Փաստ ինֆո

«ՄԻՊ գրասենյակն արդարադատության ոլորտի վերաբերյալ այլևս ոչ մի ասելիք չունի»,-«Փաստինֆո»-ին ասաց ՄԻՊ մամուլի քարտուղար Նաիրա Կարմիշալյանը`պատասխանելով մեր այն հարցին, թե արդյո՞ք Պաշտպանը պատրաստվում է որևէ կերպ արձագանքել իր զեկույցի վերաբերյալ պետական կառույցների անդրադարձներին:

Հիշեցնենք, դեկտեմբերի 9-ին ՀՀ մարդու իրավունքների պաշտպանը դատական համակարգին նվիրված արտահերթ զեկույց էր հրապարակել, որում լուրջ մեղադրանքներ էր հնչեցրել դատավորների հասցեին` նրանց մեղադրելով կոռուպցիայի և կաշառակերության մեջ:
Ի պատասխան` իրավապահ կառույցները ՄԻՊ-ից հանցագործությունների մասին կոնկրետ փաստեր պահանջեցին, իսկ դատական համակարգի ներկայացուցիչները հանդես եկան փոխադարձ կոշտ հայտարարություններով:

Եվ ահա, զեկույցի հրապարակումից ու դրան հետևած աղմուկից 10 օր անց, ՄԻՊ գրասենյակը հայտարարում է, որ ասվածին ավելացնելու այլևս ոչինչ չունի:

Ի դեպ, ՄԻՊ-ի զեկույցը, հակառակ պետական կառույցների, բավական լավ ընդունվեց հատկապես քաղաքացիական հասարակության կողմից, թե ինչն է դրա պատճառը, փորձեցինք պարզել հենց հասարակական կառույցների ներկայացուցիչներից:

Մեր զրուցակից Հայաստանի Հելսինկյան կոմիտեի նախագահ Ավետիք Իշխանյանն, օրինակ, նշեց, որ այն փաստերը, որոնք բերված են ՄԻՊ-ի զեկույցում իրեն վաղուց հայտնի են: «Ինչ որ այնտեղ գրված էր այդ բոլոր դեպքերի հետ մենք առնչվել ենք: Նույնիսկ կոնկրետ դեպքեր են եղել, երբ մարդիկ դիմել են մեզ, և, երբ մենք ուզել ենք բարձրաձայնել, ասել են, դա իրենց գործին կխանգարի, նույնիսկ եղել է դեպք, երբ գործը առաջին ատյանում է եղել և քաղաքացուց պահանջել են որոշակի գումար ու ասել` կարո՞ղ եք դուք պահել այդ գործը, այդ որոշումը վերին ատյաններում, թե՞ ես ինքս շարունակեմ, այսինքն, նման դեպքերի հետ մենք առնչվել ենք»,- ասաց Ավետիք Իշխանյանը: Ինչ վերաբերում է զեկույցում հստակ նշված կաշառքի չափերին, Ավետիք Իշխանյանը, դժվարացավ նշել, թե որքանով է այդ տեղեկատվությունը համապատասխանում իրականությանը, նշելով. «չափերը չեմ կարող ասել, չափերը տարբեր են»:

Դատական համակարգում կաշառքի չափերի մասին չխոսեց նաև «Քաղաքացիական հասարակություն ինստիտուտ» ՀԿ նախագահ Արման Դանիելյանը: «Ցավոք սրտի այսօր հասարակությունը վստահում է, թեկուզ առանց հիմնավորման բերված այդ թվերին, քան պետական մարմինների հավաստիացմանը, թե նման բան չկա, և սա ինքնին արդեն խոսուն փաստ է»,- նշեց Ա.Դանիելյանը` մեկնաբանելով զեկույցի նկատմամբ հասարակական սեկտրի արձագանքը:

Ինչ վերաբերում է պետական կառույցների բուռն արձագանքին, ապա Ա.Իշխանյանը դա տարօրինակ չի համարում` հիշեցնելով ՀՀ մարդու իրավունքների նախկին երկու պաշտպանների զեկույցների նկատմամբ պետական համակարգի նույնպիսի արձագանքները: «Հիշենք Լարիսա Ալավերդյանի զեկույցը, երբ միանգամից պատասխան տրվեց և’ Գլխավոր դատախազության կողմից, և’ Դատական դեպարտամենտի թե Վճռաբեկ դատարանի կողմից, արդեն չեմ հիշում, և’ Արդարադատության նախարարության կողմից, նույնը նաև երկրորդ պաշտպանի զեկույցը, և հիմա էլ այս երրորդ զեկույցը, և երեքն էլ դատական համակարգի վերաբերյալ»,- ասաց մեր զրուցակիցը:

Հեղինակ` Նելլի Դանիելյան