Փաստ ինֆո

Դորտմունդի «Բորուսիան» ֆուտբոլի Չեմպիոնների լիգայի խմբային մրցաշարի վերջին խաղում հյուրընկալվելիս 2:1 հաշվով հաղթելով Մարսելի «Օլիմպիկին»՝ F քառյակի առաջին տեղից անցավ 1/8 եզրափակիչ: Գերմանական ակումբի կազմում մինչև վերջ խաղադաշտում էր Հենրիկ Մխիթարյանը, որի համար Ֆրանսիայի հարավի խոշորագույն նավահանգիստ քաղաքը այնքան էլ օտար չէ. այստեղ նա անցկացրել է մանկության մի քանի տարիներ:

Հանդիպումից հետո հայ կիսապաշտպանը պատասխանել է տեղական 20minutes հանդեսի թղթակցի հարցերին:

- Հենրիկ, դժվարությա՞մբ տրվեց հաղթանակը, որը կորզեցիք վերջին րոպեներին:

- Պայքարեցինք մինչև վերջ և ուրախ ենք, որ 87-րդ րոպեին խփեցինք հաղթական գոլը:

- Ինչպիսի՞ զգացումներ ունեցաք «Վելոդրոմ» մարզադաշտ վերադառնալուց հետո:

- Սա Չեմպիոնների լիգայի առաջին խաղն էր, որ անցկացրեցի Ֆրանսիայում, ու երջանիկ եմ դրա համար:

- Ի՞նչ կարծիքի եք մարսելցիների այսօրվա խաղի մասին:

- «Օլիմպիկը» շատ լավ թիմ է, ու ինձ համար հանելուկ է, թե ինչպես այն չկարողացավ միավորներ վաստակել Չեմպիոնների լիգայի ընթացիկ խաղարկությունում: Բայց, կարծում եմ, հաջորդ տարի այս թիմն ավելի կուժեղանա և կպայքարի խմբային փուլի արգելքը հաղթահարելու համար:

- Մտավախություն ունեի՞ք, որ կարող է չանցնեք 1/8 եզրափակիչ:

- Այո, իհարկե: 1:1 հաշվի ժամանակ գիտեինք, որ մյուս խաղում «Նապոլին» հաղթել է «Արսենալին», ուստի ոչ-ոքիի դեպքում դուրս կմնայինք պայքարից: Սակայն, պայքարեցինք մինչև վերջ և հասանք նպատակին: