Փաստ ինֆո

«Արփի լիճ» ազգային պարկի ստեղծման ծրագրի իրականացման ժամկետը կառավարությունը մտադիր է երկարաձգել մինչև 2014թ-ի ավարտը: Նման որոշման նախագիծ արդեն իսկ ընդգրկված է կառավարության վաղը նախանշված նիստի օրակարգում:

Բանն այն է, որ 2013թ-ի համար գրված այս ծրագիրը, որը պետք է իրականացվեր  Գերմանիայի Դաշնային Հանրապետության կողմից KfW միջազգային զարգացման բանկի ֆինանսավորման միջոցով, հետաձգվել է մինչև 2014թ-ի վերջը: Բացի այդ փոխվել է նաև ֆինանսավորողը:

Ազգային պարկի ստեղծման աշխատանքները հաջորդ տարի, ըստ կառավարության հաստատմանը ներկայացված նախագծի, իրականացվելու են Եվրոպական միության Հարևանության ներդրումային ծրագրի աջակցությամբ իրականացվող ՀՀ պետական սահմանի «Բագրատաշեն», «Բավրա» և «Գոգավան» անցման կետերի արդիականացման դրամաշնորհային ծրագիր համաֆինանսավորման միջոցների հաշվին, կամ, թերևս, այն գումարով, ինչ կմնա անցակետերի կառուցումից հետո:

Իսկ մինչ այդ, փաստորեն, «Արփի լիճ» ազգային պարկը կմատնվի բախտի քմահաճույքին:

Վայրի Բնության Հիմնարդամի (WWF) հայաստանյան գրասենյակի ղեկավար Կարեն Մանվելյանը, ով կանգնած է եղել 2009-ին պաշտոնապես հաստատված այս հատուկ պահպանվող տարածքի հիմնադրման ակունքներում, «Փաստինֆո»-ի հետ զրույցում նշեց, որ ազգային պարկի ստեղծման համար մինչ օրս հատկացվել է շուրջ 10 մլն դրամ` հաստիքացուցակի և աշխատակազմի համար:  «Բայց դա քիչ է»,- նշեց մեր զրուցակիցը, մանրամասնելով, որ այդ գումարով հնարավոր է եղել ազգային պարկի աշխատանքներում ներգրավել ընդամենը 10-12 աշխատակցի:

«10-12 հոգով անհնար է աշխատել, պետք է գոնե 44 հոգի աշխատի, ինֆրակառուցվածքը տեղում է, մնում է անձնակազմը ամբողջական լինի, ամեն մեկն իմանա իր պարտականությունները, որ 100 տոկոսով աշխատի»,- նշեց մեր զրուցակիցը, չթաքցնելով, որ  ծրագրի հետաձգումը կարող է ճակատագրական դառնալ լճի ու դրա շրջակայքի հազվադեպ բնության համար:

Բանն այն է, որ լիճը սնուցող գետերի, ինչպես և հայաստանյան մյուս մեծ ու փոքր գետերի վրա մեծ թափով ընթանում են ՀԷԿ-երի շինարարական աշխատանքներ, մինչդեռ ՀԷԿ-ի աշխատանքի հետևանքով գետի հունը ցամաքում է, իր հերթին նաև լճի ցամաքեցման պատճառ դառնալով:

«Լիճն ամեն տարի ավելի է դատարկվում: Այս տարի էլ է շատ դատարկվել: Բնապահպանության նախարարությունում մեզ պատճառաբանում են, թե ոռոգման համար շատ  ջուր է վերցվել: Բայց մենք գիտենք, որ այս տարի այնքան էլ չորային չի եղել: Այս պրոցեսն ակնհայտ է, որովհետև լճի մեջ կղզիները դառնում են հասանելի ոտքով»,- ասաց Կարեն Մանվելյանը:

Մի կողմից լիճը ցամաքում է, մյուս կողմից ազգային պարկի ստեղծման ծրագիրը հետաձգվում: Այս պարագայում մնում է հուսալ, որ մինչ անհրաժեշտ ֆինանսավորումը կգտնվի, «Արփի լիճ» ազգային պարկը չի դառնա զուտ թղթի վրա գրված ծրագիր:

 

Հեղինակ` Նելլի Դանիելյան