դեկտեմբերին և դրա իրացումն երաշխավորելու համար համակարգային փոխկապակցվածության մեջ բազմաթիվ հոդվածներով կոնկրետ լուծումներ են վերապահվել ՀՀ կառավարությանը և Կենտրոնական բանկին,  անհրաժեշտ է համարել դատաքննությանը հրավիրել վերջիններիս պաշտոնական ներկայացուցիչներին՝  իրենց իրավասության շրջանակներում անհրաժեշտ պարզաբանումներ տալու համար:

Բացի այդ, ՍԴ-ն որոշել է պահանջել ՀՀ կառավարությունից և ԿԲ-ից մինչև հունվարի 10-ը ներկայացնել օրենքի կիրառումն ապահովելու նպատակով նախատեսված և կառավարության ու ԿԲ-ի իրավասությանը վերապահված մի շարք փաստաթղթեր: Խոսքը, մասնավորապես, օրենքից բխող՝ գործադիրի որոշումների և սահմանած կարգերի մասին է, իսկ ԿԲ-ի պարագայում՝  կենսաթոշակային ֆոնդերի գրանցման, դրանց կառավարիչներին ներկայացվող պահանջների, կառավարիչների նկատմամբ ԿԲ-ի կողմից իրականացվելիք վերահսկողության պայմանների և այլ փաստաթղթերի մասին:

Միաժամանակ՝ ՍԴ-ի խորհրդական Գևորգ Դանիելյանին և աշխատակազմի իրավախորհրդատվական ծառայությանը հանձնարարվել է մեկամսյա ժամկետում այս գործով զեկուցողներին և ՍԴ անդամներին ամփոփ տեղեկանք ներկայացնել միջազգային պրակտիկայում քննության առարկա հիմնախնդրի սահմանադրաիրավական լուծումների, վերջին տարիներին դրանց զարգացումների, Արևելյան Եվրոպայի երկրներում տնտեսական ճգնաժամի պայմաններում պարտադիր կուտակային կենսաթոշակային համակարգի գործուղության իրավակարգավորումների առանձնահատկությունների վերաբերյալ:

Ի դեպ, ՍԴ-ի աշխատակարգային որոշման համաձայն, որոշվել է գործի նյութերին կցել դիմողի պաշտոնական ներկայացուցչի կողմից ներկայացված՝ «Ընդդեմ կենսաթոշակային պարտադիր բաղադրիչի» բողոքի ցույցի մասնակիցների դեկտեմբերի 17-ի հայտարարությունը:

Նշենք, որ գործով զեկուցողներ են նշանակված ՍԴ անդամներ Կիմ Բալայանը և Վոլոդյա Հովհաննիսյանը: Դատավարությանը որպես պատասխանող կողմ ներգրավված է օրենքն ընդունած Ազգային ժողովը:   

ՍԴ-ում պատգամավորների ներկայացուցիչներն են ԱԺ ՀՅԴ խմբակցության անդամ Արծվիկ Մինասյանը, իրավապաշտպան Արտակ Զեյնալյանը և իրավաբան Մերի Խաչատրյանը: