Փաստ ինֆո

 

Ազգային ժողովի ժամանակավոր հաշվիչ հանձնաժողովում ոչ իշխանական չորս խմբակցությունների ներկայացուցիչներն այսօր՝ ժամը 17:30- ին, ՀՅԴ խմբակցության սենյակում լրատվամիջոցների առջեւ հանդես կգան կարեւոր հայտարարությամբ` կապված նախօրեին ԱԺ-ում հայ-ռուսական համաձայնագրերի վավերացման հետ:  

 

Այս մասին լրագրողներին հայտնեցին ՀՅԴ, ՀԱԿ, ԲՀԿ խմբակցությունների ղեկավարները: Վերջիններն այսօր հրավիրել էին խորհրդակցություն, որի ընթացքում քննարկել են իրենց հետագա քայլերն ու մշակել գործողությունների նոր ծրագիր: Խոսքը հայ-ռուսական համաձայնագրերի վավերացմանն է վերաբերում, որի քվեարկությանը խորհրդարանական ոչ իշխանական խմբակցությունները չմասնակցեցին, իսկ քվեարկությունը տեղի ունեցավ ձեռքով: Ձայներն էլ հաշվարկեցին հաշվիչ հանձնաժողովի 7 անդամներից 2-ը` ՀՀԿ-ից և ՕԵԿ-ից: Խորհրդակցությանը «Ժառանգություն>> խմբակցության ղեկավարը թեև չէր մասնակցում, սակայն խորհրդակցության մասնակիցները նրա հետ մշտական կապի մեջ էին:      

 

ՀՅԴ խմբակցության ղեկավար Արմեն Ռուստամյանը խորհրդակցությունից  հետո լրագրողների հետ զրույցում նշեց. «Ես կարծում եմ, որ այսօր մենք ունեցանք շատ արդյունավետ խորհրդակցություն` կապված մեր հետագա քայլերը համաձայնեցնելու խնդրի հետ, եւ մենք որոշեցինք, որ, բնականաբար, մեր՝ ՍԴ դիմելու օրակարգը պահպանվում է, բայց կան քայլեր, որոնք մենք այսօր կարող ենք ԱԺ-ի՝ մեր լիազորությունների շրջանակներում իրականացնել եւ նախապատրաստել այդ հետագա ընթացքը: Հենց այդ խնդիրների վերաբերյալ, կարծում եմ, նոր լուծումներ մենք գտանք»: 

 

Ըստ Ա.Ռուստամյանի` նոր լուծումների համաձայնությունն այսօր կայացել է, եւ ինքը կարծում է, որ հաշվիչ հանձնաժողովում ոչ իշխանական չորս խմբակցությունների ներկայացուցիչներն այսօր ժամը հինգին կհավաքվեն եւ ավելի հստակ իրենց լուծումն ու առաջարկը կներկայացնեն հանրությանը, որն «ավելի հստակ կդարձնի խմբակցությունների ասելիքը, եւ ստեղծված իրավիճակի ողջ աբսուրդն ու անօրինականությունը վեր կհանի»: 

 

Ա. Ռուստամյանը հայտնեց, որ ՍԴ կդիմեն այն ժամանակ, երբ որ որոշումը կամփոփվի տեղեկագրում, իսկ այդ գործընթացը պահանջում է ժամանակ:

 

«Եվ, այսպես ասած, այդ ժամանակը, որ մենք ունենք առաջացած այս տեխնիկական պատճառով, օգտագործելու ենք՝ ներքին պրոցեսն իրականացնելու համար, եւ այդ ներքին պրոցեսն անպայմանորեն օգտակար է լինելու, որ հետո էլ կարողանանք ավելի հիմնավորված մեր քայլերը ՍԴ-ում իրականացնենք: Բայց ես կարծում եմ, որ այն, ինչ մենք ԱԺ-ում նախատեսում ենք իրականացնել, հստակության առումով չափազանց կարեւոր  ձեռքբերում կլինի, եւ մենք մեր պատկերացումները եւ այն շփոթը, որ մեծամասնությունը փորձում է իրականացնել՝ ասելով, թե իրենք կարգը պահպանել են, այդ ամեն ինչն այդտեղ կլինի, ապացույցներ եւ փաստեր կբերվեն, եւ մենք այդ դաշտը կապահովենք, որպեսզի հանրությունն իմանա, թե որ կողմի փաստերն են ավելի հիմնավոր եւ Սահմանադրությանը համահունչ», -ընդծեց ՀՅԴ խմբակցության ղեկավարը: 

 

ՍԴ-ում, ըստ Ա. Ռուստամյանի, վիճարկվելու է այն ընթացքը, որը «երեկ տեղի է ունեցել ԱԺ-ում եւ որն անօրինական է: Քվեարկությունը եւ որոշումը, որը կայացվեց, ըստ նրա, անօրինական է, եւ, հետեւաբար, վավարեցում տեղի չի ունեցել: 

 

«Բարգավաճ Հայաստան» խմբակցության քարտուղար Նաիրա Զոհրաբյանն էլ, անդրադառնալով Դ.Հարությունյանի այն պնդումներին, թե քվեարկությունն օրինական է եղել, նշեց. «Այսպիսի ավանդույթ է ձեւավորվել, երբ որ իշխանությունը նեղն է ընկնում, դիմում են իրենց մեջի եզակի ինտելեկտուալներից մեկին, որովհետեւ Դ.Հարությունյանը հայտնի է որպես հայտնի մանիպուլյատոր, եւ Դ. Հարությունյանը,  բառախաղերով, խառնելով իրար բոլոր հոդվածները, փորձում է փրկել կատարված անօրինականության դեմքը: Չի' հաջողվելու: Ես շատ բարձր եմ գնահատում մանիպուլյացիա անելու՝ Դ.Հարությունյանի բացառիկ ունակությունը, բայց կա հստակ օրենք, կա ՀՀ Սահմանադրություն, կա ՍԴ-ի մասին օրենք, կա ԱԺ-ի գործունեությունը կարգավորող օրենք, այն է` ԱԺ կանոնակարգ- օրենքը, որը խախտվել է»: 

 

Ն.Զոհրաբյանը հավելեց նաև, որ իրավական բոլոր ճանապարհներով իրենք անցնելու են: Անդրադառնալով հաշվիչ հանձնաժողովի հաշվարկին եւ արդյունքներին՝ նա նշեց, որ ձայների հաշվարը պատշաճ ձևով պետք է իրականացներ հաշվիչ հանձնաժողովը, ինչը, սակայն, լիարժեք չի եղել, եւ, հետեւաբար, քվեարկության արդյունքներն օրինական լինել չեն կարող: «Քանի գլուխ է ներկա եղել, եւ քանիսը՝ ոչ, պարզ չէ», -նշեց ԲՀԿ խմբակցության քարտուղարը: 

 

«Հայ ազգային կոնգրես» խմբակցության  ղեկավար Լեւոն Զուրաբյանն էլ իր հերթին ընդգծեց. «Իրականում օրինական քվեարկություն տեղի չի ունեցել»:

 

«Եթե ասում են, որ հաշվիչ հանձնաժողովը հաշվել է, դա սուտ է: Հաշվիչ հանձնաժողով՝ որպես մարմին, այդ օրը գոյություն չի ունեցել  դահլիճում, ընդամենը երկու անդամ են եղել հաշվիչ հանձնաժողովի: Մեծամասնությունն ընդհանրապես այդ պրոցեսին չի մասնակցել, դա է պատճառը, որ, քննարկելով ստեղծված իրավիճակը, կարծում ենք, որ  կարող ենք Սահմանադրական դատարան դիմել միայն այն բանից հետո, երբ պաշտոնապես հրապարակվի այդ անօրինական որոշումը: Մենք հարց ենք դնելու, իսկ հաշվիչ հանձնաժողովը ե՞րբ է հաշվել և ի՞նչ օրինականություն կա այգ գործընթացի մեջ: Բացարձակ որևէ օրինականություն չկա»,-ընդգծեց նա: