Փաստ ինֆո

Միասնական քննչական մարմնի ղեկավարը «բավական բարձր ստատուս պետք է ունենա, որպեսզի նորից իշխանության տարբեր մարմինների կամ կառավարության տարբեր գերատեսչությունների ազդեցության տակ չընկնի»:  Նման կարծիք հայտնեց Ազգային ժողովի «Հայ ազգային կոնգրես» խմբակցության անդամ, ՀՀ գլխավոր դատախազի նախկին տեղակալ Գագիկ Ջհանգիրյանը՝ ի պատասխան   «Փաստինֆո»-ի թղթակցի հարցի, թե  ինչ մեխանիզմներ են անհրաժեշտ, որպեսզի իրոք ապահովվի ստեղծվելիք Միասնական քննչական մարմնի անկախությունն ու պրոֆեսիոնալիզմը: Միաժամանակ պատգամավորը մտահոգություն հայտնեց, որ քննչական մարմինը միասնական չի լինելու։

Պատգամավորն ասվածը պարզաբանեց հետևյալ կերպ. «Միասնական քննչական մարմնի կազմավորման իրավական ապահովման հանձնաժողով ստեղծելու մասին Նախագահի կարգադրությունից դատելով՝ ստեղծվելիք մարմնից փաստորեն արդեն դուրս են մնացել Հատուկ քննչական ծառայությունը և Ազգային անվտանգության ծառայության քննչական մարմինը: Հիմա էլ լուրեր են պտտվում, որ Միասնական քննչական մարմնից դուրս է մնացել նաև Պետական եկամուտների կոմիտեի քննչական ծառայությունը»:

Ըստ Գ. Ջհանգիրյանի, սա այդ մարմնի ամենախոցելի, բացասական հատկանիշն է: Ըստ էության, այն իր մեջ միավորելու է միայն Ոստիկանության քննչական գլխավոր վարչությունը և Պաշտպանության նախարարության քննչական վարչությունը: «Փաստորեն երկուսն են միավորվում, և երեք քննչական մարմիններ դուրս են մնում այդ քննչական մարմնից: Սա ամենամեծ թերությունն է, որովհետև նախաքննությունը լուծում է միասնական խնդիրներ, և շատ կարևոր է, որպեսզի այդ մարմինն անկախ լինի որևէ գերատեսչությունից, որևէ նախարարությունից, որևէ առընթեր մարմնից, որպեսզի կարողանա լուծել այդ միասնական խնդիրները միատեսակ: Երկրորդ կարևոր հանգամանքը՝ որպեսզի դատախազական հսկողությունը դառնա իրական, արդյունավետ նախաքննության կամ մինչդատական վարույթի նկատմամբ»,-ընդգծեց նա:

Ինչ վերաբերում է այդ մարմնի ղեկավարի նշանակմանը, ապա, ըստ Գ.Ջհանգիրյանի, նա «բավական բարձր ստատուս պետք է ունենա, որպեսզի նորից իշխանության տարբեր մարմինների կամ կառավարության տարբեր գերատեսչությունների ազդեցության տակ չընկնի»:

Պատգամավորը նշեց, որ դեռևս 2009թ.-ին, ԱՄՆ արտաքին գերատեսչության աջակցությամբ, հրապարակվել է իր մշակած՝ Դատական բարեփոխումների հայեցակարգ-ծրագիրը: «Այդ հայեցակարգում ես, մասնավորապես, առաջ եմ քաշել միասնական քննչական մարմնի կամ քննչական ծառայության ստեղծման գաղափարը և հիմնավորել, թե ինչու է դա անհրաժեշտ»,-նշեց նա՝ հավելելով, որ, այդ հայեցակարգի համաձայն, միասնական քննչական մարմնի «ղեկավարը պետք է նշանակվի կամ Նախագահի կողմից՝ վարչապետի ներկայացմամբ, կամ առնվազն վարչապետի կողմից, որպեսզի ունենա բավարար անկախություն, ինքնուրույնություն»:

Գ.Ջհանգիրյանի համոզմամբ, միասնական մարմնի ստեղծումը ենթադրում է ոչ միայն քննչական մարմինների միասնականացում, այլև՝ ներքին մասնագիտացման ապահովում, խորացում: «Դա չի նշանակում, որ,ասենք, հարկային կամ զինվորական հանցագործությունների վերաբերյալ գործերը պետք է քննեն բոլոր քննիչները: Դա նշանակում է, որ այդ միասնական քննչական ծառայությունում պետք է լինեն տարբեր կառույցներ, որոնք պետք է քննեն համապատասխան ոլորտի գործերը»,-ընդգծեց նա:

Ի դեպ, շրջանառվող տեղեկությունների համաձայն, օրինագիծը մյուս շաբաթ կներկայացվի կառավարության քննարկմանը։