Փաստ ինֆո

 

Անչափահաս աղջկան առևանգելու մեջ մեղադրվող ընկերախմբի անդամներից վերջինն ինքնակամ ներկայացել է իրավապահ մարմիններին, նախաքննական մարմինը վերսկսել է կասեցված մասի քննությունը, իսկ դատարանն էլ՝ կայացրել  մեղադրական դատավճիռ: 

 

Ըստ մեղադրանքի՝ ամբաստանյալ Գևորգ Հարությունյանը 2012 թվականի մայիսի 2-ին իր ընկերոջ` Կորյուն Գևորգյանի խնդրանքով, վերջինիս համար ամուսնության նպատակով՝ անչափահաս  աղջկան առևանգելու վերաբերյալ նախնական համաձայնության է եկել և իրենց ընդհանուր ընկեր Քաջիկ Մուսայելյանի հետ նույն օրը Երևանի «Էրեբունի» բժշկական քոլեջի 3-րդ մասնաշենքի դիմացից բռնություն գործադրելու եղանակով առևանգել են աղջկան:  Մասնավորապես,  Կորյուն Գևորգյանը թիկունքից, իսկ Քաջիկ Մուսայելյանը և Գևորգ Հարությունյանը ոտքերից բռնելով  աղջկան ուժով նստեցրել են տաքսի ավտոմեքենան, որն անմիջապես շարժվել է և բացահայտ առևանգված աղջիկը տեղափոխվել  է Կոտայքի մարզի Քանաքեռավան գյուղ, որտեղից Գևորգ Հարությունյանը նույն տաքսի ավտոմեքենայով հեռացել է։

 

Ամբաստանյալ Գևորգ Հարությունյանը մինչև դատաքննությունն սկսելը միջնորդել է դատարանին կիրառել դատական քննության արագացված կարգ՝ հայտարարելով, որ համաձայն է ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերով՝  մի խումբ անձանց  կողմից  նախնական համաձայնությամբ անչափահասին  առևանգելը, իրեն առաջադրված մեղադրանքի հետ և իրեն լիովին մեղավոր է ճանաչում։ Դատարանը բավարարել է միջնորդությունը: 

 

Երևանի Էրեբունի և Նուբարաշեն վարչական շրջանների ընդհանուր իրավասության դատարանը՝ դատավոր Վլադիմիր Գրիգորյանի նախագահությամբ, դեկտեմբերի 13-ի դատավճռով  ամբաստանյալ Գևորգ  Հարությունյանին մեղավոր  է  ճանաչել ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերով  և նրան դատապարտել պայմանական ազատազրկման՝ 4  տարի ժամկետով՝  1 տարվա  փորձաշրջանով։

 

Դատարանը որպես ամբաստանյալի  պատասխանատվությունը և պատիժը մեղմացնող հանգամանքներ է դիտել անկեղծորեն զղջալը, նախկինում դատվածություն չունենալը, դրական բնութագրվելը, ինչպես նաև այն, որ ամբաստանյալի մոտ, ըստ պաթոլոգաանատոմիական հետազոտության տվյալների, առկա է ոսկրաաճառային, սրունքի վերին երրորդի և ստորին երրորդի երկու կտոր, խոնդրո-սարկոմա՝ բազմակի էկդոստոզի հիմքի վրա, ամբաստանյալը կարիք ունի մշտական հետազոտության և բժշկական հսկողության։

 

Դատարանը  հաշվի է առել նաև այն հանգամանքը, որ «Կորյուն Գևորգյանը հանցագործության կատարման մեջ ցուցաբերել է առանձնապես ակտիվ դեր` նախաձեռնելով և կազմակերպելով նշված հանցագործության կատարումը, որի մեջ ներգրավել է ամբաստանյալ Գևորգ Հարությունյանին, իսկ վերջինս՝ որպես ընկեր, ընկնելով Կորյուն Գևորգյանի ազդեցության տակ, թեթևամտորեն չի կանխատեսել նշված ծանր հանցանքի կատարման մեջ իր ներգրավվածության համար առաջացող քրեաիրավական հետևանքների բնույթն ու ծանրությունը»։ Հաշվի է առնվել նաև, որ Կորյուն Գևորգյանն ու  առևանգված աղջիկն ամուսնացել են: 

 

Նշենք, որ ավելի վաղ, Երևանի Էրեբունի և Նուբարաշեն վարչական շրջանների ընդհանուր իրավասության դատարանի՝ 27.02.2013թ. դատավճռով Կորյուն Գևորգյանը և Քաջիկ Մուսայելյանը մեղավոր են ճանաչվել ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերով և դատապարտվել  համապատասխանաբար 4  տարի 6 ամիս և 4 տարի ժամկետով ազատազրկման:  ՀՀ վերաքննիչ քրեական դատարանի՝ 23.04.2013թ. որոշմամբ  պատժի մասով դատավճիռը փոփոխվել է՝ որոշվել է պայմանականորեն չկիրառել պատիժը և սահմանել փորձաշրջան՝ 1  տարի ժամկետով։