Փաստ ինֆո

Երևանի Ավան և Նոր Նորք վարչական շրջանների ընդհանուր իրավասության դատարանում «Հարսնաքար»-ի գործով այսօրվա դատական նիստում պաշտպանական ճառերով հանդես եկան ամբաստանյալների պաշտպանները` ակնկալելով եթե ոչ ամբողջական, ապա գոնե մասնակի արդարացում:

Նորայր Հայրապետյանի պաշտպան Երեմ Սարգսյանի ներկայացմամբ,  Հայրապետյանը ձերբակալվել է օրենքի, մարդու իրավունքների կոպիտ խախտմամբ: Ըստ փաստաբանի,  Նորայր Հայրապետյանի վերաբերյալ քրեական գործում ընդհանրապես որևէ տվյալ չի եղել մինչեւ նրա ներկայանալը` թե որպես վիճաբանության մասնակից, թե որպես ականատես, կամ նույնիսկ  անուղղակիորեն այդ միջադեպի հետ առնչություն ունեցող անձ:  Բայց վարույթն իրականացնող մարմնին, փաստաբանի խոսքով,  դա չի խանգարել, որ առանց որևէ ապացույցի և փաստական տվյալի Նորայր Հայրապետյանին, օրենքով սահմանված կարգի կոպիտ խախտմամբ, ձերբակալի հենց Վահե Ավետյանին ծեծի ենթարկելու և նրա առողջությանը դիտավորությամբ ծանր վնաս պատճառելու կասկածանքով:

Երեմ Սարգսյանը գտնում է, որ սա իրավական կամայականության ակնհայտ դրսևորում է և կատարվել է ընդամենը հասարակական պահանջը բավարարելու, վրդովմունքը փոքր-ինչ մեղմելու նկատառումներից ելնելով: Մեղադրողների ճառերը խոսում են այն մասին, որ նրանց համար այս ողջ դատաքննությունը նույնպես ձևական բնույթ է կրել անկախ դրա ընթացքում ձեռք բերված ապացույցներից, միևնույն է մեղադրողները հիմնավոր էին համարելու առաջադրված մեղադրանքները և անհամեմատ խիստ պատիժ էին միջնորդելու ամբաստանյալների համար, որպեսզի հասարակական «պահանջը» վերջնականապես բավարարվի և արդարության վերականգնման պատրանք ստեղծվի: Հենց հասարակության համար պետք է ցավալի և անընդունելի լինի, եթե Դատարանը արդարադատություն իրականացնելու իր առաքելության փոխարեն նույնպես կաշկանդվի հասարակական կարծիքով և գործի նույն տրամաբանությամբ` դատավճիռ կայացնելիս նույնպես հաշվի չառնի դատաքնությամբ ձեռք բերված ապացույցները, այլ գործի այդ նույն հասարակական պահանջը բավարարելու նկատառումներից ելնելով:
Հատկանշական է նաև, որ Նորայր Հայրապետյանը մյուս բոլոր ամբաստանյալներից ամենաուշն է հարցաքննվել և նույնիսկ այն պայմաններում, որ մյուս բոլոր ամբաստանյալները հերքել էին իրենց մասնակցությունը տեղի ունեցած վիճաբանությանը, Նորայր Հայրապետյանն իր առաջին իսկ ցուցմունքով խոստովանել է, որ հաճախորդներից մեկին ապտակել է իրեն ծնող հայհոյելու պատճառով:

Փաստաբանի կարծիքով,  անհերքելիորեն հաստատվել է, որ Նորայր Հայրապետյանը տուժողներին ծեծի ենթարկելու նախնական և միասնական դիտավորություն, նպատակ չի ունեցել, իր գործողություններով դիտավորյալ կերպով չի լրացրել որևէ այլ անձի գործողություն, իսկ տուժողներ Գարիկ Սողոմոնյանին և Վահե Ավետյանին էլ հարվածել է միայն իրենց միջև հանկարծակի առաջացած անձնական կոնֆլիկտի, մասնավորապես նրանց կողմից հայհոյանքներ տալու և Վահե Ավետյանի կողմից իր քունքային հատվածում հարված հասցնելու պատճառով:

Պաշտպանը դատարանին խնդրեց իր պաշտպանյալի արարքին տալ ճիշտ իրավական գնահատական: Մասնավորապես, եթե դատարանը հաստատված կհամարի, որ հենց նրա հարվածների հետևանքով ստացած մարմնական վնասվածքների պատճառով է վրա հասել Վահե Ավետյանի մահը, ապա Նորայր Հայրապետյանին ՀՀ քրեական օրենսգրքի 112-րդ հոդվածի 2-րդ մասի  6-րդ և 14-րդ կետերով, 113-րդ հոդվածի 2-րդ մասի 1-ին և 3-րդ կետերով, ինչպես նաև` 118-րդ հոդվածով առաջադրված մեղադրանքը վերավորակել և նրան մեղավոր ճանաչել ՀՀ քրեական օրենսգրքի 112-րդ հոդվածի 2-րդ մասի 14-րդ կետով և 118-րդ հոդվածով և նրա նկատմամբ որպես պատիժ նշանակել այդ հոդվածների սանկցիաներով սահմանված նվազագույն պատիժները, իսկ ՀՀ քրեական օրենսգրքի 113-րդ հոդվածի 2-րդ մասի 1-ին և 3-րդ կետերով առաջադրված մեղադրանքում նրան ճանաչել անպարտ և արդարացնել:

Պաշտպանական ճառով հանդես եկավ նաև Արթուր Բաբլոյանի պաշտպան Արման Խաչատրյանը, ով միջնորդեց իր պաշտպանյալին ճանաչել անմեղ և եթե դատարանը հետազոտված ապացույցների հիման վրա հաստատված կհամարի ամբաստնյալ Արթուր Բաբլոյանի կողմից քրեական օրենսգրքի 113-րդ հոդվածի 1-ին մասով նախատեսված հանցագործությունը կատարելու հանգամանքը, և այդ արարքի համար վերջինս ենթական կլինի քրեական պատասխանատվության և պատժի, ապա պաշտպանը միջնորդեց ամբաստանյալ Բաբլոյանի նկատմամբ կիրառել համաներում և Բաբլոյանի մասով կարճել քրեական գործի վարույթը:

Հաջորդ` դեկտեմբերի 25-ին կայանալիք դատական նիստին պաշտպանական ճառով հանդես կգան մյուս ամբաստանյալների պատպանները: